ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁବାଇରୁ ଇସ୍ରାଏଲ ଯାଉଥିବା ଫ୍ଲାଏଦୁବାଇ ବିମାନକୁ ଦୁର୍ଘଟଣାରୁ ରକ୍ଷା କରିଥିବା ଭାରତୀୟ କ୍ୟାପ୍ଟେନ୍ ସ୍ମିତ ମାଛରଙ୍କ ସାହସିକତାକୁ ପ୍ରଶଂସା କରିଛନ୍ତି। ଇନଷ୍ଟାଗ୍ରାମରେ ଏକ ପୋଷ୍ଟରେ ମୋଦି କ୍ୟାପ୍ଟେନ୍ ମାଛରଙ୍କୁ “ହିରୋ” ବୋଲି ଅଭିହିତ କରିଛନ୍ତି ଏବଂ କହିଛନ୍ତି ଯେ, ଅତ୍ୟନ୍ତ ବିପଜ୍ଜନକ ପରିସ୍ଥିତିରେ ଗୁରୁତର ଆହତ ହେବା ସତ୍ତ୍ୱେ ସେ ଅନ୍ୟମାନଙ୍କୁ ରକ୍ଷା କରିବା ପାଇଁ ପ୍ରଚଣ୍ଡ ସାହସ ଏବଂ ଅଟଳ ସଂକଳ୍ପ ପ୍ରଦର୍ଶନ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ତାଙ୍କ ସାହସିକତା ଶହ ଶହ ଜୀବନ ବଞ୍ଚାଇଛି ଏବଂ ଏକ ବଡ଼ ଦୁର୍ଘଟଣାକୁ ଏଡ଼ାଇ ଦେଇଛି। ସେ କହିଛନ୍ତି ଯେ, କ୍ୟାପ୍ଟେନ୍ ମାଛରଙ୍କ ଉପରେ ଭାରତ ଗର୍ବିତ ଏବଂ ତାଙ୍କ ଶୀଘ୍ର ଆରୋଗ୍ୟ କାମନା କରୁଛି।
କପ୍ଟେନ୍ ସ୍ମିତ ମାଛରଙ୍କୁ ଭାରତୀୟ ପାଇଲଟ୍ ଭାବରେ ଚିହ୍ନଟ କରାଯାଇଛି ଯିଏ ବୁଧବାର, ସେପ୍ଟେମ୍ବର ୩୦ ତାରିଖରେ ଫ୍ଲାଏଦୁବାଇ ବିମାନର କକ୍ପିଟ୍ରେ ଏକ କଥିତ ଅପହରଣ ପ୍ରୟାସକୁ ପଣ୍ଡ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସୂଚନା ଅନୁଯାୟୀ, ଫ୍ଲାଇଟ୍ FZ 1073 ର କକ୍ପିଟ୍ରେ ବିଶୃଙ୍ଖଳା ସୃଷ୍ଟି ହୋଇଥିଲା ଯେତେବେଳେ ଜଣେ ଓମାନି ପାଇଲଟ୍ ବିମାନକୁ ଅପହରଣ କରି ଦୁର୍ଘଟଣାଗ୍ରସ୍ତ କରିବାକୁ ଚେଷ୍ଟା କରିଥିଲେ।
ଏହି ସମୟରେ ଦୁଇ ପାଇଲଟଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା ଏବଂ କ୍ୟାପ୍ଟେନ ମାଛରଙ୍କୁ ଛୁରୀରେ ଆକ୍ରମଣ କରାଯାଇଥିଲା। ସେ ଗୁରୁତର ଆହତ ହୋଇଥିଲେ। ଏହା ସତ୍ତ୍ୱେ, ସେ କକପିଟ୍ ଦ୍ୱାର ଖୋଲିବାରେ ସଫଳ ହୋଇଥିଲେ, ଯାହା ଫଳରେ ଯାତ୍ରୀମାନେ ପ୍ରବେଶ କରି ପରିସ୍ଥିତିକୁ ନିୟନ୍ତ୍ରଣ କରିପାରିବେ।
ତେଲ ଅଭିଭରେ ବିମାନ ଅବତରଣ କରିବା ପରେ ଯାତ୍ରୀମାନେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ଘଟଣା ବିଷୟରେ ଜଣାଇଥିଲେ। ଯାତ୍ରୀମାନଙ୍କ ଅନୁଯାୟୀ, ଆହତ କ୍ୟାପ୍ଟେନ ମାଛର କକପିଟ୍ ଦ୍ୱାର ଖୋଲି ଦେଇଥିଲେ। ତା’ପରେ ଯାତ୍ରୀମାନେ ଭିତରକୁ ପ୍ରବେଶ କରି ଅନ୍ୟ ପାଇଲଟଙ୍କୁ କାବୁ କରିଥିଲେ।
ଯାତ୍ରୀ ଭାବରେ ବିମାନରେ ଥିବା ଅନ୍ୟ ଦୁଇ ପାଇଲଟ ବିମାନକୁ ନିୟନ୍ତ୍ରଣରେ ନେଇଥିଲେ। ଏବଂ ବିମାନକୁ ସାଉଦି ଆରବ ଆଡକୁ ନେଇଥିଲେ ଏବଂ ଜରୁରୀକାଳୀନ ଅବତରଣ କରିଥିଲେ। ସୂଚନା ଅନୁଯାୟୀ, ଏହି ଘଟଣାରେ କ୍ୟାପ୍ଟେନ ମାଛରଙ୍କ ଆଘାତ ପାଇଁ ଅସ୍ତ୍ରୋପଚାର କରାଯାଇଛି।
ଉଲ୍ଲେଖ ଯୋଗ୍ୟ ଯେ, କ୍ୟାପ୍ଟେନ ସ୍ମିତ୍ ମାଛର ୨୦୨୨ ମସିହାରୁ ଫ୍ଲାଏଦୁବାଇରେ କ୍ୟାପ୍ଟେନ ଭାବରେ କାର୍ଯ୍ୟ କରୁଛନ୍ତି। ଏହା ପୂର୍ବରୁ, ସେ ପ୍ରାୟ ୧୧ ବର୍ଷ ଧରି ସ୍ପାଇସଜେଟ୍ ପାଇଁ କାର୍ଯ୍ୟ କରିଥିଲେ, ବରିଷ୍ଠ କମାଣ୍ଡର ପଦବୀରେ ଥିଲେ।
ମାଛର ଜଣେ ଲାଇନ ଟ୍ରେନିଂ କ୍ୟାପ୍ଟେନ୍ ଭାବରେ ମଧ୍ୟ କାର୍ଯ୍ୟ କରିଛନ୍ତି। ଏହି ଭୂମିକାରେ ତାଙ୍କର ପାଇଲଟ୍ ମାନଙ୍କର ତାଲିମ, ମାର୍ଗଦର୍ଶନ ଏବଂ କ୍ଷମତା ମୂଲ୍ୟାଙ୍କନର ଅଭିଜ୍ଞତା ଅଛି।