ନୂଆଦିଲ୍ଲୀ: ମିଳିତ ଜାତିସଂଘ ସୁରକ୍ଷା ପରିଷଦରେ ଭାରତ ସାମୁଦ୍ରିକ ସୁରକ୍ଷା, ଜାହାଜ ଚଳାଚଳର ସ୍ୱାଧୀନତା ଓ ବିଶ୍ୱ ବାଣିଜ୍ୟ ସୁରକ୍ଷା ପ୍ରସଙ୍ଗରେ ନିଜ ଆଭିମୁଖ୍ୟ ରଖିଛି। ମିଳିତ ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ହରୀଶ ପର୍ବତାନେନୀ ବାଣିଜ୍ୟିକ ଜାହାଜ ଉପରେ ହେଉଥିବା ଆକ୍ରମଣକୁ କଡ଼ା ନିନ୍ଦା କରିଛନ୍ତି।
ସେ କହିଛନ୍ତି ଯେ, ବିଶ୍ୱ ବାଣିଜ୍ୟ ବହୁ ପରିମାଣରେ ସାମୁଦ୍ରିକ ପଥ ଉପରେ ନିର୍ଭରଶୀଳ। ତେଣୁ ସମୁଦ୍ରରେ ଜାହାଜର ନିର୍ଭୟ ଓ ନିର୍ବାଧ ଚଳାଚଳ ଜରୁରୀ। ମୁଖ୍ୟ ସାମୁଦ୍ରିକ ମାର୍ଗରେ ଆକ୍ରମଣ ବା ବାଧା ସୃଷ୍ଟି ହେଲେ କେବଳ ଗୋଟିଏ ଦେଶ ନୁହେଁ, ସମଗ୍ର ବିଶ୍ୱ ଅର୍ଥନୀତି, ଯୋଗାଣ ଶୃଙ୍ଖଳା ଓ ବିକାଶଶୀଳ ଦେଶ ପ୍ରଭାବିତ ହେବେ।
ନାବିକ ସୁରକ୍ଷା ସର୍ବୋପରି: ଭାରତ କହିଛି ଯେ, ସମୁଦ୍ରରେ କାମ କରୁଥିବା ନାବିକଙ୍କ ଜୀବନ ସୁରକ୍ଷା ସବୁଠୁ ଗୁରୁତ୍ୱପୂର୍ଣ୍ଣ। ଏଥିପାଇଁ ସମସ୍ତ ଦେଶ UNCLOS ଭଳି ଆନ୍ତର୍ଜାତିକ ନିୟମ ପାଳନ କରିବା ଜରୁରୀ।
ନୂଆ ଟେକ୍ନୋଲୋଜିର ଲାଭ-କ୍ଷତି: AI, ସାଟେଲାଇଟ୍ ଓ ନୂଆ ପ୍ରଯୁକ୍ତି ସାମୁଦ୍ରିକ ସୁରକ୍ଷା ଓ ଜାହାଜ ନିରୀକ୍ଷଣକୁ ମଜଭୁତ କରିପାରିବ। ସାମୁଦ୍ରିକ ଦୁର୍ଘଟଣାରେ ଉଦ୍ଧାର କାର୍ଯ୍ୟ ସହଜ ହେବ। ହେଲେ ଏହାର ଅପବ୍ୟବହାର ବା ଜାହାଜ-ବନ୍ଦରର ଡିଜିଟାଲ ସିଷ୍ଟମ ଉପରେ ସାଇବର ଆକ୍ରମଣ ବଡ଼ ବିପଦ ସୃଷ୍ଟି କରିପାରେ।
ଭାରତର ଭିଜନ: ଭାରତର ନୀତି SAGAR – Security and Growth for All in the Region ଅର୍ଥାତ୍ ଅଞ୍ଚଳରେ ସମସ୍ତଙ୍କ ସୁରକ୍ଷା ଓ ବିକାଶ ଉପରେ ଆଧାରିତ। ପ୍ରଯୁକ୍ତି ମାନବିକତାର ସୁରକ୍ଷା ଓ ସୁଯୋଗ ବୃଦ୍ଧି ପାଇଁ ବ୍ୟବହାର ହେଉ, ଦେଶ ମଧ୍ୟରେ ବିବାଦ ନୁହେଁ।