ନୂଆଦିଲ୍ଲୀ: ଦୁବାଇ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ଆଜି ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ମହିଳା ଟିମ୍ ମଧ୍ୟରେ ଏସିଆ କପ୍ର ହାଇଭୋଲ୍ଟେଜ୍ ମ୍ୟାଚ୍ ଖେଳାଯିବ। ଗ୍ରୁପ୍-ଏ’ରେ ଥାଇଲ୍ୟାଣ୍ଡ ଓ ହଂକଂକୁ ପରାସ୍ତ କରି ହରମନପ୍ରୀତ କୌରଙ୍କ ନେତୃତ୍ୱାଧୀନ ଭାରତୀୟ ଦଳ ପୂର୍ବରୁ ହିଁ ସେମିଫାଇନାଲ ଟିକେଟ୍ ପକ୍କା କରିସାରିଛି। ତେଣୁ ଆଜିର ଏହି ମୁକାବିଲା ଟିମ୍ ଇଣ୍ଡିଆ ପାଇଁ ଏକ ଅଭ୍ୟାସ ମ୍ୟାଚ୍ ସଦୃଶ ହେବ। ମ୍ୟାଚ୍ ପୂର୍ବରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଭାରତୀୟ ଅଲରାଉଣ୍ଡର ଦୀପ୍ତି ଶର୍ମା ଦଳର ମନୋବଳ ବୃଦ୍ଧି କରି କହିଛନ୍ତି, “ଏସିଆ କପ୍ ହେଉ କି ଅନ୍ୟ କୌଣସି ଟୁର୍ନାମେଣ୍ଟ, ପାକିସ୍ତାନ ବିପକ୍ଷ ମ୍ୟାଚ୍ଗୁଡ଼ିକରେ ଆମେ ସଦାବେଳେ ବିଜୟୀ ହୋଇଛୁ। ଆମେ ସର୍ବଦା ପାକିସ୍ତାନଠାରୁ ଗୋଟିଏ ପାଦ ଆଗରେ ରହିଆସିଛୁ।”
ଦୀପ୍ତି ଆହୁରି ମଧ୍ୟ କହିଛନ୍ତି ଯେ, ବର୍ତ୍ତମାନ ପୂରା ଦଳ ଶ୍ରେଷ୍ଠ ଫର୍ମରେ ଅଛି। ବ୍ୟାଟିଂ ଓ ବୋଲିଂ- ଉଭୟ ବିଭାଗରେ ଭାରତୀୟ ଦଳ ବେଶ୍ ମଜବୁତ ସ୍ଥିତିରେ ରହିଛି। ଦଳର ପ୍ରତ୍ୟେକ ଖେଳାଳି ନିଜ ଦାୟିତ୍ୱ ସଠିକ୍ ଭାବେ ତୁଲାଉଛନ୍ତି। ପ୍ରକାଶଯୋଗ୍ୟ ଯେ, ଦୀପ୍ତି ଚଳିତ ଟୁର୍ନାମେଣ୍ଟରେ ଭାରତର ସଫଳତମ ୱିକେଟ୍ଟେକର୍ ଭାବେ ଶୀର୍ଷରେ ରହିଛନ୍ତି।