ନୂଆଦିଲ୍ଲୀ: ଆମେରିକାର ବୈଦେଶିକ ସଚିବ ମାର୍କୋ ରୁବିଓ ଆସନ୍ତା ଅକ୍ଟୋବର ୧୭ ରୁ ୨୨ ପର୍ଯ୍ୟନ୍ତ ଭାରତ ଏବଂ ଉଜବେକିସ୍ତାନ ଗସ୍ତରେ ଆସୁଛନ୍ତି। ଏହି ଗସ୍ତ ସମୟରେ ସେ ମୁମ୍ବାଇ ଏବଂ ଜାମନଗର ଗସ୍ତ କରିବେ। ଭାରତ ଓ ଆମେରିକା ମଧ୍ୟରେ ଦ୍ୱିପାକ୍ଷିକ ରଣନୈତିକ ସମ୍ପର୍କକୁ ଆହୁରି ମଜବୁତ କରିବା ଏବଂ ଶକ୍ତି ସହଯୋଗକୁ ବୃଦ୍ଧି କରିବା ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ବୋଲି ଜଣାପଡ଼ିଛି। ଆମେରିକା ବୈଦେଶିକ ବିଭାଗ ପକ୍ଷରୁ ଏହି ସୂଚନା ଦିଆଯାଇଛି। ରୁବିଓ ଭାରତ ଆସିବା ପୂର୍ବରୁ ଉଜବେକିସ୍ତାନର ସମରକନ୍ଦ ଗସ୍ତ କରିବେ। ଚଳିତ ବର୍ଷରେ ଏହା ତାଙ୍କର ଦ୍ୱିତୀୟ ସରକାରୀ ଭାରତ ଗସ୍ତ ହେବ। ଭାରତରେ ରହଣି ସମୟରେ ସେ ବରିଷ୍ଠ ସରକାରୀ ଅଧିକାରୀମାନଙ୍କୁ ଭେଟି ଦ୍ୱିପାକ୍ଷିକ ସହଯୋଗ, ଆଞ୍ଚଳିକ ଏବଂ ବିଶ୍ୱସ୍ତରୀୟ ପରିସ୍ଥିତି ତଥା ଶକ୍ତି କ୍ଷେତ୍ରରେ ସହଯୋଗ ବୃଦ୍ଧି ନେଇ ଆଲୋଚନା କରିବେ। ଏହାସହ ବ୍ୟବସାୟୀ ନେତାମାନଙ୍କୁ ଭେଟି ଦୁଇ ଦେଶ ମଧ୍ୟରେ ପୁଞ୍ଜିନିବେଶ ଓ ଅର୍ଥନୈତିକ ସହଯୋଗର ସୁଯୋଗ ସମ୍ପର୍କରେ ବିଚାରବିମର୍ଶ କରିବାର କାର୍ଯ୍ୟକ୍ରମ ରହିଛି। ଉଜବେକିସ୍ତାନ ଗସ୍ତ ସମୟରେ ସେ ‘C5+1’ ମନ୍ତ୍ରୀସ୍ତରୀୟ ବୈଠକରେ ଯୋଗଦେବେ ଏବଂ ଆମେରିକା ସହ କେନ୍ଦ୍ରୀୟ ଏସିଆର ପାଞ୍ଚଟି ଦେଶର ରଣନୈତିକ ସହଯୋଗ ଉପରେ ଆଲୋକପାତ କରିବେ। ଏହି ଗସ୍ତରେ ଆମେରିକାରୁ ୨୦୦ରୁ ଅଧିକ ବ୍ୟବସାୟୀଙ୍କ ଏକ ପ୍ରତିନିଧି ଦଳ ମଧ୍ୟ ସାମିଲ ରହିଛନ୍ତି।
