ଭୁବନେଶ୍ବର: ନୂଆ ବର୍ଷରେ ନୂଆ ମଙ୍ଗୁଆଳ ଖୋଜିବାରେ ଲାଗିଛି ଓଡିଶାର ତିନି ପ୍ରମୁଖ ଦଳ। ବିଜେଡି ବିଜେପି ଏବଂ କଂଗ୍ରେସ ଦଳର ନୂଆ ସଭାପତି ଏହି ନୂଆ ବର୍ଷରେ ଘୋଷଣା ହେବ। ସେଥିପାଇଁ 2025 ମସିହାରୁ ଦଳ କାହା ନେତୃତ୍ବରେ ଆଗକୁ ଯିବ ସେ ନେଇ ଅଙ୍କକଷା ଚାଲିଛି।
ଦଳିୟ ନିୟମ ଅନୁସାରେ ଜାତୀୟ ବିଜେପି ଦଳ ତାହାର ତ୍ରୁଣମୂଳ ନିର୍ବାଚନ କରିଥିବା ବେଳେ ଜିଲ୍ଲା ସ୍ତରୀୟ ନିର୍ବାଚନ ବାକି ରହିଛି। ତାହା ଶେଷ ହେବା ପରେ ପରେ ରାଜ୍ୟ ସଭାପତି କିଏ ହେବ ସେ ନେଇ ନିର୍ବାଚନ କିମ୍ବା ମନୋନୟନ କରାଯିବ। ଏଥିରେ ବର୍ତ୍ତମାନର ସଭାପତି ମନମୋହନ ସାମଲ ରିପିଟ ହେବେ ନା ନୂଆ ନେତା ଆସିବେ ସେ ନେଇ କଳ୍ପନା ଜଳ୍ପନା ପ୍ରକାଶ ପାଇଛି।
ସେହିପରି କଂଗ୍ରେସ ନିର୍ବାଚନରେ ବଡ ଧକ୍କା ଖାଇବା ପରେ ସଭାପତି ପଦରୁ ଇସ୍ତଫା ଦେଇଛନ୍ତି ଶରତ ପଟ୍ଟନାୟକ। ଏହାପରେ କଂଗ୍ରେସର ସଭାପତି କିଏ ହେବ ସେ ନେଇ କଳ୍ପନା ଜଳ୍ପନା ପ୍ରକାଶ ପାଇଛି। ଦୀର୍ଘ ମାସ ବିତିଯାଇଥିଲେ ମଧ୍ୟ କଂଗ୍ରେସର କିଏ ସଭାପତି ହେବ ତାହା ଏ ପର୍ଯ୍ୟନ୍ତ ନିଷ୍ପତି ହୋଇପାରୁ ନାହିଁ।
ସଭାପତି ବାଛିବା ପାଇଁ ଏକ କମିଟ ମଧ୍ୟ ଗଠନ ହୋଇଛି। ସେ କମିଟ ଅନୁଧ୍ୟାନ କରିସାରି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ କିଏ ସଭାପତି ହେବ ତାହା ଘୋଷଣା କରାଯାଇ ପାରୁ ନାହିଁ। ତେବେ ଦଳର ବରିଷ୍ଠ ନେତାଙ୍କ ଅନୁସାରେ ନୂଆ ବର୍ଷରେ ନୂଆ ସଭାପତିଙ୍କ ନାମ ଘୋଷଣା ହେବ ବୋଲି କହିଛନ୍ତି।
ସେହିପରି ଓଡିଶାର ଆଞ୍ଚଳିକ ଦଳ ବିଜେଡି ମଧ୍ୟ ନିଜର ମଙ୍ଗୁଆଳଙ୍କୁ ନେଇ ସନ୍ଦେହରେ ପଡିଯାଇଛି। କାରଣ ଭି କେ ପାଣ୍ଡିଆନ ଦଳର ସବୁକିଛି ବୁଝୁଥିଲେ। ହେଲେ ତାଙ୍କ ପାଇଁ ଦଳ ବିପର୍ଯ୍ୟୟ ହେବା ପରେ ସେ ନିଜେ ରାଜନୀତିରୁ ସନ୍ୟାସ ନେଲେ ବୋଲି ଘୋଷଣା କରିଛନ୍ତି। ଫଳରେ ନବୀନଙ୍କ ପରେ କିଏ ଦଳ ସମ୍ଭାଳିବ ତାହାକୁ ନେଇ ସବୁ ମହଲରେ ଚର୍ଚ୍ଚା ଚାଲିଛି। ଯାହା ଜଣାପଡୁଛି ନବୀନ ନିଜେ ଏହି ଜାନୁୟାରୀରେ ଏକ ସ୍ପଷ୍ଟ ସୂଚନା ପ୍ରଦାନ କରିବେ।