ଭୁବନେଶ୍ବର: ମହାନଦୀକୁ ନେଇ ରାଜ୍ୟରେ ଆରମ୍ଭ ହୋଇଯାଇଛି ମହାରାଜନୀତି। କାରଣ ଗତକାଲି ଛତିଶଗଡ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେଓ ସାଏ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହିତ ଆଲୋଚନା କରିଥିଲେ। ଏଥିରେ ମହାନଦୀ ନେଇ ଉପୁଜୁଥିବା ବିବାଦର ସମାଧାନ କରିବା ପାଇଁ ସହମତ ପ୍ରକାଶ ପାଇଛି। ତେବେ ଏହାକୁ ନେଇ ଆଜି ବିଜେପି ସରକାରଙ୍କୁ କାଦୁଅ ଫିଙ୍ଗିଛନ୍ତି ବିଜେଡି ଓ କଂଗ୍ରେସ।
ଆଜି ଏ ନେଇ ବିଜେଡି ବିଧାୟକ ତଥା ବିରୋଧୀଦଳର ଉପନେତା ପ୍ରସନ୍ନ ଆଚାର୍ଯ୍ୟ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ଚା କପ ରେ କୌଣସି ଆଲୋଚନା ହୁଏ ନାହିଁ। ଯଦି ଛତିଶଗଡ ପ୍ରକୃତରେ ସମାଧାନ ଚାହୁଛନ୍ତି ତେବେ ମହାନଦୀରେ ନିର୍ମାଣଧିନ ବ୍ୟାରେଜକୁ ପ୍ରଥମେ ରାଜ୍ୟ ସରକାର ବନ୍ଦ କରାନ୍ତୁ। ଏହାପରେ ଆଲୋଚନା କରାଯିବା ଉଚିତ।
ବର୍ତ୍ତମାନ ସେଠାରେ ବ୍ୟାରେଜ କାମ ବେଶ ଆଗେଇ ଗଲାଣି। କେନ୍ଦ୍ରରେ ବିଜେପି, ରାଜ୍ୟରେ ବିଜେପି ଏବଂ ଛତିଶଗଡରେ ମଧ୍ୟ ବିଜେପି। ବର୍ତ୍ତମାନ ଟ୍ରିପଲ ଇଂଜିନ ସରକାର କେମିତି ଏହି ବିବାଦ ସମାଧାନ କରିବେ ତାହା ସନ୍ଦେହ ଜନକ। ଅନ୍ୟପଟେ ଏହି ବିବାଦ ବର୍ତ୍ତମାନ ଟ୍ରିବୁନାଲରେ ରହିଥିବାରୁ ତାହା ଉଭୟ ରାଜ୍ୟ ସମାଧାନ କରିପାରିବେ କି ନାହିଁ ସେ ନେଇ ତର୍ଜମା ହେବା ଆବଶ୍ୟକ ବୋଲି ପ୍ରସନ୍ନ ଆଚାର୍ଯ୍ୟ କହିଛନ୍ତି।
ସେହିପରି କଂଗ୍ରେସ ମଧ୍ୟ ରାଜ୍ୟ ସରକାରଙ୍କୁ ଟାର୍ଗେଟ କରିଛି। ସଭାପତି ଭକ୍ତ ଦାସ କହିଛନ୍ତି ଯେ, ଆଲୋଚନା ହେବ ବୋଲି କହିଦେଲେ ହେବ ନାହିଁ। ଏହାର ସମାଧାନ କରିବା ଦରକାର। ଛତିଶଗଡରେ କଂଗ୍ରେସ ଶାସନ ଥିବା ବେଳେ ବହୁବାର ଏ ନେଇ ପଦକ୍ଷେପ ନିଆଯାଇଛି। ବର୍ତ୍ତମାନ ଟ୍ରିପଲ ଇଂଜିନ ସରକାର କିପରି ସମାଧାନ କରିବେ ତାହା ଦେଖିବାର କଥା। ହେଲେ ଏହାର ସମାଧାନ ହେଲା ପରି ଲାଗୁ ନାହିଁ ବୋଲି ଭକ୍ତ ଦାସ କହିଛନ୍ତି।
ତେବେ ବିଜେଡି କଂଗ୍ରେସର ବୟାନକୁ ଜବାବ ଦେଇଛନ୍ତି ବିଜେପି ନେତା ତଥା ଆଇନ ମନ୍ତ୍ରୀ ପୃଥୀରାଜ ହରିଚନ୍ଦନ। ସେ କହିଛନ୍ତି ଯେ, ମହାନଦୀକୁ ନେଇ ବିଜେଡି କେବଳ ରାଜନୈତିକ ରୁଟି ସେକିବାରେ ବ୍ୟସ୍ତ। ହେଲେ ସେମାନେ ସରକାରରେ ଥିବା ବେଳେ କୌଣସି ସମାଧାନ କରିପାରି ନ ଥିଲେ। ବର୍ତ୍ତମାନ ଆମ ସରକାର ସମାଧାନ କରିବ।
ବର୍ତ୍ତମାନ ବିଜେଡି ଯେପରି ସ୍ବରରେ ବିରୋଧ କରୁଛି, ସେତେବେଳେ ସେମାନେ କେଉଁଠି ଥିଲେ ବୋଲି ସେ ପ୍ରଶ୍ନ କରିଛନ୍ତି। ସେ ଆହୁରି କହିଛନ୍ତି ଯେ, ବିଜେଡି ଦୋମୁହାଁ ନୀତି ଅବଲମ୍ବନ କରୁଛି। ସେମାନେ ବିଧାନସଭାରେ ଗୋଟିଏ କଥା ବାହାରେ ଆଉ ଗୋଟିଏ କଥା କହୁଛନ୍ତି। ସେତେବେଳେ ବିଜେଡି ସରକାର କେନ୍ଦ୍ରର ମଧ୍ୟସ୍ତତା ପ୍ରସ୍ତାବକୁ ଗ୍ରହଣ କରି ନ ଥିଲା। ସେପଟେ ଛତିଶଗ଼ଡର କଂଗ୍ରେସ ସରକାର ଆଗ୍ରହ ପ୍ରକାଶ କରି ନ ଥିଲା।
ବର୍ତ୍ତମାନ ସେମାନେ ଅପେକ୍ଷା କରନ୍ତୁ। କଣ କରାଯାଉଛି ଦେଖନ୍ତୁ ବୋଲି ମନ୍ତ୍ରୀ ପୃଥୀରାଜ ହରିଚନ୍ଦନ କହିଛନ୍ତି।