ନୂଆଦିଲ୍ଲୀ: ଭାରତୀୟ ସାମୁଦ୍ରିକ ମତ୍ସ୍ୟ ରପ୍ତାନିକୁ ୟୁରୋପୀୟ ସଂଘର ସଂଶୋଧିତ ଆଇୟୁୟୁ ନିୟମ ଅନୁଯାୟୀ କରିବା ପାଇଁ ଏମ୍ପିଇଡିଏ ପକ୍ଷରୁ ନୂତନ କ୍ୟାଚ୍ ସାର୍ଟିଫିକେସନ୍ ବ୍ୟବସ୍ଥା ଆରମ୍ଭ କରାଯାଇଛି।
ବେଆଇନ୍, ଅନିୟମିତ ଏବଂ ଅନିୟନ୍ତ୍ରିତ ମାଛଧରା ରୋକିବା ପାଇଁ ୟୁରୋପୀୟ ସଂଘ ୧ ଜାନୁଆରୀ ୨୦୧୦ ରୁ କ୍ୟାଚ୍ ସାର୍ଟିଫିକେଟ୍ ବ୍ୟବସ୍ଥା ଲାଗୁ କରିଛି। ଏଥିପାଇଁ ଇୟୁ ନିୟମାବଳୀ ୧୦୦୫/୨୦୦୮ ଅନୁଯାୟୀ ଭାରତ ସରକାର ଏମ୍ପିଇଡିଏକୁ ଏହି ସାର୍ଟିଫିକେଟ୍ ଦେବା ପାଇଁ ଅଧିକୃତ କରିଛନ୍ତି। ୧ ଏପ୍ରିଲ ୨୦୧୯ ରୁ ସମ୍ପୂର୍ଣ୍ଣ ଡିଜିଟାଲ୍ ସ୍ୱାକ୍ଷର ଆଧାରିତ ବ୍ୟବସ୍ଥା ଚାଲୁ ରହିଛି।ନୂଆ ନିୟମ ଅନୁଯାୟୀ, ଏବେ “ଉପରି ଢାଞ୍ଚା ବିହୀନ ମାଛଧରା ଜାହାଜ” ବ୍ୟବସ୍ଥା ଉଚ୍ଛେଦ କରାଯାଇଛି। ଏବେ ୟୁରୋପୀୟ ସଂଘକୁ ରପ୍ତାନି ହେବାକୁ ଥିବା ପ୍ରତ୍ୟେକ ମାଛଧରା ପୋତ ପାଇଁ ପୃଥକ୍ କ୍ୟାଚ୍ ସାର୍ଟିଫିକେଟ୍ ଲୋଡ଼ା ହେବ। ସେଥିରେ ମାଛଧରା ଜାହାଜର ମୁଖ୍ୟଚାଳକଙ୍କ ସ୍ୱାକ୍ଷର, ଯାତ୍ରା ତାରିଖ, ବ୍ୟବହୃତ ଉପକରଣର ବିବରଣୀ ଏବଂ ଲାଇସେନ୍ସର ବୈଧତା ଭଳି ତଥ୍ୟ ଦେବାକୁ ପଡ଼ିବ। ୧୦ ଜାନୁଆରୀ ୨୦୨୬ ରୁ ଲାଗୁ ହୋଇଥିବା ପ୍ରୋସେସିଂ ଷ୍ଟେଟ୍ମେଣ୍ଟ୍ ଆବଶ୍ୟକତା ପୂର୍ବରୁ ହିଁ ପୂରଣ କରାଯାଇଛି।
ଏଥିପାଇଁ ଏମ୍ପିଇଡିଏ ଏକ ସ୍ୱତନ୍ତ୍ର ଡିଜିଟାଲ୍ ପ୍ଲାଟଫର୍ମ ଏବଂ ମୋବାଇଲ୍ ଆପ୍ ବିକାଶ କରିଛି। ଏହା ମାଧ୍ୟମରେ ମାଛଧରା ତଥ୍ୟର ଟ୍ରେସେବିଲିଟି ଅନ୍ଲାଇନ୍ କ୍ୟାଚ୍ ପୋର୍ଟାଲ୍ ସହ ଯୋଡ଼ାଯିବ। ବ୍ରିଟେନ୍ ମଧ୍ୟ ସମାନ ନିୟମ ପାଳନ କରୁଥିବାରୁ ବ୍ରିଟେନ୍ କୁ ରପ୍ତାନି ପାଇଁ ମଧ୍ୟ ଏହି ସାର୍ଟିଫିକେଟ୍ ଜରୁରୀ ହେବ।୨୦୨୫-୨୬ ଆର୍ଥିକ ବର୍ଷରେ ଭାରତ ୟୁରୋପୀୟ ସଂଘ ଓ ବ୍ରିଟେନ୍କୁ ୨,୯୭,୫୧୮ ମେଟ୍ରିକ୍ ଟନ୍ ସାମୁଦ୍ରିକ ମତ୍ସ୍ୟ ଉତ୍ପାଦ ରପ୍ତାନି କରିଥିଲା, ଯାହାର ମୂଲ୍ୟ ୧୫୯୨.୦୯ ନିୟୁତ ଡଲାର (୧୩,୯୩୫ କୋଟି ଟଙ୍କା) ଥିଲା। ଏହା ଭାରତର ମୋଟ ରପ୍ତାନିର ୧୫% ପରିମାଣ ଏବଂ ୧୮.୮୩% ମୂଲ୍ୟ ଅଟେ। ସେଥିରୁ ସମୁଦ୍ରରୁ ପ୍ରାକୃତିକ ଭାବେ ସଂଗୃହୀତ ମତ୍ସ୍ୟ ଉତ୍ପାଦର ଅଂଶ ପରିମାଣରେ ୧୬% ଏବଂ ମୂଲ୍ୟରେ ୨୭% ଥିଲା।
ଏହି ନୂଆ ବ୍ୟବସ୍ଥା ଦ୍ୱାରା ଭାରତର ରପ୍ତାନି ବଜାର ଅଂଶ ବଜାୟ ରହିବା ସହ ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି।