ନୂଆଦିଲ୍ଲୀ: ଫତିମା ଖାନଙ୍କୁ ମହାରାଷ୍ଟ୍ର ଏଟିଏସ ଦ୍ୱାରା ଉଲାହସନଗରରୁ ଗିରଫ କରାଯାଇଛି। ପଚରାଉଚରା ବେଳେ ଏହା ଜଣାପଡିଛି ଯେ, ୨୪ ବର୍ଷିୟା ଫତିମା ଆଇଟି ରେ ବି.ଏସ୍.ସି କରିଛନ୍ତି ଏବଂ ତାଙ୍କର ମାନସିକ ଅବସ୍ଥା ଠିକ୍ ନାହିଁ। ଫତିମା ଗିରଫ ହେବା ପରେ ସୁରକ୍ଷା ଏଜେନ୍ସିମାନେ ଦୀର୍ଘ ନିଶ୍ୱାସ ତ୍ୟାଗ କରିଛନ୍ତି।
ରବିବାର ସକାଳେ ଖବର ଆସିଲା ଯେ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ବାବା ସିଦ୍ଦିକିଙ୍କ ଭଳି ହତ୍ୟା ଧମକ ଦିଆଯାଉଛି। ଯେଉଁଥିରେ ଲେଖାଥିଲା ଯେ, ଯଦି ଯୋଗୀ ଆଦିତ୍ୟନାଥ ୧୦ ଦିନରେ ଇସ୍ତଫା ନ ଦିଅନ୍ତି, ତେବେ ଆମେ ତାଙ୍କୁ ବାବା ସିଦ୍ଦିକିଙ୍କ ପରି ହତ୍ୟା କରିବୁ।
ମହାରାଷ୍ଟ୍ର ପୋଲିସ ଏହି ବାର୍ତ୍ତା ପାଇଥିଲା। ଏହା ପରେ ଉତ୍ତରପ୍ରଦେଶ ପୋଲିସକୁ ତୁରନ୍ତ ସତର୍କ କରାଯାଇଥିଲା। ମୁଖ୍ୟମନ୍ତ୍ରୀ ଯୋଗୀଙ୍କୁ ଏହି ଧମକ ମିଳିବା ପରେ ଉତ୍ତେଜନା ଦେଖାଦେଇଥିଲା। ଏହା ପରେ ପୋଲିସ ଏହି ଘଟଣାରେ ତତ୍ପରତା ପ୍ରକାଶ କରି ତୁରନ୍ତ ତଦନ୍ତ ଆରମ୍ଭ କରିଥିଲା। ମହାରାଷ୍ଟ୍ର ଏଟିଏସ୍, ଥାନେ ପୋଲିସ ଏବଂ ମୁମ୍ବାଇର ୱର୍ଲି ପୋଲିସ ତଦନ୍ତ ଆରମ୍ଭ କରିଛି।
ଏଟିଏସ୍ ନିଜେ ମହିଳାଙ୍କ ଠିକଣା ଖୋଜିଥିଲା। ପ୍ରକାଶ ଯେ, ମହିଳା ଜଣକ ଥାନାର ଉଲାହସନଗରରେ ରୁହନ୍ତି। ଯେତେବେଳେ ଏଟିଏସ୍ ସେଠାରେ ପହଞ୍ଚିଲା ସେତେବେଳେ ଦେଖାଗଲା ଯେ ସେ ମାନସିକ ସ୍ତରରେ ସ୍ଥିର ନୁହଁନ୍ତି। ନିୟମ ଅନୁଯାୟୀ ତାଙ୍କୁ ସ୍ଥାନୀୟ ପୋଲିସ ଷ୍ଟେସନକୁ ଅଣାଯାଇ ପଚରାଉଚରା କରାଯାଇଥିଲା ଏବଂ ପରେ ୱର୍ଲି ପୋଲିସକୁ ସୂଚନା ଦିଆଯାଇଥିଲା।
ୱର୍ଲି ପୋଲିସ ଫତିମାଙ୍କୁ ମୁମ୍ବାଇ ଆଣିଥିଲା କାରଣ ତାଙ୍କ ମାନସିକ ସ୍ୱାସ୍ଥ୍ୟ ଭଲ ନ ଥିବାରୁ ତାଙ୍କୁ ଗିରଫ କରାଯାଇ ନାହିଁ। ତାଙ୍କୁ ମାନସିକ ସ୍ତରରେ ପରୀକ୍ଷା କରାଯିବ। ତାଙ୍କୁ ଧରିବା ପରେ ପୋଲିସ ନୋଟିସ ଦେଇଥିଲା।
ଫତିମାଙ୍କ ପିତା ଜଣେ ବ୍ୟବସାୟୀ। ପୋଲିସର କହିବାନୁସାରେ, ଫତିମା ଶିକ୍ଷିତ, କିନ୍ତୁ ମାନସିକ ସ୍ତରରେ ଭଲ ନୁହେଁ। କାହିଁକି ସେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହତ୍ୟା କରିବେ ବୋଲି ଧମକ ଦେଇଛନ୍ତି ତାହା ଏପର୍ଯ୍ୟନ୍ତ ଜଣା ପଡିନାହିଁ।