ନୂଆଦିଲ୍ଲୀ: ଆଜି ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନାକ ଏବଂ ତାଙ୍କ ପତ୍ନୀ ଅକ୍ଷତା ମୂର୍ତ୍ତୀ ନୂଆଦିଲ୍ଲୀସ୍ଥିତ ଅକ୍ଷରଧାମ ମନ୍ଦିର ଦର୍ଶନ କରିଛନ୍ତି। ସୁନାକ ଜି୨୦ ଶିଖର ସମ୍ମିଳନୀ ପାଇଁ ସରକାରୀ ଗସ୍ତ ସମୟରେ ରବିବାର ଦିନ ଉଭୟ ଏହି ମନ୍ଦିର ପରିଦର୍ଶନ କରିଛନ୍ତି।
ସେମାନେ ଆଜି ଜି୨୦ ଦେଶର ନେତାଙ୍କ ସହ ରାଜଘାଟ ଯିବା ପୂର୍ବରୁ ପ୍ରାର୍ଥନା କରିବା ପାଇଁ ସକାଳେ ମନ୍ଦିରରେ ପହଞ୍ଚିଥିଲେ। ପ୍ରଧାନମନ୍ତ୍ରୀ ଋଷି ସୁନାକ ଏବଂ ପ୍ରଥମ ମହିଳା ଅକ୍ଷତା ମୁର୍ତ୍ତୀଙ୍କୁ ମନ୍ଦିର ତରଫରୁ ସ୍ୱାଗତ କରାଯାଇଥିଲା। ଏ ନେଇ ଅକ୍ଷୟ ମନ୍ଦିର ତରଫରୁ ସାମାଜିକ ଗଣମାଧ୍ୟମରେ ଏକ ପୋଷ୍ଟ ସେୟାର କରାଯାଇଛି।
ତାଙ୍କର ଗସ୍ତକୁ ଦେଖି ମନ୍ଦିର ଚତୁପାର୍ଶ୍ବରେ ସୁରକ୍ଷା ବ୍ୟବସ୍ଥା ମଧ୍ୟ କଡାକଡି କରାଯାଇଥିଲା। ପ୍ରଧାନମନ୍ତ୍ରୀ ସୁନାକ ଏବଂ ତାଙ୍କର ଅଧିକାରୀମାନେ ସକାଳ ୬ ଟା ୪୫ ମିନଟରେ ପହଞ୍ଚିଥିଲେ। ସେଠାରେ ତାଙ୍କୁ ଏକ ଶୁଭ ପାରମ୍ପାରିକ ହିନ୍ଦୁ ସ୍ୱାଗତ ପ୍ରଦାନ କରାଯାଇଥିଲା। ଏହା ବିଏପିଏସ ସ୍ବାମୀନାରାୟଣ ଅକ୍ଷରଧାମ ମନ୍ଦିର ଦ୍ୱାରା ପ୍ରକାଶିତ ଏକ ବିବୃତ୍ତିରେ କୁହା ଯାଇଛି।
ଆଧ୍ୟାତ୍ମିକ ଗୁରୁ ମହନ୍ତ ସ୍ବାମୀ ମହାରାଜଙ୍କ ବାର୍ତ୍ତାରେ କହିଛନ୍ତି ଯେ “ବସୁଦେବ କୁଟୁକମ୍ବଂ କୁ ବିଶ୍ବାସ କରି ସମଗ୍ର ବିଶ୍ୱକୁ ଶାନ୍ତି, ଧାର୍ମିକ ସମୃଦ୍ଧତା ଏବଂ ବିଶ୍ୱ ସୌହାର୍ଦ୍ଦ୍ୟ ଦିଗରେ ସାମୂହିକ ଭାବରେ ସାହାଯ୍ୟ କରିବାରେ ଏହି ସମ୍ମିଳନୀ ଏକ ସଫଳ ହେଉ ବୋଲି ପ୍ରାର୍ଥନା କରାଯାଇଥିଲା।
ମନ୍ଦିର ତରଫରୁ ବ୍ରିଟେନର ପ୍ରଧାନମନ୍ତ୍ରୀଙ୍କୁ ୧୦୦ ଏକର ଏକ ଆଧ୍ୟାତ୍ମିକ ଏବଂ ସାଂସ୍କୃତିକ କମ୍ପ୍ଲେକ୍ସର ଏକ ତଥ୍ୟ ପ୍ରଦାନ କରାଯାଇଥିଲା। ଏହା ଭାରତର ପରମ୍ପରା ଏବଂ ପ୍ରାଚୀନ ସ୍ଥାପତ୍ୟକୁ ପ୍ରଦର୍ଶନ କରୁଥିବାବେଳେ ବିଶ୍ବ, ଭକ୍ତି ଏବଂ ସୌହାର୍ଦ୍ଦ୍ୟର ହିନ୍ଦୁ ଆଧ୍ୟାତ୍ମିକ ମୂଲ୍ୟବୋଧକୁ ପ୍ରଦର୍ଶିତ କରୁଥିଲା।
ସୁନାକ ଏବଂ ତାଙ୍କ ପତ୍ନୀ ସେଠାରେ ପୂଜା ପାଉଥିବା ବିଭିନ୍ନ ମୂର୍ତ୍ତିକୁ ମୁଣ୍ଡିଆ ମାରିଥିଲେ। ଉଭୟ ମନ୍ଦିରର କଳା ଏବଂ ସ୍ଥାପତ୍ୟକୁ ବେଶ୍ ପ୍ରଶଂସା ମଧ୍ୟ କରିଥିଲେ। ମନ୍ଦିର କର୍ତ୍ତୁପକ୍ଷଙ୍କ ବିବୃତ୍ତି ଅନୁଯାୟୀ, ସେମାନେ ଶ୍ରୀ ନୀଳକଣ୍ଠ ଭର୍ନି ମହାରାଜଙ୍କ ମୂର୍ତ୍ତି ନିକଟରେ ଅଭିଷେକ କରିବା ସହିତ ଜଳ ପ୍ରଦାନ କରିଥିଲେ। ସେମାନେ ବିଶ୍ୱରେ ଶାନ୍ତି, ପ୍ରଗତି ଏବଂ ସୌହାର୍ଦ୍ଦ୍ୟ ପାଇଁ ପ୍ରାର୍ଥନା କରିଥିଲେ।
ଅକ୍ଷରଧାମ ମନ୍ଦିର ନିର୍ଦ୍ଦେଶକ ଜ୍ୟୋତିନ୍ଦ୍ର ଡେଭ୍ କହିଛନ୍ତି ଯେ ମନ୍ଦିରରେ ସୁନାକ୍ ଏକ “ଅସାଧାରଣ ଅଭିଜ୍ଞତା ହାସଲ କରିଥିଲେ। ଏଠାରେ ସେ ପ୍ରତି ମିନିଟକୁ ଉପଭୋଗ କରିଥିଲେ। ସେ ଆହୁରି କିଛି ସମୟ ମନ୍ଦିରରେ ବିତାଇବା ପାଇଁ ଚାହୁଁଥିଲେ। ହେଲେ ବ୍ୟସ୍ତତା ଭିତରେ ସେ ସେଠାରୁ ଶିଘ୍ର ବିଦାୟ ନେଇଥିଲେ।
ମନ୍ଦିର ପରିକ୍ରମା ବେଳେ ସୁନାକଙ୍କ ପତ୍ନୀ ମଧ୍ୟ ବହୁତ ଖୁସି ଥିଲେ। ସେ ବହୁତ ବିଶ୍ୱାସ ଭକ୍ତି ସହିତ ପୂଜା ଏବଂ ଆରତୀ ମଧ୍ୟ କରିଥିଲେ। ଆମେ ତାଙ୍କୁ ମନ୍ଦିର ବୁଲାଇ ଦେଖାଇଥିଲୁ ଏବଂ ତାଙ୍କୁ ଉପହାର ସ୍ୱରୂପ ମନ୍ଦିରର ଏକ ମଡେଲ ମଧ୍ୟ ପ୍ରଦାନ କରିଥିଲୁ ବୋଲି ନିର୍ଦ୍ଦେଶକ କହିଛନ୍ତି।
ମନ୍ଦିର କର୍ତ୍ତୃପକ୍ଷ ସୁନାକଙ୍କୁ ମନ୍ଦିରର ଏକ ମଡେଲ ଉପହାର ଦେଇଥିଲେ। ସୁନାକ ଶୁକ୍ରବାର ଦିନ ଭାରତରେ ପହଞ୍ଚିବା ପରେ ସେ ଏକ ମନ୍ଦିର ଦର୍ଶନ କରିବେ ବୋଲି ଗଣମାଧ୍ୟମକୁ କହିଥିଲେ। ଜି୨୦ କାର୍ଯ୍ୟକ୍ରମରୁ ସମୟ ବାହାର କରି ଏହି ମନ୍ଦିର ପରିଦର୍ଶନ କରିବି ବୋଲି କହିଥିଲେ।
ସେ ଗର୍ବର ସହିତ କହିଥିଲେ ଯେ, ମୁଁ ଜଣେ ହିନ୍ଦୁ ଭାବେ ଗର୍ବ କରେ। ସେଥିପାଇଁ ମୁଁ ବର୍ତ୍ତମାନ ଏହି ସ୍ତରକୁ ପହଞ୍ଚିପାରିଛି । ଚଳିତ ବର୍ଷ ସେ ଜନ୍ମାଷ୍ଠମୀ ପାଳନ କରିପାରି ନାହାଁନ୍ତି, ସେଥିପାଇଁ ଏକ ମନ୍ଦିର ଯାଇ ସେହି ଇଚ୍ଛାକୁ ପୂରଣ କରିବି ବୋଲି ସୁନାକ କହିଥିଲେ।