ରିୟାଦ: ପଶ୍ଚିମ ଏସିଆରେ ସାଉଦି ଆରବ ଏବଂ ଇରାନ୍ ସମର୍ଥିତ ହୁତି ବିଦ୍ରୋହୀଙ୍କ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଛି। ସୌଦୀ ଆରବର ଗୁରୁତ୍ୱପୂର୍ଣ୍ଣ ତୈଳ ପ୍ରତିଷ୍ଠାନ, ଶୋଧନାଗାର ଏବଂ ବିମାନବନ୍ଦରଗୁଡ଼ିକୁ ଲକ୍ଷ୍ୟ କରି ହୁତି ସଂଗଠନ ପକ୍ଷରୁ ବ୍ୟାପକ କ୍ଷେପଣାସ୍ତ୍ର ଓ ଡ୍ରୋନ୍ ଆକ୍ରମଣ କରାଯାଇଛି। ଏହି ସଂଘର୍ଷ ମଧ୍ୟରେ ସାଉଦି ସୁରକ୍ଷା ବାହିନୀ ଆକାଶମାର୍ଗରୁ କ୍ଷେପଣାସ୍ତ୍ରଗୁଡ଼ିକୁ ନିଷ୍କ୍ରିୟ କରିବା ପରେ ସେଗୁଡ଼ିକର ଭଗ୍ନାବଶେଷ ପବିତ୍ର ସହର ମକ୍କା ଏବଂ ମଦିନାର କିଛି ଅଞ୍ଚଳରେ ଖସିପଡ଼ିଥିବା ସୂଚନା ମିଳିଛି। ତେବେ ହୁତି ସଂଗଠନ ଏହି ପବିତ୍ର ସହରଗୁଡ଼ିକୁ ଲକ୍ଷ୍ୟ କରି ଆକ୍ରମଣ କରିଥିବା ଅଭିଯୋଗକୁ ସମ୍ପୂର୍ଣ୍ଣ ମିଥ୍ୟା ବୋଲି କହି ଅସ୍ୱୀକାର କରିଛି।
ହୁତି ସେନାର ପ୍ରବକ୍ତା ୟାହ୍ୟା ସାରିଙ୍କ କହିବା ଅନୁଯାୟୀ, ସୌଦୀ ଆରବର ୟାନବୁଠାରେ ଥିବା ତୈଳ ପ୍ରତିଷ୍ଠାନ, ରାବିଗ୍ ତୈଳ ଶୋଧନାଗାର ଏବଂ ରାଜଧାନୀ ରିୟାଧ ସ୍ଥିତ କିଙ୍ଗ ଖାଲିଦ୍ ଆନ୍ତର୍ଜାତୀୟ ବିମାନବନ୍ଦରକୁ ଲକ୍ଷ୍ୟ କରି ଏହି ଆକ୍ରମଣ କରାଯାଇଛି। ରିୟାଧ ବିମାନବନ୍ଦର ସମେତ ପୂର୍ବପଟେ ଥିବା ଦାମାମ ଏବଂ ଦକ୍ଷିଣପଟେ ଥିବା ନଜରାନ ବିମାନବନ୍ଦର ଉପରେ ଦୁଇଟି ପର୍ଯ୍ୟାୟରେ କ୍ଷେପଣାସ୍ତ୍ର ମାଡ଼ କରାଯାଇଥିଲା। ଏହାସହିତ ୟେମେନର ଆଡେନ ବନ୍ଦର ସହରରେ ଥିବା ଉପକୂଳ ସୁରକ୍ଷା ବାହିନୀର ଆଡ୍ଡାଗୁଡ଼ିକ ଉପରେ ମଧ୍ୟ ହୁତି ସଂଗଠନ ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଥିବା ୟେମେନ୍ ସରକାର ସୂଚନା ଦେଇଛନ୍ତି।
ସାଉଦି ଆରବର ବେସାମରିକ ସୁରକ୍ଷା ବିଭାଗ ପକ୍ଷରୁ କୁହାଯାଇଛି ଯେ, ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ରକୁ ଆକାଶମାର୍ଗରେ ରୋକାଯିବା ପରେ ସେଗୁଡ଼ିକର କ୍ଷତିକାରକ ଭଗ୍ନାବଶେଷ ମକ୍କା ଓ ମଦିନା ଅଞ୍ଚଳରେ ଖସିଥିଲା, ଯାହାର ସୁରକ୍ଷିତ ହଟାଇବା କାର୍ଯ୍ୟ ଜାରି ରହିଛି। ମକ୍କା ବାହାରେ ଥିବା ୱାଡି ମୁଘାମାସ ଅଞ୍ଚଳରେ ମଧ୍ୟ କିଛି ଭଗ୍ନାବଶେଷ ଖସିଥିବା ନିଶ୍ଚିତ କରାଯାଇଛି।
ହୁତି ପକ୍ଷରୁ କୁହାଯାଇଛି ଯେ, ସାଉଦି ଆରବ ଦ୍ୱାରା ୟେମେନର ସାନା, ସିମେଣ୍ଟ କାରଖାନା ଶ୍ରମିକଙ୍କ ରହିବା ସ୍ଥାନ ଏବଂ ହୋଦେଇଦା ଅଞ୍ଚଳରେ କରାଯାଇଥିବା ବିମାନ ଆକ୍ରମଣରେ ୧୭ ଜଣ ନିରୀହ ଲୋକଙ୍କ ଜୀବନ ଯାଇଥିଲା। ଏହାର ପ୍ରତିଶୋଧ ନେବା ପାଇଁ ହୁତି ବିଦ୍ରୋହୀମାନେ ସୌଦୀ ଆରବର ଅର୍ଥନୈତିକ ଏବଂ ବିମାନ ସେବା କ୍ଷେତ୍ରକୁ ଲକ୍ଷ୍ୟ କରି ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।
ଏହି ବଡ଼ ଧରଣର ଆକ୍ରମଣ ଓ ଧମକ ପରେ ରିୟାଦ ବିମାନବନ୍ଦରକୁ ହୁତି ସଂଗଠନ ଏକ ସାମରିକ ଲକ୍ଷ୍ୟ ଭାବେ ଘୋଷଣା କରି ଯାତ୍ରୀ, ବିମାନ କମ୍ପାନୀ ଏବଂ କର୍ମଚାରୀମାନଙ୍କୁ ସେଠାକୁ ନଯିବା ପାଇଁ ସାବଧାନ କରିଦେଇଛି। ପୂର୍ବରୁ ଅକ୍ଟୋବର ୧୦ରେ ହୋଇଥିବା ଆକ୍ରମଣରେ ୧୩ ଜଣଙ୍କ ମୃତ୍ୟୁ ଏବଂ ୩୦୦ରୁ ଅଧିକ ଆହାତ ହେବା ପରେ ବିମାନ ସେବା ବାଧାପ୍ରାପ୍ତ ହୋଇଥିଲା। ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଏୟାର ଇଣ୍ଡିଆ ପକ୍ଷରୁ ବିମାନ ସେବା ସ୍ଥଗିତ ରଖାଯିବା ସହ ଯାତ୍ରୀମାନଙ୍କ ପାଇଁ ସ୍ୱତନ୍ତ୍ର ନିୟମ ଓ ଯାତ୍ରା ବାତିଲ ଫେରସ୍ତର ସୁବିଧା ଘୋଷଣା କରାଯାଇଛି। ସମଗ୍ର ସୀମାନ୍ତ ଅଞ୍ଚଳରେ ଏବେ ପ୍ରଚଣ୍ଡ ଯୁଦ୍ଧକାଳୀନ ଉତ୍ତେଜନା ପ୍ରକାଶ ପାଇଛି।