ଭୁବନେଶ୍ବର: ଆଜି କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ତରଫରୁ ୬୮ତମ ଜାତୀୟ ଚଳଚିତ୍ର ପୁରସ୍କାର ଘୋଷଣା କରାଯାଇଛି। ଏଥିରେ ଓଡିଶାର ସିନେ ଲେଖକ, ଗବେଷକ ତଥା ବରିଷ୍ଠ ସାମ୍ବାଦିକ ସୂର୍ଯ୍ୟ ଦେଓ ପୁରସ୍କାର ପାଇବା ପାଇଁ ମନୋନିତ ହୋଇଛନ୍ତି। ତାଙ୍କ ଦ୍ବାରା ଲିଖିତ ‘କାଲି ପାଇଁ କାଲିର ସିନେମା’ ପୁସ୍ତକ ନିମନ୍ତେ ସେ ଏହି ପୁରସ୍କାର ପାଇବେ। ଶ୍ରେଷ୍ଠ ସିନେମା ଲେଖକ, ସ୍ପେସାଲ ମେନସନ ବର୍ଗରେ ସେ ଏହି ପୁରସ୍କାର ପାଇଁ ମନୋନିତ ହୋଇଛନ୍ତି।
ସୂର୍ଯ୍ୟ ଦେଓ ଓଡିଆ ଚଳିଚିତ୍ର ଉପରେ ଦୀର୍ଘ ବର୍ଷ ଧରି ଗବେଷଣା କରି ଆସୁଛନ୍ତି। ଏହି ପୁସ୍ତକ ପୂର୍ବରୁ ସେ ଓଡିଆ ଚଳଚିତ୍ର ଉପରେ ଅନେକ ଗବେଷଣାତ୍ମକ ପୁସ୍ତକ ରଚନା କରିଛନ୍ତି। ସେଗୁଡିକ ମଧ୍ୟରେ ରହିଛି ‘ଓଡ଼ିଆ ସିନେମା ରୂପ ରୂପାନ୍ତର’, ‘ଅର୍ଦ୍ଧ-ଶତାଦ୍ଧୀର ଓଡ଼ିଆ ସିନେମାର ତର୍ଜମା’, ‘ଝୁରାମନ ଝୁରାଗୀତି’ ଓ ‘ଓଡ଼ିଆ ସିନେମା ଗୀତ ୧୯୩୬ରୁ ୧୯୬୯ ପରେ’। କାଲି ପାଇଁ କାଲିର ସିନେମା ହେଉଛି ତାଙ୍କର ଚତୁର୍ଥ ବହି।
ସୂର୍ଯ୍ୟ ଦେଓ ଓଡିଆ ସାମ୍ବାଦିକ ଜଗତରେ ବେଶ ପରିଚିତ ବ୍ୟକ୍ତିତ୍ବ। ସିନେ ସମ୍ବାଦରେ ସେ କାର୍ଯ୍ୟ କରୁଥିବା ବେଳେ ସିନେମା ସଂପର୍କରେ ଚମତ୍କାର ଲେଖା ପ୍ରକାଶିତ କରିଆସୁଥିଲେ। ସେତେବେଳେ ଏହି ସିନେମା ପତ୍ରିକା ଓଡିଶାରେ ବେଶ୍ ଚହଳ ପକାଇଥିଲା। ସେ ‘ସମ୍ବାଦ’ ଖବର କାଗଜରେ କାର୍ଯ୍ୟ କରୁଥିବା ବେଳେ ତାଙ୍କର ଅନେକ ରିପୋର୍ଟ ଚର୍ଚ୍ଚାକୁ ଆସିଥିଲା।
ଏକଦା ଆହେ ଦୟାମୟ ବିଶ୍ବ ବିହାରୀ ଗୀତକୁ ଅପଭ୍ରଂସ କରି ଏକ ଚାଲୁ ସଂଗୀତ ବଜାରକୁ ଆସିଥିଲା। ସେତେବେଳେ ସେ ଏହା ବିରୋଧରେ ଲଗାତର ରିପୋର୍ଟ କରିବା ପରେ ସେହି ଗୀତକୁ ରାଜ୍ୟ ସରକାର ବ୍ୟାନ କରିଥିଲେ। ବିଶେଷ ଭାବେ ଓଡିଆ ସିନେ ସଂଗୀତ ଉପରେ ତାଙ୍କର ପ୍ରବଳ ଦଖଲ ରହିଛି। ପ୍ରଖ୍ୟାତ ସଂଗୀତଜ୍ଞ ଅକ୍ଷୟ ମହାନ୍ତିଙ୍କ ଉପରେ ତାଙ୍କର ଗବେଷଣାତ୍ମକ ଲେଖା ଓଡିଆ ସିନେମା ଜଗତରେ ଚହଳ ପକାଇଛି।
ତାଙ୍କର ଏହି ଗବେଷଣା ତଥା ସିନେ ଲେଖା ପାଇଁ ସେ ବିଭିନ୍ନ ଅନୁଷ୍ଠାନରୁ ବହୁ ପୁରସ୍କାରରେ ପୁରସ୍କୃତ ହୋଇଛନ୍ତି। ସେ ସୂଚନା ଓ ପ୍ରସାରଣ ବିଭାଗର ଫିଲ୍ମ ଡିଭିଜନରୁ ଫେଲୋସିପ ମଧ୍ୟ ହାସଲ କରିଛନ୍ତି। ସେ ଓଡିଆ ଚଳଚିତ୍ର ଉପରେ ମଧ୍ୟ ଡକ୍ଟରେଟ କରୁଛନ୍ତି।
