ନୂଆଦିଲ୍ଲୀ: ଜେଏନୟୁ ର ପୂର୍ବତନ ଛାତ୍ର ନେତା ଶେହଲା ରସିଦ ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧ ଉପରେ ନିଜର ପ୍ରତିକ୍ରିୟା ଦେଇଛନ୍ତି। ଶେହଲା ରସିଦ ଭାରତୀୟ ସେନା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ମଧ୍ୟ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ମଧ୍ୟ ପୂର୍ବର ଘଟଣାଗୁଡ଼ିକୁ ଦେଖି ଆଜି ମୁଁ ଅନୁଭବ କରୁଛି ଯେ ଆମେ ଭାରତୀୟ ଭାବରେ କେତେ ଭାଗ୍ୟବାନ।
ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଶେହଲା ରସିଦ କହିଛନ୍ତି ଯେ, ଭାରତୀୟ ସେନା ଏବଂ ସୁରକ୍ଷା ବାହିନୀ ଆମ ସୁରକ୍ଷା ପାଇଁ ସବୁକିଛି ବଳିଦାନ ଦେଇଛନ୍ତି। କାଶ୍ମୀରରେ ଶାନ୍ତି ଆଣିବା ପାଇଁ ଯାହା ଉଚିତ ଅଟେ, ସେଠାରେ ଶ୍ରେୟ ଦିଅନ୍ତୁ। ସେ ଏହି ଟୁଇଟକୁ PMO, କେନ୍ଦ୍ର ଗୃହ ମନ୍ତ୍ରଣାଳୟ, ଜମ୍ମୁ କାଶ୍ମୀର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନା, ଭାରତୀୟ ସେନା ଏବଂ ଚିନାର କର୍ପସକୁ ଟ୍ୟାଗ୍ କରିଛନ୍ତି।
୨୦୧୬ ରେ ଶେହଲା ଚର୍ଚ୍ଚାରେ ଥିଲେ:
ଜେଏନୟୁରେ ଜାତୀୟ ବିରୋଧୀ ସ୍ଲୋଗାନ ଦେବା ମାମଲାରେ ଶେହଲା ରସିଦ ପ୍ରଥମେ ୨୦୧୬ ରେ ଖବରକୁ ଆସିଥିଲେ।
୨୦୧୯ରେ ସେନା ଉପରେ ଅଭିଯୋଗ:
ଏହା ବ୍ୟତୀତ ୨୦୧୯ରେ ସେ ଟୁଇଟ୍ କରି ସଶସ୍ତ୍ର ବାହିନୀକୁ ଘର ଭଙ୍ଗାରୁଜା କରିବା ସହ କାଶ୍ମୀରରେ ଭୟର ବାତାବରଣ ସୃଷ୍ଟି କରିଥିବା ଅଭିଯୋଗ କରିଥିଲେ। ଏହି ଟୁଇଟ୍ ସଂପର୍କରେ ତାଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା।
ମୋଦୀ ସରକାରଙ୍କୁ ପ୍ରଶଂସା:
ଚଳିତ ବର୍ଷ ଅଗଷ୍ଟରେ ଶେହଲା ରସିଦ ଧାରା ୩୭୦ ରଦ୍ଦ ହେବା ବିରୋଧରେ ଆବେଦନକାରୀଙ୍କ ତାଲିକାରୁ ତାଙ୍କ ନାମ ପ୍ରତ୍ୟାହାର କରି କହିଛନ୍ତି ଯେ, ଗ୍ରହଣ କରିବା ଯେତେ ଅସହଜ ହେଲେ ବି ନରେନ୍ଦ୍ର ମୋଦୀ ସରକାର ଏବଂ ଜମ୍ମୁ କାଶ୍ମୀର ପ୍ରଶାସନ ଅଧୀନରେ କାଶ୍ମୀରରେ ମାନବିକ ଅଧିକାରରେ ଉନ୍ନତି ହୋଇଛି। ସରକାରଙ୍କ ସ୍ପଷ୍ଟ ଆଭିମୁଖ୍ୟ ଲୋକଙ୍କ ଜୀବନ ରକ୍ଷା କରିବାରେ ସହାୟକ ହୋଇଛି।
ଶାହ ଫୈସଲ ମଧ୍ୟ ଏହି ଆବେଦନରୁ ଅଲଗା ହୋଇଛନ୍ତି:
ଧାରା ୩୭୦ ଉଚ୍ଛେଦ ହେବା ବିରୋଧରେ ଆବେଦନକାରୀଙ୍କ ମଧ୍ୟରେ ଥିବା ପୂର୍ବତନ ଆଇଏଏସ୍ ଶାହା ଫୈସଲ ମଧ୍ୟ ଶେହଲାଙ୍କ ସହ ଆବେଦନରୁ ତାଙ୍କ ନାମ ପ୍ରତ୍ୟାହାର କରି ନେଇଥିଲେ। ୨୦୧୯ରେ ରାଜନୀତିରେ ଯୋଗଦେବା ପାଇଁ ଶାହା ଫୈସଲ ସରକାରୀ ସେବାରୁ ଇସ୍ତଫା ଦେଇଥିଲେ ଏବଂ ପରେ ନିଜ ଦଳ ଗଠନ କରିଥିଲେ।
