ଭୁବନେଶ୍ବର: ଆଜି ଓଡିଶା ନିଯୁକ୍ତି ପର୍ବରେ ସମୁଦାୟ ୪୪୧ ଜୁନିଅର ଇଞ୍ଜିନିୟର (ସିଭିଲ) ରାଜ୍ୟ ସରକାରଙ୍କ ଜଳସମ୍ପଦ ବିଭାଗରେ ଯୋଗ ଦେଇଛନ୍ତି। ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ଲୋକ ସେବା ଭବନରେ ଥିବା ସମ୍ମିଳନୀ କକ୍ଷରେ ଏହି ନୂତନ ନିଯୁକ୍ତି କାର୍ଯ୍ୟକ୍ରମ ଆୟୋଜିତ ହୋଇଥିଲା।
ନୂତନ ଇଂଜିନିୟରମାନଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ ସେମାନଙ୍କୁ ୫ଟି ପଦକ୍ଷେପ ଅନୁସରଣ କରିବାକୁ ଆହ୍ୱାନ ଦେଇଥିଲେ। ସେ କହିଛନ୍ତି ଯେ ଏହି ପଦକ୍ଷେପ ଗ୍ରହଣ କରାଯିବା ସହିତ ଆଧୁନିକ ଜ୍ଞାନକୈଶଳ ପ୍ରୟୋଗ ସହିତ ଅନେକ ପ୍ରମୁଖ ଜଳସେଚନ ପ୍ରକଳ୍ପ ତ୍ୱରାନ୍ୱିତ ହୋଇଛି।
ସେ ଆଶା କରିଛନ୍ତି ଯେ ସମସ୍ତ ନୂତନ ଇଞ୍ଜିନିୟରମାନେ ନିଜକୁ ନୂତନ ଜ୍ଞାନକୈଶଳର ବିନିଯୋଗ କରିବେ ଏବଂ ଚ୍ୟାଲେଞ୍ଜିଂ ପ୍ରସଙ୍ଗଗୁଡ଼ିକର ସହଜରେ ସମାଧାନ କରିବେ।
ସେ ଆହୁରି ମଧ୍ୟ କହିଛନ୍ତି, “ବର୍ତ୍ତମାନ ତୁମେମାନେ ଜନସେବାରେ ଅଛ, ତୁମର ଏକମାତ୍ର ଦାୟିତ୍ବ ହେଉଛି ଲୋକମାନଙ୍କୁ ସ୍ୱଚ୍ଛତା, ଆନ୍ତରିକତା ଏବଂ ପ୍ରତିବଦ୍ଧତା ସହିତ ସେବା କରିବା। ଆମର ପ୍ରତ୍ୟେକ କାର୍ଯ୍ୟ ଲୋକଙ୍କ ଜୀବନ ଉପରେ ସିଧାସଳଖ ପ୍ରଭାବ ପକାଇଥାଏ। ଆମେ ଲୋକମାନଙ୍କର ଆବଶ୍ୟକତା ଏବଂ ଆକାଂକ୍ଷା ପ୍ରତି ସମ୍ବେଦନଶୀଳ ହେବା ଏବଂ ସେମାନଙ୍କୁ ସେବା କରିବା ପାଇଁ ଯଥାସମ୍ଭବ ଚେଷ୍ଟା କରିବା ଉଚିତ୍। ”
ମୁଖ୍ୟମନ୍ତ୍ରୀ କହିଛନ୍ତି ଯେ ଜଳସମ୍ପଦ ହେଉଛି ରାଜ୍ୟ ସରକାରଙ୍କ ଏକ ଗୁରୁତ୍ୱପୂର୍ଣ୍ଣ ବିଭାଗ। ଯାହାକି ସମାଜର ସମସ୍ତ ବର୍ଗର ଲୋକଙ୍କ ଉପରେ ଏକ ମହତପୂର୍ଣ୍ଣ ପ୍ରଭାବ ପକାଉଥିବା ବହୁ ବିକାଶମୂଳକ ଉପରେ ପ୍ରଭାବ ପକାଇଥାଏ। ଏହି ବିଭାଗର ଇଞ୍ଜିନିୟରମାନେ ଚାଷ ଜମିରେ ଜଳସେଚନ ସୁବିଧା ଯୋଗାଇବା, ବନ୍ୟା ପରିସ୍ଥିତିରୁ ସୁରକ୍ଷା ଏବଂ ପାନୀୟ ଜଳ, ଶିଳ୍ପ, ମତ୍ସ୍ୟଜୀବୀ ତଥା ଅନ୍ୟାନ୍ୟ ଜୀବନ ପରିବର୍ତ୍ତନକାରୀ କାର୍ଯ୍ୟ ପାଇଁ ନିଜକୁ ସର୍ମପିତ କରିବା ଉଚିତ ବୋଲି ସେ କହିଛନ୍ତି।
ବିଭାଗର ପ୍ରକଳ୍ପ ସମ୍ପର୍କରେ ସେ କହିଛନ୍ତି ଯେ ରାଜ୍ୟରେ ୪ ହଜାରରୁ ଅଧିକ ଡ୍ୟାମ ରହିଛି ଏବଂ ଅନ୍ୟାନ୍ୟ ନିର୍ମାଣ କାଯ୍ୟ ଚାଲିଛି। ରାଜ୍ୟ ସରକାର ପ୍ରଥମ ପର୍ଯ୍ୟାୟରେ ୩୦ ଟି ଇନ୍-ଷ୍ଟ୍ରିମ୍ ଷ୍ଟୋରେଜ୍ ଷ୍ଟ୍ରକଚର ନିର୍ମାଣ କାର୍ଯ୍ୟ ଗ୍ରହଣ କରିଛନ୍ତି ଏବଂ ଦ୍ୱିତୀୟ ଏବଂ ତୃତୀୟ ପର୍ଯ୍ୟାୟରେ ଅନ୍ୟ ୪୧ ଟି ନିର୍ମାଣ କରାଯିବ। ଏହି ପ୍ରକଳ୍ପଗୁଡିକ ଆମକୁ ଜଳ ସଂରକ୍ଷଣ, ଗ୍ରାମୀଣ ଜଳ ଯୋଗାଣରେ ସାହାଯ୍ୟ କରିବ ଏବଂ ଭୂତଳ ଜଳ ସ୍ତରର ଉନ୍ନତି କରିବାରେ ସାହାଯ୍ୟ କରିବ।
ଏହି କାଯ୍ୟକ୍ରମରେ ଯୋଗ ଦେଇ ଜଳ ସମ୍ପଦ ବିଭାଗ ମନ୍ତ୍ରୀ ଟୁକୁନି ସାହୁ କହିଛନ୍ତି ଯେ କୃଷକମାନେ ହେଉଛନ୍ତି ମୁଖ୍ୟମନ୍ତ୍ରୀଙ୍କ ପରିକଳ୍ପିତ ନୂତନ ଓଡିଶାର କେନ୍ଦ୍ରବିନ୍ଦୁ। ତେଣୁ ଚାଷ ଜମିକୁ ଜଳ ଯୋଗାଇବା ପାଇଁ କାଯ୍ୟ କରୁଥିବା ଏହି ବିଭାଗର ଇଞ୍ଜିନିୟରମାନେ ରାଜ୍ୟର ପରିବର୍ତ୍ତନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ବୋଲି ମନ୍ତ୍ରୀ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ୪୪୧ ନୂତନ ନିଯୁକ୍ତି ମଧ୍ୟରୁ ପ୍ରାୟ ୫୦ ପ୍ରତିଶତ ମହିଳା ଅଛନ୍ତି।
ନିଜର ଅଭିଜ୍ଞତା ବାଣ୍ଟି ଦୁଇଜଣ ନୂତନ ଇଞ୍ଜିନିୟର ବିଷ୍ଣୁପ୍ରିୟା ସାମଲ ଏବଂ ଜୀବନ ଜ୍ୟୋତି ରାଉତ କହିଛନ୍ତି ଯେ ସ୍ୱୟଂଚାଳିତ ପସନ୍ଦ ଲକିଂ ସିଷ୍ଟମ ସହିତ ନିଯୁକ୍ତି ପ୍ରକ୍ରିୟା ଅତି ଶୀଘ୍ର ଏବଂ ସ୍ୱଚ୍ଛ ହୋଇଛି।
ସେହିପରି ଉନ୍ନୟନ ବିକାଶ କମିଶନର ତଥା ଏସିଏସ୍ ଜଳ ସମ୍ପଦ ଶ୍ରୀମତୀ ଅନୁ ଗର୍ଗ କହିଛନ୍ତି ଯେ କୃଷକମାନଙ୍କ ପାଇଁ ଜଳ ଭିତ୍ତିଭୂମି ସୃଷ୍ଟି କରୁଥିବାରୁ କୃଷକଙ୍କ ସଶକ୍ତିକରଣରେ ଆମର ବିଭାଗର ପ୍ରମୁଖ ଭୂମିକା ରହିଛି। କାର୍ଯ୍ୟର ପରିମାଣ ଏବଂ ପରିସର ବଢୁଥିବାରୁ ସେ ନୂତନ ଇଞ୍ଜିନିୟରମାନଙ୍କୁ ଦଳ ଭାବରେ ବିଭକ୍ତ ହୋଇ କାର୍ଯ୍ୟ କରିବାକୁ କହିଥିଲେ। ଆଧୁନିକ ଜ୍ଞାନକୈଶଳ ବ୍ୟବହାର କରି ଠିକ୍ ସମୟରେ ପ୍ରକଳ୍ପ ସମାପ୍ତ କରିବା ଉଚିତ ବୋଲି ସେ ପରାମର୍ଶ ଦେଇଥିଲେ। ଇଏସଆଇ ଶ୍ରୀ ଭକ୍ତ ରଂଜନ ମହାନ୍ତି ଧନ୍ୟବାଦ ପ୍ରଦାନ କରିଥିଲେ।