ନୂଆଦିଲ୍ଲୀ: ଇସ୍ରାଏଲ୍ ଚଳଚ୍ଚିତ୍ର ନିର୍ମାତା ତଥା ଆନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ ଅଫ୍ ଇଣ୍ଡିଆ ୨୦୨୨ ର ଜୁରି ମୁଖ୍ୟ ନାଦବ ଲାପିଡ ‘ଦ କାଶ୍ମୀର ଫାଇଲ’ ପ୍ରଚାର-ଅଶ୍ଳୀଳ ବୋଲି କହିବା ପରେ ବିବାଦ ସୃଷ୍ଟି ହୋଇଥିଲା। ତାଙ୍କ ବିବୃତ୍ତିକୁ ନେଇ ବିବାଦ ମଧ୍ୟରେ ଇସ୍ରାଏଲ ଚଳଚ୍ଚିତ୍ର ନିର୍ମାତା ଏବେ କ୍ଷମା ପ୍ରାର୍ଥନା କରିଛନ୍ତି। ଏକ ନୂତନ ରିପୋର୍ଟ ଅନୁଯାୟୀ, ‘କାଶ୍ମୀର ଫାଇଲ’ ଉପରେ ମନ୍ତବ୍ୟ ଦେବାର କିଛି ଦିନ ପରେ ନାଦବ କହିଛନ୍ତି ଯେ, ସେ ‘ପୀଡିତଙ୍କୁ କିମ୍ବା ସେମାନଙ୍କ ସମ୍ପର୍କୀୟଙ୍କୁ ଅପମାନିତ କରିବା ପାଇଁ କେବେ ଇଚ୍ଛା କରିନାହାଁନ୍ତି’।
ନଭେମ୍ବର ୨୨ ତାରିଖରେ ଗୋଆରେ ଆୟୋଜିତ ଆଇଏଫଏଫଆଇ- ୨୦୨୨ ର ଉଦଯାପନୀ ସମାରୋହରେ ନାଦବ ଫିଲ୍ମ ‘କାଶ୍ମୀର ଫାଇଲ’ ଉପରେ ମନ୍ତବ୍ୟ ଦେଇଥିଲେ। ଯାହା ପରେ ବିବାଦ ବୃଦ୍ଧି ପାଇଥିଲା। ଫିଲ୍ମର ଲେଖକ-ନିର୍ଦ୍ଦେଶକ ବିବେକ ଅଗ୍ନିହୋତ୍ରୀ ଏବଂ ଅଭିନେତା ଅନୁପମ ଖେର ଏବଂ ପଲ୍ଲଭି ଯୋଶୀଙ୍କ ସମେତ କାଶ୍ମୀର ଫାଇଲର ଟିମ ନାଦବଙ୍କୁ ତାଙ୍କ ବିବୃତ୍ତି ପାଇଁ କଡା ନିନ୍ଦା କରିଥିଲେ।
ଗଣମାଧ୍ୟମକୁ ନାଦବ କହିଛନ୍ତି ଯେ, ମୁଁ କାହାକୁ ଅପମାନିତ କରିବାକୁ ଚାହୁଁନଥିଲି ଏବଂ ପୀଡିତ କିମ୍ବା ସେମାନଙ୍କ ସମ୍ପର୍କୀୟଙ୍କୁ ଅପମାନ କରିବା ମୋର ଉଦ୍ଦେଶ୍ୟ ନଥିଲା। ମୁଁ ସମ୍ପୂର୍ଣ୍ଣ କ୍ଷମା ମାଗୁଛି। ସେ ଏହା ମଧ୍ୟ କହିଛନ୍ତି ଯେ, ସେ ପୁରା ଜୁରିମାନଙ୍କ ତରଫରୁ କହିଥିଲେ। ନାଦବ ଏହା ମଧ୍ୟ କହିଛନ୍ତି ଯେ, ତାଙ୍କର ମନ୍ତବ୍ୟ କେବଳ ତାଙ୍କର ନୁହେଁ ବରଂ ତାଙ୍କ ସହକର୍ମୀ ଜୁରିମାନଙ୍କ ମତକୁ ମଧ୍ୟ ଦର୍ଶାଉଛି।
ଏଥି ସହ ଆଇଏଫଏଫଆଇ ଜୁରି ସଦସ୍ୟମାନଙ୍କ ମଧ୍ୟରୁ ସୁଦିପ୍ତୋ ସେନ କହିଛନ୍ତି ଯେ, ଇସ୍ରାଏଲ ଚଳଚ୍ଚିତ୍ର ନିର୍ମାତା ଦେଇଥିବା ମନ୍ତବ୍ୟ ତାଙ୍କର ବ୍ୟକ୍ତିଗତ ମତ। ଟ୍ୱିଟରରେ ସୁଦିପ୍ତୋ ତାଙ୍କ ବିବୃତ୍ତିରେ କହିଛନ୍ତି ଯେ ୫୩ ତମ ଆଇଏଫଏଫଆଇର ସମାରୋହରେ ମଞ୍ଚରୁ କାଶ୍ମୀର ଫାଇଲ ବିଷୟରେ ଆଇଏଫଏଫଆଇ ୨୦୨୨ ଜୁରି ହେଡ ନାଦବ ଲାପିଡ ଯାହା କହିଥିଲେ ତାହା କେବଳ ତାଙ୍କର ବ୍ୟକ୍ତିଗତ ମତ ଥିଲା।
