ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଶ୍ୱ ଅର୍ଥନୈତିକ ଫୋରମରେ ଯୋଗଦେବା ପାଇଁ ସ୍ୱିଜରଲ୍ୟାଣ୍ଡର ଡାଭୋସ୍ ଅଭିମୁଖେ ଯାତ୍ରା କରୁଥିଲେ। କିନ୍ତୁ, ଉଡ଼ାଣ ଆରମ୍ଭ ହେବାର କିଛି ସମୟ ପରେ ତାଙ୍କର ସ୍ୱତନ୍ତ୍ର ବିମାନ ‘ଏୟାର ଫୋର୍ସ ୱାନ୍’ ରେ ବୈଦ୍ୟୁତିକ ସମସ୍ୟା ଦେଖାଦେଲା।
ହ୍ୱାଇଟ୍ ହାଉସ୍ ଅନୁଯାୟୀ, ସୁରକ୍ଷା ଦୃଷ୍ଟିରୁ ବିମାନଟିକୁ ତୁରନ୍ତ ମେରିଲ୍ୟାଣ୍ଡର ଜଏଣ୍ଟ ବେସ୍ ଆଣ୍ଡ୍ରୁଜ୍ କୁ ଫେରାଇ ଦିଆଯାଇଥିଲା ଯାହାଦ୍ୱାରା ରାଷ୍ଟ୍ରପତି କୌଣସି ବିପଦ ବିନା ଅନ୍ୟ ଏକ ବିମାନରେ ଯାତ୍ରା କରିପାରିବେ। ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ ସ୍ପଷ୍ଟ କରିଛନ୍ତି ଯେ, ରାଷ୍ଟ୍ରପତି ଟ୍ରମ୍ପଙ୍କ ଡାଭୋସ୍ ଯାତ୍ରା ବାତିଲ କରାଯାଇ ନାହିଁ। ସେ କହିଛନ୍ତି ଯେ, କେବଳ ଏକ ଯାନ୍ତ୍ରିକ ସମସ୍ୟା ଯୋଗୁଁ ବିମାନକୁ ପରିବର୍ତ୍ତନ କରାଯାଇଥିଲା ଏବଂ ରାଷ୍ଟ୍ରପତି ନୂତନ ବିମାନରେ ସ୍ୱିଜରଲ୍ୟାଣ୍ଡ ଯିବେ।