ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତକାଲି ଭାରତ ମଣ୍ଡପମରେ ପ୍ରଥମ ଥର ପାଇଁ ଜାତୀୟ କ୍ରିଏଟର ସମ୍ମାନ ପ୍ରଦାନ କରିଛନ୍ତି। ଏଥିରେ ଦେଶର ବିଭିନ୍ନ ସମାଜିକ ଗଣମାଧ୍ୟମ କିମ୍ବା ୟୁଟୁବରେ ନିଜର ଦକ୍ଷତା ପ୍ରତିପାଦନ କରାଇ ସାମାଜିକ ପରିବର୍ତ୍ତନ କରିଛନ୍ତି ସେମାନଙ୍କୁ ପୁରସ୍କୃତ କରାଯାଇଛି। ପ୍ରଧାନମନ୍ତ୍ରୀ ଗତକାଲି ୨୩ ଜଣ ବିଜେତାଙ୍କୁ ପୁରସ୍କୃତ କରିଛନ୍ତି। ସେମାନଙ୍କ ମଧ୍ୟରେ ଜଣେ ହେଉଛି ଜୟା କିଶୋରୀ।
ଜୟା କିଶୋରୀ ଜୀ, ଆଧ୍ୟାତ୍ମିକ ଜଗତ ତଥା ଭଜନ ଜଗତର ଜଣେ ପ୍ରତିଷ୍ଠିତ ଚେହେରା। ତାଙ୍କର ପ୍ରବଚନ ଶୁଣିବା ପାଇଁ ଭାରତ କାହିଁକି ବିଦେଶରେ ମଧ୍ୟ ଲୋକେ ପାଗଳ ପରି ହୋଇ ଯାଉଛନ୍ତି। ସେ ଦେଖିବାକୁ ଯେପରି, ତାଙ୍କ କଣ୍ଠ ସ୍ବର ମଧ୍ୟ ସେହିପରି। ଭାରତୀୟ ଶାସ୍ତ୍ର ପୁରାଣ ଜ୍ଞାନର ଭଣ୍ଡାର ହେଉଛନ୍ତି ଜୟା କିଶୋରୀ।
ଟେଲିଭିଜନର ଭକ୍ତି କାର୍ଯ୍ୟକ୍ରମ ହେଉ କିମ୍ବା ୟୁଟ୍ୟୁବରେ ତାଙ୍କର ପ୍ରବଚନ କିମ୍ବା ଭକ୍ତିଗୀତ। ଅପଲୋଡ କରିବା ମାତ୍ରେ ଅଳ୍ପ ସମୟରେ ଲକ୍ଷ ଲକ୍ଷ ଲୋକ ଏହାକୁ ଦେଖୁଛନ୍ତି। ଲାଗୁଛି ସତେ ଯେପରି ତାଙ୍କ ଭିଡିଓ ଅପଲୋଡକୁ ଲକ୍ଷ ଲକ୍ଷ ଲୋକ ଅପେକ୍ଷା କରି ରହିଥିଲେ। ତାଙ୍କର ଗୀତ ରେକର୍ଡିଂ କରିବା ପାଇଁ ବଡ ବଡ ମ୍ୟୁଜିକ କଂପାନୀ ଲମ୍ବା ଧାଡି ଲଗାଇଛନ୍ତି।
ବର୍ତ୍ତମାନ ଭାରତର କୋଣେ ଅନୁକୋଣେ ଜୟା କିଶୋରୀ ଜୀଙ୍କୁ ପ୍ରବଚନ ଦେବାକୁ ନେବା ପାଇଁ ଲମ୍ବା ଧାଡି ଲାଗି ରହିଛି। ପ୍ରତିଦିନ ତାଙ୍କ ପାଖକୁ ଏତେ ନିମନ୍ତ୍ରଣ ଆସୁଛି ଯାହାକୁ ସେ ପାଞ୍ଚ ବର୍ଷ ଲାଗିଲେ ମଧ୍ୟ ସାରି ପାରିବେ ନାହିଁ। ଯେଉଁମାନଙ୍କୁ ପ୍ରବଚନ ଦେବା ପାଇଁ ଜୟା କିଶୋରୀ ଜୀ ରାଜି ହେଉଛନ୍ତି ସେମାନଙ୍କ ଭାଗ୍ୟ କହିଲେ ନ ସରେ। ସେମାନେ ଭଗବାନଙ୍କ ସାନିଧ୍ୟ ହାସଲ କଲେ ବୋଲି ଭାବି ନିଅନ୍ତି।
ଜୟା କିଶୋରୀ ଜୀ, ବୟସ ମାତ୍ର ୨୭ ବର୍ଷ। ସେ ୧୯୯୬ ମସିହା ଜୁଲାଇ ୧୩ ତାରିଖରେ କୋଲକାତାରେ ଜନ୍ମ ଗ୍ରହଣ କରିଛନ୍ତି। ତାଙ୍କୁ ଯେତେବେଳେ ମାତ୍ର ସାତ ବର୍ଷ ବୟସ ସେତେବେଳେ ସେ ନିଜ ପରିବାର ଲୋକଙ୍କ ପାଖରେ ଭଗବାନଙ୍କ ବାଣୀ କହିବାକୁ ଆରମ୍ଭ କରିଥିଲେ। ତାଙ୍କର ଏପରି ଆଗ୍ରହ ଦେଖି ପରିବାର ତରଫରୁ ଏକ ପ୍ରବଚନର ଆସର ମଧ୍ୟ ଆୟୋଜନ କରାଯାଇଥିଲା।
ଆଶ୍ଚର୍ଯ୍ୟର କଥା ଜୟା କିଶୋରୀ ପିଲାବେଳେ ପୁରା ସାତ ଦିନ ଧରି ଶ୍ରୀମଦ ଭାଗବତ ଗୀତା ଉପରେ ପ୍ରବଚନ ଦେଇ ସମସ୍ତଙ୍କୁ ଚମତକୃତ କରିଦେଇ ଥିଲେ। ଏହାପରେ ସେ ସେତେବେଳେ ବିଭିନ୍ନ ଟେଲିଭିଜନ ଚ୍ୟାନେଲ ତାଙ୍କୁ ପ୍ରବଚନ ଦେବା ପାଇଁ ନିମନ୍ତ୍ରଣ ମଧ୍ୟ କରିଥିଲେ। ଏହାଦ୍ବାରା ଜୟା କିଶୋରୀ ଧିରେ ଧିରେ ସାରା ଭାରତରେ ଜଣେ ପରିଚିତ ପ୍ରବଚକ ପାଲଟି ଗଲେ।
ଜୟା କିଶୋରୀ ଜୀ ଲୋକଙ୍କ ଆଗ୍ରହକୁ ଦେଖି ସେ ଏକ ୟୁଟ୍ୟୁବ ଚ୍ୟାନେଲ ମଧ୍ୟ କରିଛନ୍ତି ଯାହାର ନାମ ରହିଛି Jaya Kishori Motivation’। ଯାହାର ସବସ୍କ୍ରାଇବର ସଂଖ୍ୟା ୯ ଲକ୍ଷ। ସେହିପରି ଇନଷ୍ଟାଗ୍ରାମରେ ମଧ୍ୟ ତାଙ୍କର ଫଲୋଅର ସଂଖ୍ୟା ୫୪ ଲକ୍ଷ ଏବଂ ଟୁଇଟରରେ ପ୍ରାୟ ଲକ୍ଷେ ଫଲୋଅର ଅଛନ୍ତି।