ନୂଆଦିଲ୍ଲୀ : ବ୍ରିଟେନରେ ଟିକାକରଣ ଆରମ୍ଭ ହୋଇଛି । ଫାଇଜର ଟିକାକୁ ବ୍ରିଟେନ ସରକାର ଅନୁମତି ପ୍ରଦାନ କରିଥିବା ବେଳେ ଏହି ଟିକାକୁ ନେଇ ଏକ ନୂତନ ସମସ୍ୟା ସମ୍ମୁଖକୁ ଆସିଛି । ଫାଇଜର ଟିକା ନେଇ ଦୁଇ ଜଣ ବ୍ୟକ୍ତି ଅସୁସ୍ଥ ହୋଇଥିବାର ଖବର ସମ୍ମୁଖକୁ ଆସିଛି । ଏହି ଘଟଣା ସମ୍ମୁଖକୁ ଆସିବା ପରେ ବ୍ରିଟେନ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ଚେତାବନୀ ଜାରି କରାଯାଇଛି । ଅସୁସ୍ଥ ହୋଇଥିବା ଦୁଇ ବ୍ୟକ୍ତି ସ୍ୱାସ୍ଥ୍ୟ କର୍ମୀ ଏବଂ ଟିକା ନେବାର 24 ଘଣ୍ଟା ମଧ୍ୟରେ ଉଭୟ ଅସୁସ୍ଥ ହୋଇ ପଡିଥିଲେ । ଉଭୟ ସ୍ୱାସ୍ଥ୍ୟକର୍ମୀଙ୍କ ଅବସ୍ଥା ସୁଧୁରୁଥିବା ନେଇ ବ୍ରିଟେନ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ପ୍ରକାଶ ପାଇଛି । ଭ୍ୟାକ୍ସିନ୍ କାରଣରୁ ଦୁହିଁଙ୍କର ଆର୍ଲଜି ରିଆକ୍ସନ ହୋଇଥିବାର ସୂଚନା ଦେଇଛି ବ୍ରିଟେନ୍ର ନ୍ୟାସନାଲ୍ ହେଲ୍ଥ ସର୍ଭିସ୍ । ଏହାପରେ ଯେଉଁମାନଙ୍କର ମେଡିସିନ୍ ଅଥବା ଖାଦ୍ୟ ଓ ଭ୍ୟାକସିନ୍କୁ ନେଇ ଆଲର୍ଜି ରହିଥିବା ବ୍ୟକ୍ତିଙ୍କୁ ଫାଇଜର ଟୀକା ନ ଲଗାଇବାକୁ ସ୍ବାସ୍ଥ୍ୟ ବିଭାଗ ଚେତାବନୀ ଜାରି କରିଛି । ବ୍ରିଟେନ୍ରେ ପ୍ରତ୍ୟେକ ଦିନ 5000ରୁ 7000 ଲୋକଙ୍କୁ ଟିକ ଦିଆଯାଉଛି।
ଏହି ଘଟଣା ଉପରେ ଭାରତର ସ୍ୱାସ୍ଥ୍ୟ ଓ ପରିବାର ମନ୍ତ୍ରାଳୟ ନଜର ରଖିଛି । ଏହା ପୂର୍ବରୁ ଡିସେମ୍ବର ଚାରି ତାରିଖରେ ଡିସିଜିଆଇ ନିକଟରେ ଟିକାର ଜରୁରୀକାଳୀନ ଅନୁମତି ପାଇଁ ଆବେଦନ କରାଯାଇଥିଲା । ଭାରତରେ କୌଣସି ଟିକାର ବ୍ୟବହାର ପାଇଁ ରହିଥିବା ନିୟମ ଫାଇଜର ପାଳନ କରିନାହିଁ । ଭାରତରେ ଟିକାର କ୍ଲିନିକାଲ ଟ୍ରାଏଲ ହୋଇନଥିବା କାରଣରୁ ଏହି ଟିକାକୁ ଅନୁମତି ମିଳିବା ଅସମ୍ଭବ ମନେ ହେଉଥିବା ବେଳେ ଅସୁସ୍ଥତା ଘଟଣା ଏହି ଆଶଙ୍କାକୁ ଆହୁରି ଦୃଢୀଭୂ୍ତ କରିଛି।
ଉଲ୍ଲେଖଯୋଗ୍ୟ ଯେ, ଆମେରିକୀୟ କମ୍ପାନୀ ଫାଇଜର ଏବଂ ଜର୍ମାନୀ କମ୍ପାନୀ ବାୟୋଏନଟେକ୍ ପକ୍ଷରୁ ଫାଇଜର ଟିକା ନିର୍ମାଣ କରାଯାଇଛି । ଟିକାର ତୃତୀୟ ପର୍ଯ୍ୟାୟ ପରୀକ୍ଷଣ ସୁଦ୍ଧା ଟିକାଟି 95 ପ୍ରତିଶତ ଫଳପ୍ରଦ ସାବ୍ୟସ୍ତ ହୋଇଥିଲା । ତେବେ ଏହି ଟିକାର ମୁଲ୍ୟ ଅପେକ୍ଷାକୃତ ଅଧିକ ହୋଇଥିବାରୁ ଭାରତୀୟ ବଜାରରେ ଏହାର ଉପଯୋଗିତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । (ଏଜେନ୍ସି)
