ସାଗରିକା
ଆମ ଭାରତୀୟ ସମାଜରେ ଝିଅ ଠାରୁ ବୟସରେ ବଡ ପୁଅ ସହିତ ବିବାହକୁ ସ୍ୱୀକୃତି ଦିଆଯାଇଥାଏ। ବିବାହରେ ବୟସର ତାରତମ୍ୟ ବେଶ ଜରୁରୀ ବୋଲି ବିବେଚନା କରାଯାଇଥାଏ। କିନ୍ତୁ ଆଜିର ସମୟରେ ଏଥିରେ ଭିନ୍ନତା ପରିଲକ୍ଷିତ ହେଉଛି। ବିବାହ ପାଇଁ ବୟସ ବାଧକ ହେଉନି । ପୁରୁଣା ଯୁଗରେ ଝିଅଙ୍କ ଠାରୁ ଢେର ଗୁଣ ବୟସରେ ବଡ ପୁଅଙ୍କ ସହ ବିବାହ ଦିଆଯାଉଥିଲା। ସମୟ ବଦଳିଲା। ସମ ବୟସ୍କ ବିବାହକୁ ଗ୍ରହଣ କରାଗଲା। କିନ୍ତୁ ବର୍ତ୍ତମାନ ଝିଅମାନେ ତାଙ୍କଠୁ ଢେର ଗୁଣ କମ ବୟସର ପୁଅଙ୍କୁ ବିବାହ କରିବାକୁ ଇଛା କରୁଛନ୍ତି। ଏହି କ୍ଷେତ୍ରରେ ଆମ ବଲିଉଡ ବେଶ ଆଗରେ ଆଗରେ ରହିଛି।
ନିକଟରେ ମିସ ୱାର୍ଲ୍ଡ ତଥା ବଲିଉଡ ନାୟିକା ପ୍ରିୟଙ୍କା ଚୋପ୍ରା ତାଙ୍କ ଠାରୁ ୧୦ ବର୍ଷ ସାନ ନିକ ଜୋନ୍ସଙ୍କୁ ବିବାହ କରି ବେଶ ଚର୍ଚ୍ଚାରେ ରହିଛନ୍ତି । ସେ ଏକ
ମାତ୍ର ଅଭିନେତ୍ରୀ ନୁହନ୍ତି। ତାଙ୍କ ପରି ଅନେକ ଅଭିନେତ୍ରୀ ଓ ଅଭିନେତା ଅଛନ୍ତି ଯିଏ କି ତାଙ୍କ ବୟସ ଠାରୁ ଢେର କମ ବୟସର ବା ଢେର ଅଧିକ ବୟସର ଜୀବନ ସଙ୍ଗୀ ପସନ୍ଦ କରୁଛନ୍ତି। ଏହି କ୍ରମରେ ଆଉ ଜଣେ ବିଶ୍ଵ ସୁନ୍ଦରୀ ମଧ୍ୟ ସାମିଲ ଅଛନ୍ତି। ଅଭିନେତ୍ରୀ ଐଶ୍ବର୍ୟା ରାୟ ତାଙ୍କ ଠାରୁ ୪ ବର୍ଷ ସାନ ଅଭିଷେକ ବଚ୍ଚନଙ୍କୁ ବିବାହ କରିଛନ୍ତି। ସେହିପରି ପୁରୁଣା ଦିନର ବଲିଉଡ ଅଭିନେତ୍ରୀ ନର୍ଗିସ ତାଙ୍କଠାରୁ ବର୍ଷେ ସାନ ସୁନୀଲ ଦତ୍ତଙ୍କୁ ବିବାହ କରିଥିଲେ । ଅଭିନେତା ସୈଫ୍ ଅଲୀ ଖାନ ନିଜଠାରୁ ୧୨ ବର୍ଷ ବଡ ଅଭିନେତ୍ରୀ ଅମୃତା ସିଂହଙ୍କୁ ବିବାହ କରିଥିବାବେଳେ ପୁଣିଥରେ ତାଙ୍କଠାରୁ ୧୦ ବର୍ଷ ସାନ ଅଭିନେତ୍ରୀ କରିନା କପୁରଙ୍କୁ ବିବାହ କରିଛନ୍ତି। ଅଭିନେତ୍ରୀ ଜରିନା ୱାହାବ ତାଙ୍କଠାରୁ ୬ ବର୍ଷ ସାନ ଅଭିନେତା ଆଦିତ୍ୟ ପଞ୍ଚୋଲିଙ୍କୁ ବିବାହ କରିଛନ୍ତି।
ଲୋକପ୍ରିୟ କୋରିୟଗ୍ରାଫର ଫରହା ଖାନ ତାଙ୍କ ପତି ଶିରିଶ କୁନ୍ଦରଙ୍କ ଠାରୁ 8 ବର୍ଷ ବଡ ଅଟନ୍ତି। ସେହିପରି ଲୋକପ୍ରିୟ ହାସ୍ୟ କଳାକାର ଅର୍ଚନା ପୂରଣ ସିଂହ ତାଙ୍କ ସ୍ଵାମୀ ପରମିତ୍ତ ସେଠୀଙ୍କ ଠାରୁ 7 ବର୍ଷ ବଡ ଅଟନ୍ତି। ସେହିପରି ବଲିଉଡ ଅଭିନେତ୍ରୀ ଉର୍ମିଲା ମତୋଣ୍ଡକର ତାଙ୍କଠାରୁ 10 ବର୍ଷ ସାନ ମୋହସିନଙ୍କୁ ବିବାହ କରିଛନ୍ତି। ଅଭିନେତା ଫରହାନ ଆଖତର ତାଙ୍କ ଠାରୁ 6 ବର୍ଷ ବଡ ଆଧୁନାଙ୍କୁ ବିବାହ କରିଥିଲେ। ଏ ସମସ୍ତଙ୍କୁ ଦେଖିଲେ ଲାଗୁଛି ସତେ ଯେମିତି ବୟସ ସତରେ କେବଳ ଗୋଟେ ନମ୍ବର, ଏହା ସମ୍ପର୍କର ମାପକାଠି ନୁହେଁ। ସମୟ ବଦଳିବା ସହ ବୟସ ଓ ବିବାହର ସମ୍ପର୍କ ବଦଳିବାରେ ଲାଗିଛି, ଯାହାକୁ ଆମ ସମାଜ ଧୀରେ ଧୀରେ ଗ୍ରହଣ କରିନେଇଚାଲିଛି।