ନୂଆଦିଲ୍ଲୀ: ବାଂଲାଦେଶ କ୍ରିକେଟ୍ ବୋର୍ଡ (ବିସିବି) ଆଜି’ ଢାକାସ୍ଥିତ ଶେର୍-ଇ-ବଙ୍ଗଳା ଜାତୀୟ କ୍ରିକେଟ୍ ଷ୍ଟାଡିୟମରେ ଡିସେମ୍ବରରେ ତିନିଟି ଦିନିକିଆରୁ ଆରମ୍ଭ ହେବାକୁ ଥିବା ବାଂଲାଦେଶ ଗସ୍ତର ସୂଚୀ ଘୋଷଣା କରିଛି। ଦିନିକିଆ ମ୍ୟାଚ୍ ସମାପ୍ତ ହେବା ପରେ ଭାରତ ବାଂଲାଦେଶ ବିପକ୍ଷରେ ଦୁଇଟି ଟେଷ୍ଟ ଖେଳିବ। ଏହି ଯାତ୍ରା ଶେଷ ହେବା ପରେ ଡିସେମ୍ବର ୨୭ ତାରିଖରେ ଭାରତ ବାଂଲାଦେଶରୁ ବିଦାୟ ନେବ।
ଉଭୟ ଟେଷ୍ଟ ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ ଚକ୍ରର ଏକ ଅଂଶ, ଯେଉଁଠାରେ ଭାରତ ବର୍ତ୍ତମାନ ୫୨.୦୮ ପ୍ରତିଶତ ପଏଣ୍ଟ ସହିତ ଚତୁର୍ଥ ସ୍ଥାନରେ ରହିଛି। ଯେଉଁଠାରେ ବାଂଲାଦେଶ ୧୩.୩୩ ପ୍ରତିଶତ ପଏଣ୍ଟ ସହ ଚାମ୍ପିଅନସିପ୍ ଟେବୁଲର ଶେଷ ସ୍ଥାନରେ ଅଛି। ୨୦୧୫ ପରଠାରୁ ଏହା ପ୍ରଥମ ଥର ହେବ ଯେ, ଭାରତ ବାଂଲାଦେଶ ଗସ୍ତ କରିବ। ୨୦୧୫ ଗସ୍ତରେ ଏକମାତ୍ର ଟେଷ୍ଟ ଡ୍ରରେ ଶେଷ ହୋଇଥିବାବେଳେ ବାଂଲାଦେଶ ଦିନିକିଆ ସିରିଜ୍ ୨-୧ ରେ ଜିତିଥିଲା।
ଏକ ସରକାରୀ ବିବୃତ୍ତିରେ ଡିସେମ୍ବରରେ ଦୁଇ ଦଳ ମଧ୍ୟରେ ମଲ୍ଟି ଫର୍ମାଟ୍ ମ୍ୟାଚ୍ ହେବାର ସମ୍ଭାବନାକୁ ନେଇ ବିସିବି ସଭାପତି ନଜମୁଲ ହାସନ ବହୁତ ଖୁସି ଅନୁଭବ କରିଛନ୍ତି। ସେ କହିଛନ୍ତି ଯେ ବାଂଲାଦେଶ-ଭାରତ ମ୍ୟାଚ୍ ଆମକୁ ସାମ୍ପ୍ରତିକ ଇତିହାସରେ କିଛି ବଡ ମ୍ୟାଚ୍ ଦେଇଛି ଏବଂ ଉଭୟ ଦେଶର ପ୍ରଶଂସକ ଅନ୍ୟ ଏକ ସ୍ମରଣୀୟ ସିରିଜ୍ ପାଇଁ ଉତ୍ସାହର ସହିତ ଅପେକ୍ଷା କରିଛନ୍ତି। କାର୍ଯ୍ୟସୂଚୀ ନିଶ୍ଚିତ କରିବାରେ ବିସିବି ସହିତ ଘନିଷ୍ଠ ଭାବରେ କାର୍ଯ୍ୟ କରିଥିବାରୁ ମୁଁ ବିସିସିଆଇ କୁ ଧନ୍ୟବାଦ ଦେଉଛି। ଆମେ ଭାରତୀୟ ଦଳକୁ ବାଂଲାଦେଶରେ ସ୍ୱାଗତ କରିବାକୁ ଅପେକ୍ଷା କରିଛୁ।
ବିସିସିଆଇ ସଚିବ ଜୟ ଶାହା ମଧ୍ୟ ସମାନ କଥା କହିଛନ୍ତି, ଯାହା ହାସନ ପ୍ରକାଶ କରିଛନ୍ତି। ଶାହା କହିଛନ୍ତି ଯେ, ଭାରତକୁ ନେଇ ଆଗାମୀ ଦ୍ୱିପାକ୍ଷିକ ସିରିଜ୍ ପାଇଁ ମୁଁ ବାଂଲାଦେଶ କ୍ରିକେଟ୍ ବୋର୍ଡକୁ ମୋର ଶୁଭେଚ୍ଛା ଜଣାଉଛି। ଭାରତ-ବାଂଲାଦେଶ ପ୍ରତିଯୋଗିତା ପ୍ରଶଂସକଙ୍କ ମଧ୍ୟରେ ଅତୁଳନୀୟ ଆଗ୍ରହ ସୃଷ୍ଟି କରେ, ଯାହା ଉଭୟ ଦଳର ପ୍ରଶଂସକଙ୍କ ପାଇଁ ଉପଭୋଗ କରିବାର ଏକ ବଡ଼ ସୁଯୋଗ ହେବ।
ଭାରତୀୟ ଦଳର ବାଂଲାଦେଶ ଗସ୍ତ କାର୍ଯ୍ୟକ୍ରମ:
ଡିସେମ୍ବର ୨: ଭାରତୀୟ ଦଳ ବାଂଲାଦେଶରେ ପହଞ୍ଚିବ।
ଡିସେମ୍ବର ୪ ତାରିଖ: ପ୍ରଥମ ଦିନିକିଆ, ଢାକା
ଡିସେମ୍ବର ୭ ତାରିଖ: ୨ୟ ଦିନିକିଆ, ଢାକା
ଡିସେମ୍ବର ୧୦ ତାରିଖ: ତୃତୀୟ ଦିନିକିଆ, ଢାକା
୧୪-୧୮ ଡିସେମ୍ବର: ପ୍ରଥମ ଟେଷ୍ଟ, ଚଟଗାଁଓ
୨୨-୨୬ ଡିସେମ୍ବର: ଦ୍ୱିତୀୟ ଟେଷ୍ଟ, ଢାକା
ଡିସେମ୍ବର ୨୭ ତାରିଖ: ଭାରତୀୟ ଦଳ ବାଂଲାଦେଶରୁ ବିଦାୟ ନେବ।