ଖାଇବା ସମୟରେ ହଠାତ୍ ଜିଭ ଦାନ୍ତ ମଧ୍ୟରେ ଫସିଯିବା କିମ୍ବା ଜିଭ କାମୁଡ଼ି ହୋଇଯିବା ଏକ ସାଧାରଣ ଘଟଣା। ଅନେକ ସମୟରେ ଏହାକୁ ଶୀଘ୍ର ଖାଇବା କିମ୍ବା ଖାଦ୍ୟ ଚୋବାଇବା ସମୟରେ ଅସାବଧାନତାର ପରିଣାମ ବୋଲି ଭାବି ଅଣଦେଖା କରାଯାଏ। କିନ୍ତୁ ଯଦି ଆପଣଙ୍କ ସହିତ ବାରମ୍ବାର ଏପରି ଘଟୁଛି, ତେବେ ଏହା ପଛରେ ଦାନ୍ତର ଗଠନ, ଜିଭରେ ଫୁଲା କିମ୍ବା ଅନ୍ୟ କୌଣସି ସ୍ୱାସ୍ଥ୍ୟଗତ କାରଣ ରହିଥାଇପାରେ। ବାରମ୍ବାର ଜିଭ କାମୁଡ଼ି ହେବା ଦ୍ୱାରା ଯନ୍ତ୍ରଣା, ଫୁଲା ଏବଂ ଖାଇବା ପିଇବାରେ ଅସୁବିଧା ହୋଇପାରେ। ତେଣୁ ଏହାକୁ ସାମାନ୍ୟ ସମସ୍ୟା ଭାବି ଅଣଦେଖା ନକରି ଏହାର କାରଣ ଜାଣିବା ଜରୁରୀ।
କାହିଁକି ବାରମ୍ବାର କାମୁଡ଼ି ହୋଇଯାଏ ଜିଭ? ଜାଣନ୍ତୁ ୪ଟି ପ୍ରମୁଖ କାରଣ
୧. ଦାନ୍ତର ଗଠନ ହୋଇପାରେ ମୁଖ୍ୟ କାରଣ
ବାରମ୍ବାର ଜିଭ କାମୁଡ଼ି ହେବା ପଛରେ ଦାନ୍ତର ଗଠନ ଏକ ପ୍ରମୁଖ କାରଣ ହୋଇପାରେ। ଯଦି ଦାନ୍ତ ଭାଙ୍ଗିଯାଇଛି, ଏହାର ଧାର ତୀକ୍ଷ୍ଣ ରହିଛି କିମ୍ବା ଦାନ୍ତରେ କରାଯାଇଥିବା ଫିଲିଂ ଠିକ୍ ଭାବରେ ଫିଟ୍ ହୋଇନାହିଁ, ତେବେ ଚୋବାଇବା ସମୟରେ ଜିଭରେ ଆଘାତ ଲାଗିପାରେ। ଏହା ବ୍ୟତୀତ ଦାନ୍ତଗୁଡ଼ିକ ଅସମାନ ଭାବରେ ରହିଥିଲେ ମଧ୍ୟ ଜିଭ ବାରମ୍ବାର ଦାନ୍ତ ମଧ୍ୟରେ ଫସିଯାଇପାରେ। ଏପରି ସମସ୍ୟା ଲଗାତାର ଦେଖାଦେଲେ ଦନ୍ତ ଚିକିତ୍ସକଙ୍କ ପରାମର୍ଶ ନିଅନ୍ତୁ। ଦାନ୍ତର ତୀକ୍ଷ୍ଣ ଧାର କିମ୍ବା ଅନ୍ୟ କୌଣସି ତ୍ରୁଟି ଥିଲେ ତାହାର ଉପଯୁକ୍ତ ଚିକିତ୍ସା କରାଯାଇପାରିବ।
୨. ଜିଭ ଫୁଲିଯିବା ମଧ୍ୟ ହୋଇପାରେ କାରଣ
ସାଧାରଣ ଅବସ୍ଥା ତୁଳନାରେ ଜିଭ ଅଧିକ ଫୁଲିଗଲେ ଚୋବାଇବା ସମୟରେ ଏହା ଦାନ୍ତ ମଧ୍ୟରେ ଫସିବାର ସମ୍ଭାବନା ବଢ଼ିଯାଏ। ଆଲର୍ଜି, ସଂକ୍ରମଣ, ଆଘାତ କିମ୍ବା କେତେକ ସ୍ୱାସ୍ଥ୍ୟ ସମସ୍ୟା ଯୋଗୁଁ ଜିଭ ଫୁଲିପାରେ।
ବିଶେଷ ଧ୍ୟାନ ଦିଅନ୍ତୁ, ଯଦି ହଠାତ୍ ଜିଭ ଫୁଲିଯାଏ ଏବଂ ନିଶ୍ୱାସ ନେବା କିମ୍ବା ଗିଳିବାରେ କଷ୍ଟ ହୁଏ, ତେବେ ଏହା ଗୁରୁତର ଆଲର୍ଜିର ଲକ୍ଷଣ ହୋଇପାରେ। ଏଭଳି ସ୍ଥିତିରେ ତୁରନ୍ତ ଜରୁରୀକାଳୀନ ଚିକିତ୍ସା ନିଅନ୍ତୁ।
୩. ଭିଟାମିନ୍ ଓ ଲୌହ ଅଭାବକୁ କରନ୍ତୁ ନାହିଁ ଅଣଦେଖା
ଶରୀରରେ ଭିଟାମିନ୍ ବି୧୨, ଫୋଲେଟ୍ କିମ୍ବା ଲୌହର ଅଭାବ ଯୋଗୁଁ ଜିଭରେ ଜଳାପୋଡ଼ା, ଯନ୍ତ୍ରଣା ଓ ଅସ୍ୱାଭାବିକ ପରିବର୍ତ୍ତନ ଦେଖାଦେଇପାରେ। କେତେକ କ୍ଷେତ୍ରରେ ଜିଭର ପୃଷ୍ଠଭାଗ ମଧ୍ୟ ପ୍ରଭାବିତ ହୁଏ।
ଯଦି ଜିଭରେ ଅସ୍ୱାଭାବିକ ଜଳାପୋଡ଼ା ସହିତ ଥକ୍କାପଣ, ଦୁର୍ବଳତା କିମ୍ବା ଜିଭ ଫୁଲିବା ଭଳି ଲକ୍ଷଣ ଦେଖାଯାଉଛି, ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ। ଆବଶ୍ୟକ ହେଲେ ରକ୍ତ ପରୀକ୍ଷା ମାଧ୍ୟମରେ ପୋଷକତତ୍ତ୍ୱର ଅଭାବ ଚିହ୍ନଟ କରାଯାଇପାରିବ।
୪. ଶୀଘ୍ର ଖାଇବା ଓ ଚୋବାଇବା ସମୟରେ ଅସାବଧାନତା
ଖାଇବା ସମୟରେ ଅତ୍ୟଧିକ ଶୀଘ୍ର ଚୋବାଇବା, କଥା ହେବା କିମ୍ବା ଖାଦ୍ୟ ଉପରେ ଧ୍ୟାନ ନଦେବା ଯୋଗୁଁ ମଧ୍ୟ ଜିଭ ଦାନ୍ତ ମଧ୍ୟରେ ଫସିଯାଇପାରେ। ଏପରି ଘଟଣା ବେଳେବେଳେ ଘଟୁଥିଲେ ଖାଇବାର ଗତି ଧୀର କରିବା, ଛୋଟ ଛୋଟ ଗୁଣ୍ଡ କରି ଖାଇବା ଏବଂ ଭଲ ଭାବରେ ଚୋବାଇବା ଦ୍ୱାରା ଏହାକୁ ରୋକାଯାଇପାରେ। ତେବେ ଧୀରେ ଖାଇବା ସତ୍ତ୍ୱେ ଯଦି ବାରମ୍ବାର ଜିଭ କାମୁଡ଼ି ହେଉଛି, ତେବେ କେବଳ ଅସାବଧାନତାକୁ ଦାୟୀ ନକରି ଏହାର ଅନ୍ୟ କାରଣ ଯାଞ୍ଚ କରାନ୍ତୁ।
ଜିଭ କାମୁଡ଼ି ହୋଇଗଲେ ତୁରନ୍ତ କ’ଣ କରିବେ?
ଜିଭରେ ଛୋଟ ଆଘାତ ଲାଗିଲେ ଘରେ କେତେକ ସରଳ ଉପାୟ ଅବଲମ୍ବନ କରିପାରିବେ।
– ପାଟି ସଫା କରନ୍ତୁ: ସଫା ପାଣିରେ ଧୀରେ ଧୀରେ ପାଟି ଧୋଇ ଦିଅନ୍ତୁ।
– ରକ୍ତସ୍ରାବ ବନ୍ଦ କରନ୍ତୁ: ସଫା ଗଜ୍ରେ କ୍ଷତ ଉପରେ ହାଲୁକା ଓ ସ୍ଥିର ଚାପ ପ୍ରୟୋଗ କରନ୍ତୁ।
– ଖାଦ୍ୟ ପ୍ରତି ଧ୍ୟାନ ଦିଅନ୍ତୁ: କିଛି ସମୟ ପାଇଁ ଅତ୍ୟଧିକ ଗରମ, ଖଟା ଓ ମସଲାଯୁକ୍ତ ଖାଦ୍ୟ ଖାଇବାରୁ ଦୂରେଇ ରୁହନ୍ତୁ।
– କ୍ଷତକୁ ଆରାମ ଦିଅନ୍ତୁ: କ୍ଷତ ଭଲ ହେବା ପର୍ଯ୍ୟନ୍ତ ଏହାକୁ ପୁଣି ଆଘାତ ଲାଗିବାରୁ ରକ୍ଷା କରନ୍ତୁ।
ଯଦି ରକ୍ତସ୍ରାବ ବନ୍ଦ ହେଉନାହିଁ, କ୍ଷତ ଗଭୀର ଅଟେ, ଜିଭ ଅତ୍ୟଧିକ ଫୁଲିଯାଉଛି କିମ୍ବା ଗିଳିବାରେ ଅସୁବିଧା ହେଉଛି, ତେବେ ତୁରନ୍ତ ଡାକ୍ତରୀ ସହାୟତା ନିଅନ୍ତୁ।
କେତେବେଳେ ଡାକ୍ତରଙ୍କ ପରାମର୍ଶ ନେବା ଜରୁରୀ?
ଜିଭ କାମୁଡ଼ି ହେବା ସବୁବେଳେ ଗମ୍ଭୀର ସମସ୍ୟାର ସଙ୍କେତ ନୁହେଁ। କିନ୍ତୁ ବାରମ୍ବାର ଏପରି ଘଟିବା, ଜିଭର କ୍ଷତ ନଶୁଖିବା, ଲଗାତାର ଯନ୍ତ୍ରଣା କିମ୍ବା ଫୁଲା ରହିବା ଏବଂ ଖାଇବା କିମ୍ବା ଗିଳିବାରେ ଅସୁବିଧା ହେବା ଭଳି ଲକ୍ଷଣକୁ ଅଣଦେଖା କରନ୍ତୁ ନାହିଁ। ବିଶେଷକରି ଜିଭରେ ହୋଇଥିବା ଘା’ ଦୁଇ ସପ୍ତାହ ମଧ୍ୟରେ ନଶୁଖିଲେ ଡାକ୍ତର କିମ୍ବା ଦନ୍ତ ଚିକିତ୍ସକଙ୍କୁ ଦେଖାନ୍ତୁ। ଠିକ୍ ସମୟରେ ଯାଞ୍ଚ କରାଇଲେ ଏହାର କାରଣ ଚିହ୍ନଟ କରିବା ସହ ଉପଯୁକ୍ତ ଚିକିତ୍ସା ମିଳିପାରିବ।