ନୂଆଦିଲ୍ଲୀ: TikTok, AliExpress ଏବଂ WeChat ଭଳି ଲୋକପ୍ରିୟ ଚୀନ୍ ଆପ୍ ପୁଣି ଥରେ ବିବାଦରେ ପଡ଼ିଛି। ଏହି ଆପ୍ଗୁଡ଼ିକ ଉପଭୋକ୍ତାଙ୍କ ବ୍ୟକ୍ତିଗତ ସୂଚନା ଚୋରି କରିବା ଏବଂ ୟୁରୋପୀୟ ସଂଘର ଡାଟା ଗୋପନୀୟତା ନିୟମ ଉଲ୍ଲଂଘନ କରିବାର ଅଭିଯୋଗ ଆସିଛି। ନୋୟବ (noyb) ନାମକ ଏକ ଅଷ୍ଟ୍ରିଆ-ଭିତ୍ତିକ ଡାଟା ଗୋପନୀୟତା ସଂଗଠନ ୟୁରୋପୀୟ ସଂଘରେ ଏହି ତିନୋଟି ଆପ୍ ବିରୋଧରେ ଅଭିଯୋଗ ଦାଖଲ କରିଛି। ୟୁରୋପୀୟ ସଂଘର ଆଇନ ଅନୁଯାୟୀ, ପ୍ରତ୍ୟେକ ଉପଭୋକ୍ତାଙ୍କ ଡାଟା ଡାଉନଲୋଡ୍ ଏବଂ ଆକ୍ସେସ୍ କରିବାର ଅଧିକାର ରହିବା ଉଚିତ। କିନ୍ତୁ ରିପୋର୍ଟରେ କୁହାଯାଇଛି ଯେ, TikTok, AliExpress ଏବଂ WeChat ଭଳି ଆପ୍ ଏହି ସୁବିଧା ପ୍ରଦାନ କରୁନାହିଁ।
ଏହା ସ୍ପଷ୍ଟ କରେ ଯେ, ଏହି କମ୍ପାନୀଗୁଡ଼ିକ ୟୁରୋପୀୟ ନିୟମ ପାଳନ କରୁନାହାଁନ୍ତି, ଯାହା ସେମାନଙ୍କର ସମସ୍ୟା ବୃଦ୍ଧି କରିପାରେ। Noyb କହିଛି ଯେ, ଏହି ଆପ୍ଗୁଡ଼ିକ ଉପଭୋକ୍ତାଙ୍କଠାରୁ ବହୁ ପରିମାଣର ବ୍ୟକ୍ତିଗତ ସୂଚନା ସଂଗ୍ରହ କରନ୍ତି କିନ୍ତୁ ସେମାନଙ୍କୁ ନିଜସ୍ୱ ଡାଟା ଆକ୍ସେସ୍ କରିବାର ବିକଳ୍ପ ଦିଅନ୍ତି ନାହିଁ। Noyb ଯେଉଁ ଛଅଟି ଚୀନ୍ କମ୍ପାନୀ ବିରୁଦ୍ଧରେ ଅଭିଯୋଗ କରିଛି ସେମାନଙ୍କ ଉପରେ ମଧ୍ୟ ଅବୈଧ ଭାବରେ ଚୀନ୍କୁ ବ୍ୟବହାରକାରୀଙ୍କ ତଥ୍ୟ ପଠାଇବାର ଅଭିଯୋଗ ଅଛି। ଯଦି ଏହି ଅଭିଯୋଗଗୁଡ଼ିକ ପ୍ରମାଣିତ ହୁଏ, ତେବେ ଏହା ଏକ ଗମ୍ଭୀର ବିଷୟ ହୋଇପାରେ କାରଣ ଏହା ୟୁରୋପୀୟ ସଂଘର କଠୋର ଡାଟା ସୁରକ୍ଷା ନୀତିର ସିଧାସଳଖ ଉଲ୍ଲଂଘନ ହେବ। ନୋୟବ ପୂର୍ବରୁ ଆପଲ ଏବଂ ଗୁଗୁଲର ମୂଳ କମ୍ପାନୀ ଆଲଫାବେଟ ଭଳି ଆମେରିକୀୟ ଟେକ୍ ଜିଆଣ୍ଟ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ସୁରକ୍ଷା କାରଣରୁ ଭାରତ ସରକାର ୨୦୨୦ ମସିହାରେ ଦେଶରେ ଟିକଟକ ସମେତ ଅନେକ ଚୀନ୍ ଆପ୍ ଉପରେ ପ୍ରତିବନ୍ଧକ ଲଗାଇଥିଲେ। ଡାଟା ସୁରକ୍ଷା ଏବଂ ଜାତୀୟ ସାର୍ବଭୌମତ୍ୱକୁ ଧ୍ୟାନରେ ରଖି ଏହି ପଦକ୍ଷେପ ନିଆଯାଇଥିଲା। ବର୍ତ୍ତମାନ ୟୁରୋପରେ ସମାନ ଅଭିଯୋଗ ଉଠୁଥିବାରୁ, ସେଠାରେ ମଧ୍ୟ ଏହି ଆପ୍ ଉପରେ ପ୍ରତିବନ୍ଧକ ଲାଗିପାରେ ବୋଲି ସମ୍ଭାବନା ରହିଛି। ଆଜିର ଡିଜିଟାଲ୍ ଯୁଗରେ ଉପଭୋକ୍ତାଙ୍କ ସୂଚନା ସୁରକ୍ଷା ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପାଲଟିଛି।