ନୂଆଦିଲ୍ଲୀ: ପୂର୍ବ ଲଦାଖରେ ଗଲୱାନ ସମେତ ଚାରିଟି ପଏଣ୍ଟରୁ ସୈନ୍ୟ ଉତ୍ତେଜନା ସମ୍ପର୍କରେ ଉଲ୍ଲେଖ କରି ଶୁକ୍ରବାର ଦିନ ଚୀନ୍ର ବୈଦେଶିକ ମନ୍ତ୍ରଣାଳୟ କହିଛି ଯେ, ଋଷରେ ହୋଇଥିବା ବୈଠକରେ ଦ୍ୱିପାକ୍ଷିକ ସମ୍ପର୍କର ଉନ୍ନତି ପାଇଁ ମାହୋଲ ସୃଷ୍ଟି କରିବାକୁ ଭାରତ ଏବଂ ଚୀନ୍ ମିଳିତ ଭାବେ କାର୍ଯ୍ୟ କରିବାକୁ ସହମତ ହୋଇଛନ୍ତି।
ଚୀନ୍ର ବୈଦେଶିକ ମନ୍ତ୍ରଣାଳୟ ଦ୍ଵାରା ଜାରି ଏକ ପ୍ରେସ ବିଜ୍ଞପ୍ତି ଅନୁଯାୟୀ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଏବଂ ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି ଗୁରୁବାର ଦିନ ଋଷର ସେଣ୍ଟ ପିଟର୍ସବର୍ଗରେ ବ୍ରିକ୍ସ ସଦସ୍ୟ ଦେଶମାନଙ୍କରେ ସୁରକ୍ଷା ବ୍ୟାପାର ସମ୍ପର୍କରେ ଥିବା ଉଚ୍ଚ ପଦାଧିକାରୀଙ୍କ ବୈଠକରେ ଆଲୋଚନା କରିଛନ୍ତି। ଏହି ସମୟରେ ଉଭୟ ପକ୍ଷ ସୀମା ପ୍ରସଙ୍ଗରେ ସାମ୍ପ୍ରତିକ ଆଲୋଚନାରେ ଅଗ୍ରଗତି ବିଷୟରେ ଆଲୋଚନା କରିଥିଲେ।
ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାଓ ନିଙ୍ଗଙ୍କୁ ଶୁକ୍ରବାର ଦିନ ଏକ ସାମ୍ବାଦିକ ସମ୍ମିଳନୀରେ ପଚରାଯାଇଥିଲା ଯେ, ପୂର୍ବ ଲଦାଖରେ ସାମରିକ ବିବାଦ ହେତୁ ଚାରିବର୍ଷରୁ ଅଧିକ ସମୟ ଧରି ଦ୍ୱିପାକ୍ଷିକ ସମ୍ପର୍କ ଉପରେ ଲାଗିଥିବା ବିରାମ ହଟାଇବାକୁ ଦୁଇ ଦେଶ ଚାହୁଁଛନ୍ତି କି? ଏହା ଉପରେ ମାଓ କହିଛନ୍ତି ଯେ, ଉଭୟ ସୈନ୍ୟ ଚାରି ଅଞ୍ଚଳରୁ ଓହରି ଯାଇଛନ୍ତି ଏବଂ ସୀମାରେ ସ୍ଥିତି ସ୍ଥିର ରହିଛି। ମୁଖପାତ୍ର କହିଛନ୍ତି ଯେ, ନିକଟ ଅତୀତରେ ଉଭୟ ଦେଶର ଫ୍ରଣ୍ଟଲାଇନ ସୈନ୍ୟବାହିନୀ ଗଲୱାନ ଉପତ୍ୟକା ସମେତ ଚୀନ୍-ଭାରତ ସୀମାର ପଶ୍ଚିମ ସେକ୍ଟରର ଚାରି ପଏଣ୍ଟରୁ ବିବାଦ ସମାପ୍ତ କରିଛନ୍ତି। ଚୀନ୍-ଭାରତ ସୀମାରେ ପରିସ୍ଥିତି ସାଧାରଣତଃ ସ୍ଥିର ଏବଂ ନିୟନ୍ତ୍ରଣରେ ଅଛି।
ଜେନେଭାରେ ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ବିବୃତ୍ତିର ଗୋଟିଏ ଦିନ ପରେ ତାଙ୍କର ଏହି ମନ୍ତବ୍ୟ ଆସିଛି। ଜୟଶଙ୍କର କହିଛନ୍ତି ଯେ, ଚୀନ୍ ସହ ସୈନ୍ୟ ପ୍ରତ୍ୟାହାର ସହ ଜଡିତ ପ୍ରାୟ ୭୫% ସମସ୍ୟାର ସମାଧାନ ହୋଇଛି, କିନ୍ତୁ ବଡ଼ ପ୍ରସଙ୍ଗ ହେଉଛି ସୀମାରେ ସାମରିକକରଣ ବୃଦ୍ଧି ପାଇବା। ଭାରତ-ଚୀନ୍ ସୀମା ଆଲୋଚନା ପ୍ରକ୍ରିୟା ପାଇଁ ଡୋଭାଲ୍ ଏବଂ ୱାଙ୍ଗ ସ୍ୱତନ୍ତ୍ର ପ୍ରତିନିଧୀ ଅଟନ୍ତି। ଡୋଭାଲ ଏବଂ ୱାଙ୍ଗଙ୍କ ମଧ୍ୟରେ ହୋଇଥିବା ବୈଠକର ବିବରଣୀ ପ୍ରଦାନ କରି ଚୀନ୍ର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ, ଚୀନ୍-ଭାରତ ସମ୍ପର୍କର ସ୍ଥିରତା ଦୁଇ ଦେଶ ତଥା ଆଞ୍ଚଳିକ ଲୋକଙ୍କ ଦୀର୍ଘମିଆଦୀ ସ୍ୱାର୍ଥରେ ତଥା ଆଞ୍ଚଳିକ ଶାନ୍ତି ଏବଂ ବିକାଶ ପାଇଁ ଅନୁକୂଳ ରହିଛି।
ଏଥିରେ କୁହାଯାଇଛି ଯେ, ଦୁଇ ଦେଶର ସରକାରଙ୍କ ମୁଖ୍ୟଙ୍କ ମଧ୍ୟରେ ହୋଇଥିବା ସହମତିକୁ କାର୍ଯ୍ୟକାରୀ କରିବା, ପାରସ୍ପରିକ ବୁଝାମଣା ଏବଂ ବିଶ୍ୱାସକୁ ବଢାଇବା, ନିରନ୍ତର ଯୋଗାଯୋଗ ବଜାୟ ରଖିବା ଏବଂ ଦ୍ୱିପାକ୍ଷିକ ସମ୍ପର୍କକୁ ପ୍ରୋତ୍ସାହିତ କରିବା ପାଇଁ ଏକ ପରିବେଶ ସୃଷ୍ଟି କରିବାକୁ ଚୀନ୍ ଏବଂ ଭାରତ ସହମତ ହୋଇଛନ୍ତି।