ଭୁବନେଶ୍ବର: ଚାରିଦିନ ଧରି ଚାଲିଛି ଟଙ୍କା ଗଣତି ଯେ, ଏ ପର୍ଯ୍ୟନ୍ତ ଶେଷ ହେଉ ନାହିଁ। ମଦଭାଟିରୁ ଜବତ ସମସ୍ତ ଟଙ୍କା ବଲାଙ୍ଗିର ଷ୍ଟେଟ ବ୍ୟାଙ୍କ ମୁଖ୍ୟାଳୟରେ ଭର୍ତ୍ତି କରାଯାଇ ଗଣତି ଚାଲିଛି। ହେଲେ ରୁନ୍ଧା ଘରେ ଗଦାଗଦା ଟଙ୍କା ଓ କର୍ମଚାରୀ ରହିବାରୁ ସେଠାରେ ଅମ୍ଲଜାନ ଅଭାବ ରହୁଛି। ଫଳରେ କର୍ମଚାରୀମାନେ ହାଲିଆ ହୋଇପଡୁଛନ୍ତି। ଏହାକୁ ଦୂର କରିବା ପାଇଁ ଆଇଟି ବିଭାଗ ତରଫରୁ ସେଠାରେ ଅକ୍ସିଜେନ ସିଲିଣ୍ଡର ନିୟୋଜିତ କରାଯାଉଛି।
ବର୍ତ୍ତମାନ ବଲାଙ୍ଗୀର ଷ୍ଟେଟ ବ୍ୟାଙ୍କ ବସ୍ତା ପରେ ବସ୍ତା ଟଙ୍କା ଆସିବାରୁ ସେଠାରେ ମଧ୍ୟ ଏକ ଅଭାବନୀୟ ପରିସ୍ଥିତ ସୃଷ୍ଟି ହୋଇଛି। ମୋଟ ୧୭୬ଟି ବ୍ୟାଗ ସେଠାରେ ରଖାଯାଇଛି। ସେଥିମଧ୍ୟରୁ ୧୦୨ଟି ବ୍ୟାଗର ଟଙ୍କା ଗଣା ସରିଥିବା ବେଳେ ଆହୁରି ୭୪ଟି ବ୍ୟାଗ୍ ଗଣା ହେବ। ଶନିବାର ରବିବାର ଛୁଟି ଥିଲେ ମଧ୍ୟ ବ୍ୟାଙ୍କ କର୍ମଚାରୀ ଟଙ୍କା ଗଣତିରେ ନିୟୋଜିତ ଅଛନ୍ତି। ବର୍ତ୍ତମାନ ୫୦ରୁ ଅଧିକ ବ୍ୟାଙ୍କ କର୍ମଚାରୀ ଏହି ଟଙ୍କା ଗଣାରେ ନିୟୋଜିତ ଅଛନ୍ତି।
ଏସବୁ ଗଣତି କାର୍ଯ୍ୟ ତଦାରଖ କରିବା ପାଇଁ ମଧ୍ୟ କର୍ମଚାରୀ ନିୟୋଜିତ ହୋଇଛନ୍ତି। ବର୍ତ୍ତମାନ ୨୫ଟି ମେସିନରେ ଟଙ୍କା ଗଣା ଯାଉଛି । କାଳେ ମେସିନ୍ ଖରାପ ହୋଇଯିବ, ସେଥିପାଇଁ ଆଉ ୧୫ଟି ମେସିନକୁ ଗଚ୍ଛିତ ରଖାଯାଇଛି। ଏପରିକି ମେସିନ୍ ସଜାଡିବା ପାଇଁ ଟେକ୍ନିସିଆନ୍ ମଧ୍ୟ ପ୍ରସ୍ତୁତ ହୋଇ ରହିଛନ୍ତି। କାରଣ ପୂର୍ବରୁ ଟଙ୍କା ଗଣି ଗଣି ମେସିନ ମଧ୍ୟ ଖରାପ ହୋଇଯାଉଛି।
ଗୋଟିଏ ପଟେ ଟଙ୍କା ଗଣତି ସରି ନ ଥିବା ବେଳେ ଅନ୍ୟପଟେ ଚଢାଉ ମଧ୍ୟ ଶେଷ ହୋଇପାରୁ ନାହିଁ। ଗତକାଲି ଆଇଟି ବିଭାଗ ଅଧିକାରୀ ଟିଟିଲାଗଡରେ କେତେକ ସ୍ଥାନ ଉପରେ ଚଢାଉ କରିଥିଲେ। ସେଠାରେ ମଧ୍ୟ ଟଙ୍କା ଗଣତି ଚାଲିଛି। ତେବେ ଏ ପର୍ଯ୍ୟନ୍ତ କେତେ ଟଙ୍କା ମିଳିଛି ତାହା ଜଣାପଡି ନ ଥିଲେ ମଧ୍ୟ ବର୍ତ୍ତମାନ ସୁଦ୍ଧା ତାହା 300 କୋଟିରୁ ଅଧିକ ହେବ ବୋଲି ଅନୁମାନ କରାଯାଉଛି। ତେବେ ଶେଷ ହେବା ବେଳକୁ ଏହା 500 କୋଟି ଟପିବ ବୋଲି ଜଣାପଡିଛି।
ତେବେ ଅଶ୍ଚର୍ଯ୍ୟର କଥା ଯେ, ଏହି ଜବତ ଟଙ୍କାରେ ରହିଛି 10, 20, 50, 100 ଏବଂ 500 ଟଙ୍କିଆ ବଣ୍ଡଲ। ଏହାକୁ ନେଇ ଆଇଟି ବିଭାଗର ସନ୍ଦେହ ବୃଦ୍ଧି ପାଇଛି। ଯେଉଁମାନେ କ୍ୟାସ ରଖନ୍ତି ସେମାନେ ସର୍ବାଧିକ ମୂଲର ନୋଟ ଯଥା 500 ଟଙ୍କିଆ ବଣ୍ଡଲ ଗଚ୍ଛିତ କରନ୍ତି। କାରଣ 500 ଟଙ୍କିଆ ବଣ୍ଡଲ ରଖିଲେ ତାହା କମ ସ୍ଥାନ ଅଧିକାର କରିଥାଏ। ହେଲେ ଏହି ସାହୁ ବ୍ରଦର୍ସ ସବୁଠାରୁ କମ ମୂଲ୍ୟର ଟଙ୍କା ବଣ୍ଡଲ ରଖିବା ଅଧିକାରୀଙ୍କୁ ଆଶ୍ଚର୍ଯ୍ୟ କରିଛି।
ତେବେ ଏହି ଟଙ୍କା ଜବତ ଏକ ସର୍ବକାଳୀନ ରେକର୍ଡ ବୋଲି ଜଣାପଡିଛି। ଏତେ ଟଙ୍କା ମିଳିବା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। କଂଗ୍ରେସରୁ ରାଜ୍ୟସଭା ସାଂସଦ ଥିବା ଧୀରଜ ସାହୁ ଏବଂ ତାଙ୍କ ସଂପର୍କୀୟ ସହ ତାଙ୍କ କର୍ମଚାରୀଙ୍କ ଘର ଏବେ ବି ଚଢାଉ ଜାରୀ ରହିଛି। ତାଙ୍କର ନିଜ ଲୋକ ବୋଲି କୁହାଯାଉଥିବା ସୁନ୍ଦରଗଡର ମଦ ବ୍ୟବସାୟୀ ରାଜକିଶୋର ଜୟସ୍ବାଲଙ୍କ ଘରେ ଏବଂ ତାଙ୍କର ରାଜ୍ୟ ବାହାରେ ଥିବା ଅଫିସରେ ଚଢାଉ ଜାରୀ ରହିଛି।
ତେବେ ସମସ୍ତ ଚଢାଉ ଏବଂ ଟଙ୍କା ଗଣତି ଆଜି ସଂଧ୍ୟା ସୁଦ୍ଧା ଶେଷ ହୋଇଯିବ ବୋଲି ଜଣାପଡିଛି।