ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଜଗତ ପ୍ରକାଶ ନଡ୍ଡା ଆଜି ୧୩ଟି ଚିହ୍ନଟ ହୋଇଥିବା ଏଲଏଫ ପ୍ରଭାବିତ ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ଏବଂ ବରିଷ୍ଠ ଅଧିକାରୀଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ ଲିମ୍ଫାଟିକ୍ ଫାଇଲେରିଆସିସ୍ (ଏଲଏଫ୍) ଉଚ୍ଛେଦ ପାଇଁ ବାର୍ଷିକ ଦେଶବ୍ୟାପୀ ଗଣ ଔଷଧ ବିତରଣ (ଏମଡିଏ) ଅଭିଯାନର ଶୁଭାରମ୍ଭ କରିଛନ୍ତି। ଅଂଶଗ୍ରହଣକାରୀମାନଙ୍କୁ ଏହି ଅଭିଯାନ, ଏହାର ଉଦ୍ଦେଶ୍ୟ, ଗ୍ରହଣ କରାଯାଉଥିବା ପ୍ରମୁଖ ରଣନୈତିକ କାର୍ଯ୍ୟକଳାପ ଏବଂ ଏମଡିଏ କାର୍ଯ୍ୟକ୍ରମର ଉଚ୍ଚ କଭରେଜ୍ ଏବଂ ଅନୁପାଳନ ସୁନିଶ୍ଚିତ କରିବାରେ ଅଂଶଗ୍ରହଣକାରୀ ରାଜ୍ୟଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ବିଷୟରେ ଅବଗତ କରାଯାଇଥିଲା। ଏହି ଅଭିଯାନରେ ୧୩ଟି ରାଜ୍ୟର ୧୧୧ଟି ପ୍ରଭାବିତ ଜିଲ୍ଲାକୁ ଅନ୍ତର୍ଭୁକ୍ତ କରାଯାଇଛି, ଯେଉଁଠାରେ ଘରକୁ ଘର ବୁଲି ଫାଇଲେରିଆ ନିବାରଣ ଔଷଧ ଦିଆଯାଉଛି।
ଏହି କାର୍ଯ୍ୟକ୍ରମରେ ଆନ୍ଧ୍ରପ୍ରଦେଶର ସତ୍ୟ କୁମାର ଯାଦବ, ଆସାମରୁ ଅଶୋକ ସିଂଘଲ, ଛତିଶଗଡ଼ର ଶ୍ୟାମ ବିହାରୀ ଜୟସ୍ୱାଲ, ଗୁଜରାଟରୁ ଋଷିକେଶ ଗଣେଶଭାଇ ପଟେଲ, ଝାଡ଼ଖଣ୍ଡର ଇରଫାନ ଅନସାରୀ, କର୍ଣ୍ଣାଟକର ଦିନେଶ ଗୁଣ୍ଡୁ ରାଓ, ମଧ୍ୟପ୍ରଦେଶର ରାଜେନ୍ଦ୍ର ଶୁକ୍ଳା, ଓଡ଼ିଶାର ମୁକେଶ ମହାଲିଙ୍ଗ, ବିହାରର ମଙ୍ଗଳ ପାଣ୍ଡେ, ମହାରାଷ୍ଟ୍ରରୁ ପ୍ରକାଶ ରାଓ ଅବିତ୍କାର ଏବଂ ଉତ୍ତରପ୍ରଦେଶରୁ ବ୍ରିଜେଶ ପାଠକ ପ୍ରମୁଖ ଯୋଗ ଦେଇଥିଲେ।
ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଅଧୀନରେ ଥିବା ନ୍ୟାସନାଲ ଭେକ୍ଟର ବର୍ଣ୍ଣ ଡିଜିଜ୍ କଣ୍ଟ୍ରୋଲ ସେଣ୍ଟର (ଏନଭିବିଡିସିପି) ଦ୍ୱାରା ପରିଚାଳିତ ଭାରତର ଲିମ୍ଫେଟିକ୍ ଫାଇଲେରିଆସିସ୍ ଉଚ୍ଛେଦ ରଣନୀତିର ଏକ ପ୍ରମୁଖ ଉପାଦାନ ହେଉଛି ଏମଡିଏ ଅଭିଯାନ। ଏହି ରୋଗଦ୍ୱାରା ପ୍ରଭାବିତ ପ୍ରତ୍ୟେକ ବ୍ୟକ୍ତି ଯେପରି ନିର୍ଦ୍ଧାରିତ ଔଷଧ ସେବନ କରନ୍ତି ତାହା ସୁନିଶ୍ଚିତ କରିବା ପାଇଁ ଏହି କାର୍ଯ୍ୟକ୍ରମରେ ଘରକୁ ଘର ବୁଲି ଆଣ୍ଟି-ଫାଇଲେରିଆଲ ଔଷଧ ବଣ୍ଟନ ଉପରେ ଗୁରୁତ୍ୱ ଦିଆଯାଉଛି। ଲିମ୍ଫେଟିକ୍ ଫାଇଲେରିଆସିସକୁ ସାଧାରଣ ଓଡ଼ିଆରେ “ଗୋଦର” ବୋଲି କୁହାଯାଏ, ଏହା ସଂକ୍ରମିତ ମଶାମାନଙ୍କ ଦ୍ୱାରା ବ୍ୟାପିଥିବା ଏକ ପରଜୀବୀ ରୋଗ। ଏହା ଦ୍ୱାରା ଲିମ୍ଫେଡେମା (ଅଙ୍ଗ ଫୁଲିବା) ଏବଂ ହାଇଡ୍ରୋସିଲ (ଅଣ୍ଡକୋଷ ଫୁଲିବା) ଭଳି ଶାରୀରିକ ଅକ୍ଷମତା ଦେଖାଦେଇପାରେ, ଯାହା ପ୍ରଭାବିତ ବ୍ୟକ୍ତି ଏବଂ ପରିବାର ଉପରେ ଦୀର୍ଘକାଳୀନ ବୋଝ ପକାଇଥାଏ।
ଏହି ଅବସରରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ କହିଥିଲେ, “ଭାରତକୁ ଲିମ୍ଫେଟିକ୍ ଫାଇଲେରିଆସିସ୍ ମୁକ୍ତ କରିବା ଆମର ପ୍ରତିଶ୍ରୁତି। ଏହି ଲକ୍ଷ୍ୟ ହାସଲ ପାଇଁ ପ୍ରତ୍ୟେକ ନାଗରିକଙ୍କ ଅଂଶଗ୍ରହଣ ଏବଂ ସକ୍ରିୟ ସମୁଦାୟ ସମ୍ପୃକ୍ତି ଆବଶ୍ୟକ। ମିଳିତ ଦାୟିତ୍ୱବୋଧ ସହିତ ଆମେ ଲକ୍ଷ ଲକ୍ଷ ଲୋକଙ୍କ ସୁରକ୍ଷା ସୁନିଶ୍ଚିତ କରିବା ସହିତ ଲିମ୍ଫେଟିକ୍ ଫାଇଲେରିଆସିସକୁ ଦୂର କରିପାରିବା। ଆମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦକ୍ଷ ନେତୃତ୍ୱରେ ଏହି ଅଭିଯାନ ଜନଭାଗିଦାରୀ ଭାବନା ଦ୍ୱାରା ପରିଚାଳିତ ହେବ, ଯାହା ଏକ ଜନ ଆନ୍ଦୋଳନରେ ପରିଣତ ହେବ । ସକ୍ରିୟ ସମୁଦାୟ ଅଂଶଗ୍ରହଣ ଏବଂ ସାମୂହିକ ଦାୟିତ୍ବ ଭାବନା ଦ୍ୱାରା ଭାରତ ଲିମ୍ଫେଟିକ୍ ଫାଇଲେରିଆସିସକୁ ଦୂର କରିପାରିବ ଏବଂ ଲକ୍ଷ ଲକ୍ଷ ଲୋକ ଏହି ରୋଗରୁ ସୁରକ୍ଷିତ ରହିବା ସୁନିଶ୍ଚିତ କରିପାରିବ।
ସେ କହିଥିଲେ ଯେ ଲିମ୍ଫେଟିକ୍ ଫାଇଲେରିଆସିସ୍ ଲୋକଙ୍କୁ ଅକ୍ଷମ କରିଥାଏ ଏବଂ ସେମାନଙ୍କ ଜୀବନର ମାନକୁ ଖରାପ କରିଥାଏ। ଏହି ପରିପ୍ରେକ୍ଷୀରେ ୨୦୩୦ ନିରନ୍ତର ବିକାଶ ଲକ୍ଷ୍ୟ ପୂର୍ବରୁ ଏହି ରୋଗର ନିରାକରଣ ସୁନିଶ୍ଚିତ କରିବା ପାଇଁ ଏକ ପାଞ୍ଚସୁତ୍ରୀ ରଣନୀତି କାର୍ଯ୍ୟକାରୀ କରିବାକୁ ଶ୍ରୀ ନଡ୍ଡା ଆହ୍ୱାନ ଦେଇଥିଲେ। ୧୩ଟି ରାଜ୍ୟର ୧୧୧ଟି ଜିଲ୍ଲାରେ ବର୍ଷକୁ ଦୁଇଥର ହେଉଥିବା ଏମଡିଏ ଅଭିଯାନରେ ଯେପରି କେହି ବାଦ୍ ନ ପଡ଼ିବେ ସେଥିପ୍ରତି ସେ ଗୁରୁତ୍ୱାରୋପ କରିଥିଲେ। ସେ କହିଥିଲେ, ଫେବ୍ରୁଆରି ୧୦ ତାରିଖରୁ ଏହି ରୋଗ ପାଇଁ ଚିହ୍ନଟ ହୋଇଥିବା ଜିଲ୍ଲାର ୧୭୫ ନିୟୁତରୁ ଅଧିକ ଲୋକଙ୍କୁ ଏହି ଔଷଧ ମାଗଣାରେ ଉପଲବ୍ଧ ହେବ। ଏହି ଅଞ୍ଚଳର ବାସିନ୍ଦାମାନେ ଏହି ଔଷଧ ସେବନ କରିବା ସହ ଏହି ଦୁର୍ବଳ ରୋଗରୁ ନିଜକୁ ଓ ନିଜ ପରିବାରକୁ ରକ୍ଷା କରିବା ଜରୁରୀ। ସେ ଉଚ୍ଚ କଭରେଜ୍ ହାସଲ କରିବାର ଗୁରୁତ୍ୱ ଉପରେ ଆଲୋକପାତ କରି କହିଲେ, “ଚିହ୍ନଟ ହୋଇଥିବା ଜିଲ୍ଲାଗୁଡ଼ିକ ନିଶ୍ଚିତ କରନ୍ତୁ ଯେ ୯୦ ପ୍ରତିଶତରୁ ଅଧିକ ଯୋଗ୍ୟ ଲୋକ ଆଣ୍ଟି-ଫାଇଲେରିଆଲ୍ ଔଷଧ ସେବନ କରିବେ। ଆମର ସାମୂହିକ ପ୍ରତିବଦ୍ଧତା ଏବଂ ସଂକଳ୍ପ ଜୀବନକୁ ପରିବର୍ତ୍ତନ କରିବାରେ ସହାୟକ ହେବ ଏବଂ ଲିମ୍ଫାଟିକ୍ ଫାଇଲେରିଆସିସ୍ ମୁକ୍ତ ଭବିଷ୍ୟତ ସୁନିଶ୍ଚିତ କରିବ।
କ୍ଷତିଗ୍ରସ୍ତ ବ୍ୟକ୍ତିଙ୍କୁ ତୁରନ୍ତ ଚିହ୍ନଟ କରିବା ପାଇଁ ରାଜ୍ୟସ୍ତରରେ ଏହି ଅଭିଯାନ ଉପରେ ନଜର ରଖିବାକୁ ଶ୍ରୀ ନଡ୍ଡା ରାଜ୍ୟ/କେନ୍ଦ୍ର ଶାସିତ ଅଞ୍ଚଳଗୁଡ଼ିକୁ ଅନୁରୋଧ କରିଛନ୍ତି। ଏଥିପାଇଁ ଚିହ୍ନଟ ହୋଇଥିବା ରାଜ୍ୟ/ଜିଲ୍ଲା ସ୍ତରରେ ରାଜନୈତିକ ଓ ପ୍ରଶାସନିକ ନେତୃତ୍ୱଙ୍କ ବ୍ୟକ୍ତିଗତ ସମ୍ପୃକ୍ତି ପାଇଁ ସେ ଆହ୍ୱାନ ଦେଇଛନ୍ତି।
ଏହି ଅଭିଯାନ ସହ ଜଡିତ କାର୍ଯ୍ୟକଳାପକୁ ସମର୍ଥନ କରିବା ପାଇଁ ବିଭିନ୍ନ ମନ୍ତ୍ରଣାଳୟ ଏବଂ ବିଭାଗକୁ ସାମିଲ କରି ଏକ ବ୍ୟାପକ ସରକାରୀ ଆଭିମୁଖ୍ୟ ଗ୍ରହଣ କରିବା ଉପରେ କେନ୍ଦ୍ରମନ୍ତ୍ରୀ ଗୁରୁତ୍ୱାରୋପ କରିଥିଲେ । ଏହି ସମନ୍ବିତ ଆଭିମୁଖ୍ୟ ସହ ସହଯୋଗୀ ମନ୍ତ୍ରଣାଳୟଗୁଡ଼ିକରେ ଉଚ୍ଚସ୍ତରୀୟ ଓକିଲାତି ଆନ୍ତଃକ୍ଷେତ୍ରୀୟ ସମନ୍ୱୟକୁ ପ୍ରୋତ୍ସାହିତ କରିବ ବୋଲି ସେ ଆଲୋକପାତ କରିଥିଲେ।
ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ ପ୍ରଭାବଶାଳୀ ଆଇଇସି କାର୍ଯ୍ୟକଳାପ କାର୍ଯ୍ୟକାରୀ କରିବାକୁ ଶ୍ରୀ ନଡ୍ଡା ରାଜ୍ୟମାନଙ୍କୁ ଅନୁରୋଧ କରିଥିଲେ। ବ୍ୟାପକ ପ୍ରଚାର ପ୍ରସାର ପାଇଁ ଡିଜିଟାଲ ଟେକ୍ନୋଲୋଜିକୁ ଗ୍ରହଣ କରିବାକୁ ସେ ଆହ୍ୱାନ ଦେଇଥିଲେ। ଏହି ଅବସରରେ ସେ ଉତ୍ତରପ୍ରଦେଶ ଓ ଓଡ଼ିଶାରେ ହୋଇଥିବା ଭଲ କାର୍ଯ୍ୟ ସମ୍ପର୍କରେ ଆଲୋକପାତ କରିବା ସହ ଡିଜିଟାଲ ଟେକ୍ନୋଲୋଜିର ପ୍ରଭାବଶାଳୀ ବ୍ୟବହାରକୁ ପ୍ରଶଂସା କରିଥିଲେ।
ଶ୍ରୀ ନଡ୍ଡା ରାଜ୍ୟ ସ୍ୱାସ୍ଥ୍ୟମନ୍ତ୍ରୀଙ୍କ ରାଜନୈତିକ ଅଂଶଗ୍ରହଣ ଉପରେ ଗୁରୁତ୍ୱାରୋପ କରିଥିଲେ। ଅନ୍ୟ ନିର୍ବାଚିତ ପ୍ରତିନିଧି, ବିଶେଷକରି ସଂସଦ ଓ ବିଧାନସଭା ଓ ପରିଷଦର ସଦସ୍ୟ ତଥା ସ୍ଥାନୀୟ ସ୍ୱୟଂ ଶାସିତ ମାନଙ୍କୁ ଏଥିରେ ସାମିଲ କରିବା ଏବଂ ଏମଡିଏ କାର୍ଯ୍ୟକଳାପର ପ୍ରଭାବଶାଳୀ କାର୍ଯ୍ୟକାରିତା ସୁନିଶ୍ଚିତ କରିବା ପାଇଁ ଜନସମୁଦାୟକୁ ସଂଗଠିତ କରିବାରେ ସେମାନଙ୍କ ସକ୍ରିୟ ଅଂଶଗ୍ରହଣକୁ ପ୍ରୋତ୍ସାହିତ କରିବାକୁ ସେ ସେମାନଙ୍କୁ ଅନୁରୋଧ କରିଥିଲେ ।
ଶ୍ରୀ ନଡ୍ଡା କହିଛନ୍ତି ଯେ ଉନ୍ନତ ସ୍ବ-ଚିକିତ୍ସା ପାଇବା ପାଇଁ ଆୟୁଷ୍ମାନ ଆରୋଗ୍ୟ ମନ୍ଦିର (ଏଏଏମ) ସୁବିଧାରେ ଏମଏମଡିପି ସେବାକୁ ସମ୍ପୂର୍ଣ୍ଣ ଭାବରେ ସଂଯୋଜିତ କରିବାକୁ ପ୍ରୟାସ ଚାଲିଛି ଏବଂ ବାର୍ଷିକ ପ୍ରାୟ ୫୦% ଲିମ୍ଫୋଡିମା ରୋଗୀଙ୍କୁ ମର୍ବିଡିଟି ମ୍ୟାନେଜମେଣ୍ଟ ଆଣ୍ଡ ଡିସେବିଲିଟି ପ୍ରିଭେନସନ (ଏମଏମଡିପି) କିଟ୍ ମିଳିଥାଏ । ସେ ଉଲ୍ଲେଖ କରିଛନ୍ତି ଯେ ଏନଏଚଏମ ଅଧୀନରେ ହାଇଡ୍ରୋସେଲେକ୍ଟୋମି ଅସ୍ତ୍ରୋପଚାରର ବ୍ୟବସ୍ଥା ରହିଛି ଏବଂ ପିଏମଜେଏୱାଇ ଯୋଜନାରେ ହିତାଧିକାରୀଙ୍କ ପାଇଁ ଏକ ବିକଳ୍ପ ଭାବରେ ହାଇଡ୍ରୋସେଲେକ୍ଟୋମି ମଧ୍ୟ ପ୍ରଦାନ କରାଯାଇଛି । ସେ ଉଲ୍ଲେଖ କରିଛନ୍ତି ଯେ ୨୦୨୪ରେ ଚିହ୍ନଟ ହୋଇଥିବା ରାଜ୍ୟଗୁଡ଼ିକରେ ପାଖାପାଖି ୫୦ ପ୍ରତିଶତ ହାଇଡ୍ରୋସିଲ୍ ଅସ୍ତ୍ରୋପଚାର କରାଯାଇଥିଲା। ଏହି ପ୍ରୟାସ ମାଧ୍ୟମରେ ଆରୋଗ୍ୟ ମନ୍ଦିର ଏଲଏଫର ବୋଝ ହ୍ରାସ କରିବା, ପ୍ରଭାବିତ ବ୍ୟକ୍ତିମାନଙ୍କୁ ସୁସ୍ଥ ଜୀବନ ଯାପନ କରିବା ଏବଂ ରୋଗ ମୁକ୍ତ ବିକଶିତ ଭାରତର ସ୍ୱପ୍ନକୁ ପ୍ରୋତ୍ସାହିତ କରିବାରେ ସାହାଯ୍ୟ କରିବ ବୋଲି ସେ ଗୁରୁତ୍ୱାରୋପ କରିଥିଲେ ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ତାଙ୍କ ଅଭିଭାଷଣର ଶେଷରେ ଏହି ରୋଗର ଫଳପ୍ରଦ ଚିକିତ୍ସାର ଗୁରୁତ୍ୱକୁ ଦୋହରାଇଥିଲେ। ଏହି ରୋଗରେ ମୃତ୍ୟୁ ହାର ବହୁତ ଅଧିକ। ଏହା ଏକ ଶେଷ ଚ୍ୟାଲେଞ୍ଜ ବୋଲି ଉଲ୍ଲେଖ କରି ସେ ସ୍ୱାସ୍ଥ୍ୟକର୍ମୀମାନଙ୍କୁ ତୃଣମୂଳ ସ୍ତରରୁ ଲକ୍ଷ୍ୟଭିତ୍ତିକ ଭାବେ କାର୍ଯ୍ୟ କରିବାକୁ ଅନୁରୋଧ କରିଥିଲେ। ସେ କହିଥିଲେ, ଲିମ୍ଫାଟିକ୍ ଫାଇଲେରିଆସିସକୁ ଦୂର କରିବା ପାଇଁ ଭାରତ ନିଜର ପ୍ରତିଶ୍ରୁତିବଦ୍ଧତାରେ ଅଟଳ ରହିଛି ଏବଂ ଆଗକୁ ମଧ୍ୟ ଦୃଢ଼ତାର ସହ ଠିଆ ହେବ। ଆମର ସଂକଳ୍ପ ହେଉଛି ୨୦୨୭ ସୁଦ୍ଧା ଲିମ୍ଫେଟିକ୍ ଫାଇଲେରିଆସିସରୁ ନିଜକୁ ମୁକ୍ତ କରିବାର ଲକ୍ଷ୍ୟ ହାସଲ କରିବା।
ଏମଡିଏ ବିଷୟରେ:
ଆନ୍ଧ୍ରପ୍ରଦେଶ, ଆସାମ, ବିହାର, ଛତିଶଗଡ଼, ଗୁଜରାଟ, ଝାଡ଼ଖଣ୍ଡ, କର୍ଣ୍ଣାଟକ, କେରଳ, ମଧ୍ୟପ୍ରଦେଶ, ମହାରାଷ୍ଟ୍ର, ଓଡ଼ିଶା, ଉତ୍ତରପ୍ରଦେଶ ଏବଂ ପଶ୍ଚିମବଙ୍ଗ ଭଳି ୧୩ଟି ରୋଗ ପ୍ରଭାବିତ ରାଜ୍ୟର ୧୧୧ଟି ଜିଲ୍ଲାକୁ ଏମଡିଏ ଅଭିଯାନ ଅନ୍ତର୍ଭୁକ୍ତ କରିବ। ବ୍ୟାପକ ପ୍ରତିଷେଧକ ରଣନୀତି ଏବଂ ସଚେତନତା ବୃଦ୍ଧି ମାଧ୍ୟମରେ ଏମଡିଏର ବ୍ୟାପକ ଅନୁପାଳନ ସୁନିଶ୍ଚିତ କରି ଲିମ୍ଫେଟିକ୍ ଫାଇଲେରିଆକୁ ଦୂର କରିବା ପାଇଁ ସରକାରଙ୍କ ଅତୁଟ ପ୍ରତିବଦ୍ଧତାକୁ ଏହି ଅଭିଯାନ ଦୋହରାଇଛି।
ମାସ୍ ଡ୍ରଗ୍ ଆଡ୍ମିନିଷ୍ଟ୍ରେସନ୍ (ଏମଡିଏ) ଅଭିଯାନରେ ଏଲଏଫ ପ୍ରଭାବିତ ଅଞ୍ଚଳର ସମସ୍ତ ଯୋଗ୍ୟ ବ୍ୟକ୍ତିଙ୍କ ଠାରେ ଲକ୍ଷଣ ଦେଖାଯାଉ କି ନ ହେଉ ସେମାନଙ୍କୁ ଆଣ୍ଟି-ଫାଇଲେରିୟଲ ଔଷଧ ଯୋଗାଇ ଦିଆଯାଉଛି। ଔଷଧ ଚିକିତ୍ସା ମଧ୍ୟରେ ରହିଛି:
ଡବଲ୍ ଡ୍ରଗ୍ ରେଜିମେନ୍ (ଡିଏ): ଡାଇଥାଇଲକାର୍ବାମାଜିନ୍ ସାଇଟ୍ରେଟ୍ (ଡିଇସି) ଏବଂ ଆଲବେଣ୍ଡାଜୋଲ
ଟ୍ରିପଲ ଡ୍ରଗ୍ ରେଜିମେନ୍ (ଆଇଡିଏ): ଆଇଭର୍ମେକ୍ଟିନ୍, ଡାଇଥାଇଲକାର୍ବାମାଜିନ୍ ସାଇଟ୍ରେଟ୍ (ଡିଇସି) ଏବଂ ଆଲବେଣ୍ଡାଜୋଲ।
ଏମଡିଏର ଲକ୍ଷ୍ୟ ହେଉଛି ସଂକ୍ରମିତ ବ୍ୟକ୍ତିଙ୍କ ରକ୍ତ ପ୍ରବାହରେ ଥିବା ମାଇକ୍ରୋସ୍କୋପିକ୍ ଫାଇଲେରିଆଲ ପରଜୀବୀଙ୍କୁ ଦୂର କରି ଏଲଏଫର ବିସ୍ତାରକୁ ହ୍ରାସ କରିବା, ଯାହା ଦ୍ୱାରା ମଶା ଦ୍ୱାରା ବ୍ୟାପୁଥିବା ଅଧିକ ସଂକ୍ରମଣକୁ ରୋକାଯାଇପାରିବ । ଏମଡିଏ ଔଷଧ ଅତ୍ୟନ୍ତ ନିରାପଦ ଏବଂ ପ୍ରଭାବଶାଳୀ ହୋଇଥିଲେ ମଧ୍ୟ ଏହାକୁ ଖାଲି ପେଟରେ ସେବନ କରିବା ଉଚିତ ନୁହେଁ । ନିମ୍ନଲିଖିତ ଗୋଷ୍ଠୀମାନେ ଔଷଧ ସେବନ କରିବା ଉଚିତ୍ ନୁହେଁ:
– ୨ ବର୍ଷରୁ କମ୍ ବୟସର ପିଲା
– ଗର୍ଭବତୀ ମହିଳା
– ଗୁରୁତର ଅସୁସ୍ଥ ବ୍ୟକ୍ତି
ଉପଯୁକ୍ତ ବ୍ୟବହାର ସୁନିଶ୍ଚିତ କରିବା ଏବଂ ଅପଚୟ କିମ୍ବା ଅପବ୍ୟବହାରକୁ ଏଡ଼ାଇବା ପାଇଁ ସମସ୍ତ ଯୋଗ୍ୟ ବ୍ୟକ୍ତି ତାଲିମପ୍ରାପ୍ତ ସ୍ୱାସ୍ଥ୍ୟକର୍ମୀଙ୍କ ଉପସ୍ଥିତିରେ ଔଷଧ ସେବନ କରିବା ଉଚିତ୍ ।
ଏହି କାର୍ଯ୍ୟକ୍ରମରେ କେନ୍ଦ୍ର ସ୍ୱାସ୍ଥ୍ୟ ସଚିବ ପୁଣ୍ୟ ସଲିଲା ଶ୍ରୀବାସ୍ତବ, ସ୍ୱାସ୍ଥ୍ୟ ମନ୍ତ୍ରଣାଳୟର ଅତିରିକ୍ତ ସଚିବ ତଥା ଏମଡି (ଏନ୍ଏଚ୍ଏମ୍) ଆରାଧନା ପଟ୍ଟନାୟକ, କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ରାଜ୍ୟର ଅତିରିକ୍ତ ମୁଖ୍ୟ ଶାସନ ସଚିବ, ପ୍ରମୁଖ ସଚିବ ଓ ଏମଡି (ଏନ୍ଏଚ୍ଏମ୍) ଉପସ୍ଥିତ ଥିଲେ।
