ନୂଆଦିଲ୍ଲୀ: କାନାଡାରେ 2025 ସାଧାରଣ ନିର୍ବାଚନର ଫଳାଫଳ କେବଳ ରାଜନୈତିକ ସମୀକରଣକୁ ବଦଳାଇ ଦେଇନାହିଁ ବରଂ ଖାଲିସ୍ତାନୀ ଏଜେଣ୍ଡାକୁ ମଧ୍ୟ ଏକ ବଡ଼ ଝଟକା ଦେଇଛି। ଖାଲିସ୍ତାନୀ ଆତଙ୍କବାଦୀ ଗୁରୁପତବନ୍ତ ସିଂ ପନ୍ନୁଙ୍କୁ ସର୍ବଦା ସମର୍ଥନ କରୁଥିବା ଜଗମିତ ସିଂ ଏହି ନିର୍ବାଚନରେ ପରାଜୟର ସମ୍ମୁଖୀନ ହୋଇଛନ୍ତି। ନିର୍ବାଚନରେ ତାଙ୍କର ପରାଜୟକୁ ଗ୍ରହଣ କରି ସେ ସାଂସଦ ପଦରୁ ଇସ୍ତଫା ଦେଇଛନ୍ତି। ଏହା ସହିତ ତାଙ୍କର ନିଉ ଡେମୋକ୍ରାଟିକ୍ ପାର୍ଟି (ଏନଡିପି) ମଧ୍ୟ ପରାଜୟ ପରେ ସଙ୍କଟରେ ଆସିଛି।
ଏହି ନିର୍ବାଚନରେ ଏନଡିପି ଏତେ କମ୍ ଆସନ ପାଇଛି ଯେ, ଦଳ ବର୍ତ୍ତମାନ ଜାତୀୟ ଦଳ ଭାବରେ ନିଜର ସ୍ଥିତି ହରାଇପାରେ। କାନାଡାରେ ଜାତୀୟ ମାନ୍ୟତା ବଜାୟ ରଖିବାକୁ ଯେକୌଣସି ଦଳ ଅତିକମରେ 12 ଟି ସିଟ୍ ଜିତିବାକୁ ପଡିବ, କିନ୍ତୁ ଏନଡିପି ତାହା କରିବାରେ ବିଫଳ ହୋଇଛି। ଏହା ହେଉଛି ସେହି ଦଳ ଯାହା ଜଗମିତ ସିଂ ନିଜେ ଏକଦା “କିଙ୍ଗମେକର” ଭାବରେ ଉପସ୍ଥାପନ କରିଥିଲେ।
ଏଥର ମଧ୍ୟ ଜଗମିତ ସିଂ ନିଜେ ନିଜ ଆସନକୁ ବଞ୍ଚାଇ ପାରିଲେ ନାହିଁ। ସେ ବ୍ରିଟିଶ କଲମ୍ବିଆର ବର୍ନାବି ସେଣ୍ଟ୍ରାଲ ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ, ଯେଉଁଠାରେ ତାଙ୍କୁ ଲିବରାଲ ପାର୍ଟି ପ୍ରାର୍ଥୀ ୱେଡ ଚାଙ୍ଗ ପରାସ୍ତ କରିଥିଲେ। ଜଗମିତ ସିଂ ମାତ୍ର 27.3% ଭୋଟ୍ ପାଇଥିବାବେଳେ ବିଜେତା 40% ରୁ ଅଧିକ ଭୋଟ୍ ପାଇଛନ୍ତି। ଫଳାଫଳ ଏହା ମଧ୍ୟ ସ୍ପଷ୍ଟ କରିଛି ଯେ, ସେ ତାଙ୍କ ସଂସଦୀୟ କ୍ଷେତ୍ରରେ ତୃତୀୟ ସ୍ଥାନରେ ରହିଛନ୍ତି, ଯାହା ତାଙ୍କ ରାଜନୈତିକ କ୍ୟାରିୟର ପାଇଁ ଏକ ବଡ ଝଟକା। ପରାଜୟର କିଛି ସମୟ ପରେ ଗଣମାଧ୍ୟମକୁ ସୂଚନା ଦେଇ ଜଗମିତ ସିଂ କହିଛନ୍ତି ଯେ, ଫଳାଫଳକୁ ନେଇ ସେ ନିରାଶ ହୋଇଛନ୍ତି କିନ୍ତୁ ତାଙ୍କ ଆନ୍ଦୋଳନକୁ ନେଇ ଆଶାବାଦୀ ଅଛନ୍ତି। ସେ କହିଛନ୍ତି ଯେ, “ଆମେ ଅଧିକ ଆସନ ଜିତି ପାରିଥାନ୍ତୁ, କିନ୍ତୁ ମୋର ବିଶ୍ୱାସ ଯେ ଭବିଷ୍ୟତରେ ଆମ ଦଳ ପୁଣି ଉଠିବ।
ଜଗମିତ ସିଂଙ୍କ ପରାଜୟ ସହିତ ପୂର୍ବତନ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ଲିବରାଲ୍ ପାର୍ଟି ମଧ୍ୟ ନିର୍ବାଚନରେ ଏକ ପରାଜୟର ସମ୍ମୁଖୀନ ହୋଇଛି। ପ୍ରକାଶ ଥାଉକି, ଲିବରାଲ୍ ମେଣ୍ଟର ଅନ୍ୟ ଚେହେରା ମାର୍କ କାର୍ନିଙ୍କ ନେତୃତ୍ୱରେ ଦଳ ଜବରଦସ୍ତ ସଫଳତା ହାସଲ କରିଛି। ଫଳାଫଳରୁ ଏହା ସ୍ପଷ୍ଟ ହୋଇଛି ଯେ, କାନାଡାର କ୍ଷମତା ବର୍ତ୍ତମାନ ମାର୍କ କାର୍ନିଙ୍କ ହାତରେ ରହିବ ଏବଂ ସେ ପରବର୍ତ୍ତୀ ପ୍ରଧାନମନ୍ତ୍ରୀ ହେବେ।