ଭୁବନେଶ୍ବର: ଓଡ଼ିଶାରେ ପୁଞ୍ଜିନିବେଶ ପାଇଁ ବିଶ୍ବସ୍ତରୀୟ ଶିଳ୍ପ ସଂସ୍ଥାକୁ ଆକୃଷ୍ଟ କରିବା ଲାଗି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସିଙ୍ଗାପୁରରେ ପହଞ୍ଚିଛନ୍ତି। ସେଠାରେ ମୁଖ୍ୟମନ୍ତ୍ରୀ ବିଭିନ୍ନ ଶିଳ୍ପସଂସ୍ଥାର ମୁଖ୍ୟମାନଙ୍କ ସହ ଆଲୋଚନା କରିଛନ୍ତି।
ଆଜି ସେ ସିଙ୍ଗାପୁରଠାରେ ସିଟିମେଟ୍ରିକ୍ସର ପ୍ରତିଷ୍ଠାତା ଡକ୍ଟର ଏଡୱାର୍ଡ ମୋର୍ଟନ, ୟୁବିସିଟିର ଅଧ୍ୟକ୍ଷ ବି.ସି.ଟାନ୍ ଏବଂ ଆଇହବ୍ ଇନକ୍ଲୁସିଭ୍ର ପ୍ରତିଷ୍ଠାତା ତଥା ମୁଖ୍ୟ କାର୍ଯ୍ୟନିର୍ବାହୀ ସୁଶାନ୍ତ ପଟ୍ଟନାୟକଙ୍କ ସହ ଆଲୋଚନା କରିଛନ୍ତି।ଏହି ଅବସରରେ ଶିଳ୍ପମନ୍ତ୍ରୀ ସମ୍ପଦ ସ୍ବାଇଁ ଉପସ୍ଥିତ ଥିଲେ। ଓଡ଼ିଶାରେ ସେମିକଣ୍ଡକ୍ଟର, ଚିକିତ୍ସା ଉପକରଣ ଉତ୍ପାଦନ ଓ ସ୍ମାର୍ଟସିଟି ସଲ୍ୟୁସନ କ୍ଷେତ୍ରରେ ନିବେଶ ପାଇଁ ଆଲୋଚନା ହୋଇଛି।
ଓଡ଼ିଶାରେ ସେମିକଣ୍ଡକ୍ଟର ଓ ଇଲେକ୍ଟ୍ରୋନିକ୍ସ ଉତ୍ପାଦନ ପାଇଁ ମୁଖ୍ୟମନ୍ତ୍ରୀ ବିଶେଷ ଗୁରୁତ୍ବାରୋପ କରିଛନ୍ତି। ରାଜ୍ୟରେ ଦୃଢ ଇଲେକ୍ଟ୍ରୋନିକ୍ସ ଇକୋ-ସିଷ୍ଟମ ବିକାଶ ଲାଗି ସରକାର ସଂକଳ୍ପବଦ୍ଧ ବୋଲି ଶିଳ୍ପମନ୍ତ୍ରୀ କହିଛନ୍ତି । ଅନ୍ୟପକ୍ଷରେ ଭିସା ଗ୍ରୁପ୍ ଲିମିଟେଡ୍ର ପୃଷ୍ଠପୋଷକ ବିବେକ ଅଗ୍ରୱାଲଙ୍କ ସହ ମଧ୍ୟ ମୁଖ୍ୟମନ୍ତ୍ରୀ ଆଲୋଚନା କରିଛନ୍ତି।
ଓଡ଼ିଶାରେ ଇସ୍ପାତ ଓ ଫେରୋକ୍ରୋମ କ୍ଷେତ୍ରରେ ଉତ୍ପାଦନ କ୍ଷମତା ବଢାଇବା, ମୂଲ୍ୟ ଆଧାରିତ ଉତ୍ପାଦ ଉପରେ ଧ୍ୟାନ କେନ୍ଦ୍ରିତ କରିବା ଏବଂ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବା ଦିଗରେ ଆଲୋଚନା ହୋଇଛି।
ସେହିପରି ମୁଖ୍ୟମନ୍ତ୍ରୀ ଓଡ଼ିଶାରେ ସବୁଜ ଆମୋନିଆ ପ୍ରକଳ୍ପ ପ୍ରତିଷ୍ଠା କରିବା ଲାଗି ସେମ୍ବକର୍ପ ଇଣ୍ଡଷ୍ଟ୍ରିଜର ଅଧ୍ୟକ୍ଷ ଓଙ୍ଗ୍ କିମ୍ ୟିନଙ୍କ ସହ କଥା ହୋଇଛନ୍ତି। ଏହାବ୍ୟତୀତ ସେ ଓରିଣ୍ଡ ସିଙ୍ଗାପୁର କମ୍ପାନୀର ଅଧ୍ୟକ୍ଷ ରବିନ ଝୁନଝୁନୱାଲାଙ୍କୁ ମଧ୍ୟ ଭେଟିଛନ୍ତି।
