ବର୍ଷା ଋତୁ ଗରମରୁ ଆରାମ ଦେଇଥାଏ, ପ୍ରକୃତିକୁ ସବୁଜରେ ଭରିଦିଏ। କିନ୍ତୁ ଏହି ସୁନ୍ଦର ଋତୁ ସହ ଆସିଥାଏ କେଶର କିଛି ସାଧାରଣ ସମସ୍ୟା। ବର୍ଷା ଆରମ୍ଭ ହେବା ମାତ୍ରେ ଅନେକ ଲୋକ କେଶ ଝଡ଼ିବା, କେଶ ଜଟିଳ ହେବା, ଫ୍ରିଜ୍ ହୋଇଥିବା ଏବଂ ମୁଣ୍ଡରେ କୁଣ୍ଡିଆ ହେବା ଭଳି ସମସ୍ୟାର ସମ୍ମୁଖୀନ ହୁଅନ୍ତି।
ବିଶେଷଜ୍ଞମାନଙ୍କ ମତରେ, ବାୟୁରେ ବଢ଼ିଥିବା ଆର୍ଦ୍ରତା, ଧୂଳି ଏବଂ ପ୍ରଦୂଷଣର ପ୍ରଭାବରେ କେଶର ମୂଳ ଦୁର୍ବଳ ହୋଇପାରେ। ଫଳରେ କେଶ ଝଡ଼ିବା ଏବଂ ଭାଙ୍ଗିବାର ସମସ୍ୟା ବଢ଼ିଯାଏ। ତେବେ ବର୍ଷା ଋତୁ ଆସିବା ପୂର୍ବରୁ କିଛି ସରଳ ଅଭ୍ୟାସ ଅପଣାଇଲେ ଏହି ସମସ୍ୟାକୁ ଅନେକ ମାତ୍ରାରେ ନିୟନ୍ତ୍ରଣ କରାଯାଇପାରିବ।
ବର୍ଷା ଋତୁରେ ମୁଣ୍ଡରେ ତେଲ, ଧୂଳି ଏବଂ ମଇଳା ଶୀଘ୍ର ଜମା ହୁଏ। ଏହା କେଶ ମୂଳକୁ ଦୁର୍ବଳ କରିପାରେ। ତଥାପି ପ୍ରତିଦିନ ସାମ୍ପୁ କରିବା ସମାଧାନ ନୁହେଁ। ବିଶେଷଜ୍ଞମାନେ ସପ୍ତାହକୁ ଦୁଇଥର ମୃଦୁ ସାମ୍ପୁ ବ୍ୟବହାର କରି କେଶ ଧୋଇବାକୁ ପରାମର୍ଶ ଦେଇଥାନ୍ତି। ଏହା ମୁଣ୍ଡକୁ ସଫା ରଖିବା ସହ କେଶର ପ୍ରାକୃତିକ ଆର୍ଦ୍ରତାକୁ ମଧ୍ୟ ବଜାୟ ରଖେ।
କେଶ ଧୋଇବା ପରେ ଟାୱେଲରେ ଜୋରରେ ଘଷିବା ପରିବର୍ତ୍ତେ ଧୀରେ ଧୀରେ ଶୁଖାଇବା ଉଚିତ।
ଅନେକେ ତରତରରେ ଓଦା କେଶକୁ ବାନ୍ଧି ଦିଅନ୍ତି। କିନ୍ତୁ ଏହା କେଶ ପାଇଁ କ୍ଷତିକାରକ ହୋଇପାରେ। ଓଦା କେଶ ସାଧାରଣ ସମୟ ଅପେକ୍ଷା ଅଧିକ ଦୁର୍ବଳ ଥାଏ ଏବଂ ସହଜରେ ଭାଙ୍ଗିଯାଏ।
ଏହାସହ ଦୀର୍ଘ ସମୟ ପର୍ଯ୍ୟନ୍ତ ମୁଣ୍ଡରେ ଆର୍ଦ୍ରତା ରହିଲେ ଫଙ୍ଗାଲ୍ ସଂକ୍ରମଣର ଆଶଙ୍କା ମଧ୍ୟ ବଢ଼ିଥାଏ। ସେଥିପାଇଁ କେଶକୁ ସମ୍ପୂର୍ଣ୍ଣ ଶୁଖିବା ପରେ ହିଁ ବାନ୍ଧିବା ଭଲ।
ବର୍ଷା ଋତୁରେ କେଶ ଅଧିକ ଜଟ ହୋଇଯାଏ। ଏପରି ସମୟରେ ଜୋର କରି କେଶ କୁଣ୍ଡାଇଲେ କଲେ କେଶ ଭାଙ୍ଗିପାରେ। ଏଥିପାଇଁ ଚଉଡ଼ା ଦାନ୍ତ ଥିବା ପାନିଆ ବ୍ୟବହାର କଲେ କେଶ ଉପରେ କମ୍ ଚାପ ପଡ଼େ ଏବଂ ଭାଙ୍ଗିବାର ସମ୍ଭାବନା କମିଯାଏ। ସେହିପରି ସଂକ୍ରମଣ କିମ୍ବା ଉକୁଣି ସମସ୍ୟାରୁ ବଞ୍ଚିବା ପାଇଁ ନିଜ ପାନିଆ ଅନ୍ୟମାନଙ୍କ ସହ ସେୟାର କରିବା ଉଚିତ ନୁହେଁ।
ମଜବୁତ ଏବଂ ସୁସ୍ଥ କେଶ ପାଇଁ ନିୟମିତ ତେଲ ମାଲିସ୍ ବହୁତ ଉପକାରୀ। ସପ୍ତାହକୁ ଅତି କମରେ ଥରେ ନଡ଼ିଆ, ବାଦାମ କିମ୍ବା ଅନ୍ୟ କେଶ ତେଲ ସହ ମୁଣ୍ଡର ହାଲୁକା ମାଲିସ୍ କରନ୍ତୁ।
ଏହା ମୁଣ୍ଡରେ ରକ୍ତସଞ୍ଚାଳନକୁ ବଢ଼ାଇଥାଏ, କେଶ ମୂଳକୁ ପୋଷଣ ଦେଇଥାଏ ଏବଂ କେଶକୁ ଶକ୍ତିଶାଳୀ କରିଥାଏ। ତେଲ ଲଗାଇବା ପରେ କିଛି ଘଣ୍ଟା କିମ୍ବା ରାତିସାରା ରଖି କେଶ ଧୋଇପାରିବେ।
ବର୍ଷା ଋତୁରେ କେଶରେ ଫ୍ରିଜ୍ ସମସ୍ୟା ବଢ଼ିଥାଏ। ଏହାକୁ ନିୟନ୍ତ୍ରଣ କରିବା ପାଇଁ ଅନେକେ ଷ୍ଟ୍ରେଟନର, କର୍ଲିଂ ଆଇରନ୍ କିମ୍ବା ବ୍ଲୋ ଡ୍ରାୟର ବ୍ୟବହାର କରନ୍ତି। କିନ୍ତୁ ଏହାର ଅତ୍ୟଧିକ ବ୍ୟବହାର କେଶକୁ ଅଧିକ ଶୁଷ୍କ ଏବଂ ଦୁର୍ବଳ କରିପାରେ।
ବିଶେଷଜ୍ଞମାନଙ୍କ ପରାମର୍ଶ ଅନୁଯାୟୀ, ଏହି ଋତୁରେ କେଶକୁ ସମ୍ଭବ ହେଲେ ପ୍ରାକୃତିକ ଭାବରେ ଶୁଖିବାକୁ ଦିଅନ୍ତୁ ଏବଂ ହିଟ୍ ଷ୍ଟାଇଲିଂର ବ୍ୟବହାର ସୀମିତ ରଖନ୍ତୁ।
ବର୍ଷା ଋତୁରେ ବଢ଼ିଥିବା ଆର୍ଦ୍ରତା କେଶ ମୂଳକୁ ଅଧିକ ସମ୍ବେଦନଶୀଳ କରିଦିଏ। ତେଣୁ ଏହି ସମୟରେ କେଶର ଯତ୍ନ ନେବା ଅତ୍ୟନ୍ତ ଜରୁରୀ। ନିୟମିତ ପରିଚ୍ଛନ୍ନତା, ସଠିକ୍ ତେଲ ମାଲିସ୍, ଉପଯୁକ୍ତ କଙ୍ଘା ବ୍ୟବହାର ଏବଂ କିଛି ସରଳ ସତର୍କତା ଅବଲମ୍ବନ କଲେ କେଶ ଝଡ଼ିବା ଓ ଭାଙ୍ଗିବାର ସମସ୍ୟାକୁ ଅନେକ ମାତ୍ରାରେ କମାଇହେବ।
ଏହି ବର୍ଷା ଋତୁରେ କେବଳ ଚର୍ମ ନୁହେଁ, କେଶର ସ୍ୱାସ୍ଥ୍ୟ ପ୍ରତି ମଧ୍ୟ ସମାନ ଧ୍ୟାନ ଦିଅନ୍ତୁ, ଯାହାଦ୍ୱାରା ଋତୁର ଆନନ୍ଦ ସହ ସୁସ୍ଥ ଓ ଘନ କେଶର ସୌନ୍ଦର୍ଯ୍ୟ ମଧ୍ୟ ବଜାୟ ରହିବ।