ଫ୍ଲୋରିଡା: ଚତୁର୍ଥ ଟି -୨୦ ମ୍ୟାଚରେ ଭାରତ ସହଜରେ ୱେଷ୍ଟଇଣ୍ଡିଜକୁ ପରାସ୍ତ କରିଛି। ଏହି ମ୍ୟାଚରେ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଟିମ୍ ଇଣ୍ଡିଆ ୱେଷ୍ଟଇଣ୍ଡିଜକୁ ୯ ୱିକେଟରେ ପରାସ୍ତ କରିଛି। ଏହିପରି ୫ ମ୍ୟାଚ ବିଶିଷ୍ଟ ଟି -୨୦ ମ୍ୟାଚ୍ ର ସିରିଜ୍ ୨-୨ କୁ ଆସିଛି। ଭାରତୀୟ ଦଳକୁ ଜିତିବା ପାଇଁ ୧୭୯ ରନ୍ ଲକ୍ଷ୍ୟ ରଖିଥିଲା। ୧୭ ତମ ଓଭରରେ ୧୭୯ ରନ୍ ସ୍କୋର କରି ଟିମ୍ ଇଣ୍ଡିଆ ମ୍ୟାଚ୍ ଜିତିଥିଲା। ଭାରତ ପାଇଁ ଉଭୟ ଓପନର୍ ଶୁବମାନ ଗିଲ ଏବଂ ଯଶସ୍ୱୀ ଜୟସ୍ଵାଲ ଅର୍ଦ୍ଧଶତକୀୟ ପାଳି ଖେଳିଥିଲେ।
୪୭ ବଲରୁ ୭୭ ରନ୍ ସ୍କୋର କରିବା ପରେ ଶୁଭମାନ ଗିଲ ପାଭିଲିୟନକୁ ଫେରିଥିଲେ। ସେ ନିଜ ଇନିଂସରେ ୩ ଟି ଚୌକା ଓ ୫ ଟି ଛକା ମାରିଥିଲେ। ଯଶସ୍ଵୀ ଜୟସ୍ଵାଲ ୫୧ ବଲରେ ୮୪ ରନ୍ ସଂଗ୍ରହ କରିବା ପରେ ଅପରାଜିତ ଥିଲେ। ସେ ନିଜ ଇନିଂସରେ ୧୧ ଟି ଚୌକା ଓ ୩ ଟି ଛକା ମାରିଥିଲେ। ଏହିପରି ଭାରତୀୟ ଦଳ ମ୍ୟାଚକୁ ସହଜରେ ଜିତିଥିଲା। ତେବେ ବର୍ତ୍ତମାନ ଏହି ସିରିଜ୍ ୨-୨ ରେ ସମାନ ହୋଇଛି। ଏହିପରି, ସିରିଜର ପଞ୍ଚମ ମ୍ୟାଚ୍ ଏକ ନିର୍ଣ୍ଣାୟକ ମ୍ୟାଚ୍ ହେବ। ପଞ୍ଚମ ମ୍ୟାଚ୍ ଜିତିବା ଦଳ ଏହି ସିରିଜ୍ ଜିତିବ।
ୱେଷ୍ଟଇଣ୍ଡିଜ୍ ଅଧିନାୟକ ରୋଭମାନ ପାୱେଲ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରି ୱେଷ୍ଟଇଣ୍ଡିଜ୍ ୨୦ ଓଭରରେ ୮ ୱିକେଟ୍ ହରାଇ ୧୭୮ ରନ୍ ସଂଗ୍ରହ କରିଥିଲା। ୱେଷ୍ଟଇଣ୍ଡିଜ୍ ପାଇଁ ଶିମ୍ରନ୍ ହେଟମିୟର ସର୍ବାଧିକ ରନ୍ ସଂଗ୍ରହ କରିଥିଲେ। ୩୯ ଟି ବଲରେ ଶିମ୍ରନ୍ ହେଟମିୟର ୬୧ ରନ୍ ସଂଗ୍ରହ କରିଥିଲେ। ସେ ତାଙ୍କ ଇନିଂସରେ ୩ ଟି ଚୌକା ଓ ୪ ଟି ଛକା ମାରିଥିଲେ। ଏହା ବ୍ୟତୀତ ଶାଇ ହୋପ୍ ୨୯ ବଲରେ ୪୫ ରନ୍ କରିଥିଲେ। ଦ୍ରୁତ ବୋଲର ଅର୍ଶଦୀପ ସିଂ ଭାରତ ପାଇଁ ସର୍ବାଧିକ ୩ ଟି ୱିକେଟ୍ ନେଇଥିଲେ। କୁଲଦୀପ ଯାଦବଙ୍କୁ ଦୁଇଟି ସଫଳତା ମିଳିଥିଲା। ଅକ୍ସର ପଟେଲ, ୟୁଜବେନ୍ଦ୍ର ଚହଲ ଏବଂ ମୁକେଶ କୁମାର ୧-୧ ୱିକେଟ୍ ନେଇଥିଲେ।