ବ୍ରହ୍ମପୁର: ଆଜି ନିର୍ବାଚନ ପ୍ରଚାରରେ ଆସି ବ୍ରହ୍ମପୁରର ଆମ୍ବପୁଆ ଜନସଭାରେ କର୍ମିଙ୍କୁ ଉତ୍ସାହିତ କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ ପି ନଡ୍ଡା। ନଡ୍ଡା ସେଠାରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ପଦ୍ମଫୁଲରେ ଭୋଟ ଦେବା ପାଇଁ ସମସ୍ତଙ୍କୁ ଅନୁରୋଧ କରିଛନ୍ତି। ଏହି ଅଭିଭାଷଣ ବେଳେ ନଡ୍ଡା ନବୀନଙ୍କ ସଫ୍ଟ ଟାର୍ଗେଟ କରିଛନ୍ତି। ହେଲେ ବିଜେପି ସରକାରର ସଫଳତା ନେଇ ବହୁତ କିଛି କହିଛନ୍ତି।
ନବୀନ ସରକାରଙ୍କୁ ସମାଲୋଚନା କରିବାକୁ ଯାଇ ନଡ୍ଡା କହିଛନ୍ତି ଯେ, ଓଡିଶାରେ ବର୍ତ୍ତମାନ ବାବୁ ଶାସନ ଚାଲିଛି। କେତେକ ମୁଷ୍ଠିମେୟ ଲୋକ ଓଡିଶା ଶାସନକୁ ଜାବୁଡି ଧରିଛନ୍ତି।ଓଡ଼ିଶାରେ ବିରୋଧୀ ହେବା ସତ୍ତ୍ୱେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ରାଜ୍ୟକୁ ଆର୍ଥିକ ବିକାଶ ଦୃଷ୍ଟିରୁ ଅର୍ଥ ଦେବାରେ କୌଣସି ଅଭାବ କରି ନାହାଁନ୍ତି। ଓଡିଶାରେ ନବୀନ ସରକାର ଆୟୁଷ୍ମାନ ଭାରତକୁ ଲାଗୁ କରୁ ନାହାଁନ୍ତି। ହେଲେ ଆପଣମାନେ ଡବଲ ଇଂଜିନ ସରକାର କରନ୍ତୁ ଓଡିଶାର ବିକାଶ ହିଁ ବିକାଶ ହେବ।
ସେଠାରେ ଉପସ୍ଥିତ ଥିବା ଲୋକଙ୍କୁ ଦେଖି ଶ୍ରୀ ନଡ୍ଡା କହିଛନ୍ତି ଯେ, ଆପଣମାନଙ୍କ ଉତ୍ସାହରୁ ଏହା ସ୍ପଷ୍ଟ ହେଉଛି ଯେ, ଏଥର ଓଡ଼ିଶାରେ ସରକାର ବଦଳିବ। ଲୋକେ ବୁଝିଲେଣି ଯେ, ଯେଉଁ ବିକାଶ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଦିଲ୍ଲୀରେ କରୁଛନ୍ତି, ତାହାର ସଠିକ ଭାବେ ରୂପାନ୍ତର କରିବା ପାଇଁ ଓଡ଼ିଶାରେ ମଧ୍ୟ ବିଜେପି ସରକାର କରିବା ଦରକାର। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଭାରତର ରାଜନୀତିର ସଂସ୍କୃତି ଓ ପରିଭାଷାକୁ ବଦଳାଇ ଦେଇଛନ୍ତି । ପୂର୍ବରୁ ମାନସିକତା ଥିଲା ଯେ, ଏହି ଦେଶରେ କିଛି ବଦଳିବ ନାହିଁ, ସବୁ କିଛି ଏଭଳି ଚାଲୁଥିବ। କିନ୍ତୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ତାକୁ ପରିବର୍ତ୍ତନ କରିଦେଇଛନ୍ତି ଏବଂ ଏବେ ଭାରତ ବିକଶିତ ଭାରତ ହେବା ରାସ୍ତାରେ ଅଗ୍ରସର ହେଉଛି।
ପୂର୍ବରୁ ରାଜନୀତି ଧର୍ମ, ଜାତି ନାମରେ ହେଉଥିଲା, କିନ୍ତୁ ପ୍ରଧାନମନ୍ତ୍ରୀ ଶ୍ରୀ ମୋଦି ଭାରତର ରାଜନୀତିକୁ ବିକାଶବାଦ ସହିତ ଯୋଡି ଦେଶକୁ ଆଗକୁ ବଢାଇବାର କାମ କରିଛନ୍ତି । ପ୍ରଧାନମନ୍ତ୍ରୀ ଶ୍ରୀ ମୋଦିଙ୍କ ନେତୃତ୍ୱରେ ଏବେ ଦେଶରେ ବିକାଶ, ରିପୋର୍ଟ କାର୍ଡ, ପ୍ରଦର୍ଶନ, ଉତ୍ତରଦାୟୀ ରାଜନୀତି ହେଉଛି। ଗାଁର ସଡକ ପକ୍କା ସଡକ ସହିତ ଯୋଡି ହୋଇଛି , ୧.୫ ଲକ୍ଷ ପଞ୍ଚାୟତକୁ ଅପ୍ଟିକାଲ ଫାଇବର ସହିତ ଯୋଡା ଯାଉଛି । ଆଜିଠୁ ୨୦ ବର୍ଷ ପୂର୍ବେ ଗୋଟିଏ ପଞ୍ଚାୟତର ବିକାଶ ପାଇଁ ବର୍ଷକୁ ୨.୫-୩ ଲକ୍ଷ ଟଙ୍କା ମିଳୁଥିଲା , କିନ୍ତୁ ଆଜି ଆଦରଣୀୟ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୀଙ୍କ ନେତୃତ୍ୱରେ ଗୋଟିଏ ପଞ୍ଚାୟତକୁ ୩-୫ କୋଟି ଟଙ୍କା ଦିଆଯାଉଛି ।
ଏହି କାର୍ଯ୍ୟକ୍ରମରେ ମଂଚରେ ବିଜେପି ରାଜ୍ୟ ସଭାପତି ମନମୋହନ ସାମଲ, ରାଷ୍ଟ୍ରୀୟ ଉପାଧ୍ୟକ୍ଷ ଓ କେନ୍ଦ୍ରାପଡାରୁ ପ୍ରାର୍ଥୀ ଶ୍ରୀ ବୈଜୟନ୍ତ ପଣ୍ଡା, ବ୍ରହ୍ମପୁରରୁ ଲୋକସଭା ପ୍ରାର୍ଥୀ ଶ୍ରୀ ପ୍ରଦୀପ ପାଣିଗ୍ରାହୀ, ତ୍ରିପୁରାର ପୂର୍ବତନ ମୁଖ୍ୟମନ୍ତ୍ରୀ ଶ୍ରୀ ବିପ୍ଲବ ଦେବ ଏବଂ ସେହି ଆସନ ଅଧିନର ସମସ୍ତ ବିଧାନସଭା ପ୍ରାର୍ଥୀଙ୍କ ସହିତ ପାର୍ଟିର ଅନ୍ୟ ନେତାଗଣ ଉପସ୍ଥିତ ଥିଲେ। ନଡ୍ଡା ଆଜି ବ୍ରହ୍ମପୁରରେ ରାତ୍ରୀଯାପନ କରିବାର କାର୍ଯ୍ୟକ୍ରମ ରହିଛି।