ନୂଆଦିଲ୍ଲୀ: କାନାଡାର ଗାୟକ ଶୁଭନୀତ ସିଂ ପୁଣି ଥରେ ବିବାଦକୁ ଆସିଛନ୍ତି। ଏକ କନସର୍ଟ ସମୟରେ ସେ ପୂର୍ବତନ ଭାରତୀୟ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ହତ୍ୟାକୁ ପରିହାସ କରିଛନ୍ତି। ଶୁଭନୀତ ସିଂଙ୍କ ଏକ ଭିଡିଓ ଭାଇରାଲ ହେଉଛି ଯେଉଁଥିରେ ସେ ଏକ କନ୍ସର୍ଟ ସମୟରେ ଏକ ହୁଡି ପ୍ରଦର୍ଶନ କରୁଛନ୍ତି। ଭିଡିଓରେ ଦେଖାଯାଇଥିବା ହୁଡିରେ ସତବନ୍ତ ସିଂ ଏବଂ ବେଅନ୍ତ ସିଂ ଇନ୍ଦିରା ଗାନ୍ଧୀଙ୍କୁ ହତ୍ୟା କରୁଛନ୍ତି। ଏହି ଭିଡିଓ ଦେଖି ଲୋକମାନେ ଆଶ୍ଚର୍ଯ୍ୟ ହୋଇଯାଇଛନ୍ତି, ଶୁଭନୀତ ସିଂଙ୍କ କାର୍ଯ୍ୟକଳାପ ଦେଖିବା ପରେ ଲୋକମାନେ କ୍ରୋଧିତ ହେଉଛନ୍ତି। ଅନେକ ଲୋକ କହିଛନ୍ତି ଯେ, ଭବିଷ୍ୟତରେ ସେମାନେ ଶୁଭନୀତଙ୍କ ଗୀତ ଶୁଣିବା ଠାରୁ ଦୂରେଇ ରହିବେ।
ଶୁଭନୀତଙ୍କ ବିବାଦରେ ଜଡିତ ହେବା ଏହା ପ୍ରଥମ ଘଟଣା ନୁହେଁ। ଏହାପୂର୍ବରୁ ମଧ୍ୟ ଶୁଭନୀତ ଭାରତ ବିରୋଧୀ କାର୍ଯ୍ୟ କରିଛନ୍ତି। ଗତ ମାସରେ ଶୁଭନୀତ ତାଙ୍କ ସୋସିଆଲ ମିଡିଆରେ ଭାରତର ମାନଚିତ୍ର ପୋଷ୍ଟ କରିଥିଲେ। ଏହାକୁ ନେଇ ଅନେକ ବିବାଦ ହୋଇଥିଲା। ସେତେବେଳେ ମଧ୍ୟ ଲୋକମାନେ କାନାଡିୟ ଗାୟକଙ୍କୁ ସମାଲୋଚନା କରିଥିଲେ।
ବଲିଉଡ ଅଭିନେତ୍ରୀ କଙ୍ଗନା ରଣାୱତ ଶୁଭନୀତ ସିଂଙ୍କ ଭାଇରାଲ ଭିଡିଓ ଉପରେ ପ୍ରତିକ୍ରିୟା ରଖିଛନ୍ତି। ଏକ ପୋଷ୍ଟରେ ମନ୍ତବ୍ୟ ଦେଇ ସେ ଲେଖିଛନ୍ତି ଯେ, “ତାଙ୍କ ତରଫରୁ ଜଣେ ବୁଢୀ ମହିଳାର ହତ୍ୟାକାଣ୍ଡକୁ ନେଇ ଉତ୍ସବ ପାଳନ କରାଯାଉଛି। ସେହି ମହିଳା, ଯାହାଙ୍କୁ ସେ ତାଙ୍କର ରକ୍ଷକ କରିଥିଲେ। ଯେତେବେଳେ ଆପଣଙ୍କୁ ସୁରକ୍ଷାର ଭରସା କରାଯାଇଥିଲା, ସେତେବେଳେ ଆପଣ ସେହି ବିଶ୍ୱାସ ଏବଂ ଭରସାର ଲାଭ ଉଠାଇଲ ଏବଂ ତାଙ୍କୁ ସମାନ ଅସ୍ତ୍ରରେ ହତ୍ୟା କରିଥିଲ। ଏହା କୌଣସି ବାହାଦୁରୀର କାମ ନୁହେଁ ବରଂ ଭୀରୁର କାର୍ଯ୍ୟ। ଗଣତନ୍ତ୍ରର ଜଣେ ନିର୍ବାଚିତ ନେତା, ଜଣେ ଶକ୍ତିଶାଳୀ ନାରୀ ଉପରେ ଏହିପରି ଆକ୍ରମଣ, ଏଥିରେ ଯେକେହି ଲଜ୍ଜିତ ହେବା ଉଚିତ୍। ଶୁଭମଜୀ।”
ସୂଚନାଯୋଗ୍ୟ ଯେ, ଆଗାମୀ ଚଳଚ୍ଚିତ୍ର ‘ଏମରଜେନ୍ସି’ରେ କଙ୍ଗନା ରଣାୱତ ଇନ୍ଦିରା ଗାନ୍ଧୀଙ୍କ ଭୂମିକାରେ ଅଭିନୟ କରୁଛନ୍ତି। ଯଦିଓ ଏହି ଚଳଚ୍ଚିତ୍ର ଚଳିତ ବର୍ଷ ମୁକ୍ତିଲାଭ କରିବାକୁ ଯାଉଥିଲା, ଏବେ ଏହାର ତାରିଖ ବୃଦ୍ଧି କରାଯାଇଛି।