ଭୁବନେଶ୍ବର: ଆସନ୍ତାକାଲି ପୁଣି ଥରେ ଓଡିଶା ଆସୁଛନ୍ତି ପ୍ରଧାନମନ୍ତୀ ନରେନ୍ଦ୍ର ମୋଦି। ଗତ ଫେବୃୟାରୀରେ ସେ ସମ୍ବଲପୁର ଆସିଥିଲେ। ସେଠାରେ ସରକାରୀ କାର୍ଯ୍ୟକ୍ରମ ସହିତ ଦଳିୟ କାର୍ଯ୍ୟକ୍ରମ ମଧ୍ୟ ଥିଲା। ହେଲେ ସେତେବେଳେ ସେ ନବୀନ ସରକାରଙ୍କ ବିରୋଧରେ ପଦେ ହେଲେ କିଛି କହି ନ ଥିଲେ। ଯାହାକୁ ନେଇ ଓଡିଶା ରାଜନୀତିରେ ବେଶ ଚର୍ଚ୍ଚା ହୋଇଥିଲା।
ବର୍ତ୍ତମାନ ପୁଣି ଆସନ୍ତାକାଲି 5 ତାରିଖରେ ମୋଦି ଓଡିଶା ଆସୁଛନ୍ତି। ସେ ଚଣ୍ଡିଖୋଲରେ ସେହିପରି ସରକାରୀ କାର୍ଯ୍ୟକ୍ରମ ସହିତ ଦଳିୟ ସଭା ମଧ୍ୟ ରହିଛି। ବର୍ତ୍ତମାନ ନିର୍ବାଚନ ମାତ୍ର ଆଉ କେତେ ସପ୍ତାହ ରହିଥିବାରୁ ଏଥର ମୋଦି ନବୀନ ସରକାରଙ୍କୁ ପଦେ ଶୁଣେଇବେ ବୋଲି ଆଶା କରିଛନ୍ତି ଓଡିଶା ବିଜେପି ନେତା। ହେଲେ ତାହା ସମ୍ଭବ ହେବ କି ନାହିଁ ଜଣାପଡି ନାହିଁ।
ବର୍ତ୍ତମାନ ପରିସ୍ଥିତିରେ ମୋଦି ଯେତେବେଳେ ଓଡିଶାରେ ନବୀନ ସରକାରଙ୍କୁ ସାଥୀରେ ନେଇ ଯାଉଛନ୍ତି ସେତେବେଳେ ଓଡିଶା ବିଜେପି କର୍ମି କାହିଁକି ଏପରି ଆଶା କରୁଛନ୍ତି ତାହା ପ୍ରଶ୍ନ ସୃଷ୍ଟି କରିଛି। ବିଜେଡି ସବୁବେଳେ କେନ୍ଦ୍ରର ମୋଦି ସରକାରଙ୍କୁ ସହଯୋଗ କରି ଆସିଛି। ସେପରି କ୍ଷେତ୍ରରେ ରାଜ୍ୟ ବିଜେପି ନେତା ଏପରି ଆଶା କରିବା ଭୁଲ ବୋଲି କୁହାଯାଇପାରିବ।
ସେମାନେ ଜାଣି ରଖିବା ଦରକାର ଯେ, ବିଭିନ୍ନ ରାଜ୍ୟରେ ବିଜେପି ଆଞ୍ଚଳିକ ଦଳ ସହିତ ମେଣ୍ଟ କରିବା ଉଦ୍ୟମ ଜାରି ରଖିଛନ୍ତି। ଓଡିଶାରେ ମଧ୍ୟ ବିଜେପି ବିଜେଡି ମେଣ୍ଟ ହେବ ବୋଲି ବେଶ ଚର୍ଚ୍ଚା ଚାଲିଛି। ଓଡିଶା ବିଜେପି ଏ ସବୁ ଜାଣିବା ପରେ ମଧ୍ୟ ନ ଜାଣିବା ପରି ହେଉଛନ୍ତି। କେନ୍ଦ୍ର ବିଜେପି ଜାଣି ସାରିଲାଣି ଯେ, ଓଡିଶାରେ ବିଜେପି କିଛି କରିପାରିବ ନାହିଁ। ସେଥିପାଇଁ ସେମାନେ ଯେତେବେଳେ ନବୀନଙ୍କ ହାତ ଧରି ଚାଲୁଛନ୍ତି, ସେତେବେଳେ ମୋଦି କାହିଁକି ନବୀନଙ୍କ ବିରୋଧରେ କିଛି କହିବେ?
ଏ ସବୁ ସମୀକରଣରୁ ସ୍ପଷ୍ଟ ହୋଇଛି ଯେ ମୋଦି ଯେବେ ବି ଓଡିଶା ଆସିବେ ସେ କେବେ ନବୀନ ସରକାରଙ୍କ ବିରୋଧରେ ପଦେ ହେଲେ ମଧ୍ୟ କହିବେ ନାହିଁ। ଏ ସବୁ ଜାଣିବା ପରେ ତଥାପି ବିଜେପି ନେତା ଚଣ୍ଡିଖୋଲ ସଭାକୁ ଅପେକ୍ଷା କରି ରହିଛନ୍ତି।
