ନୂଆଦିଲ୍ଲୀ: ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦ (UNSC)ରେ ପାକିସ୍ତାନର ବୈଦେଶିକ ମନ୍ତ୍ରୀ ଇଶାକ ଡାରଙ୍କ ମନ୍ତବ୍ୟ ଉପରେ ଭାରତ କଡ଼ା ପ୍ରହାର କରିଛି। ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ପି. ହରିଶ କହିଛନ୍ତି ଯେ, ଗୋଟିଏ ପଟେ ଭାରତ ଅଛି, ଯାହା ଏକ ପରିପକ୍ୱ ଗଣତନ୍ତ୍ର, ଉନ୍ନତ ଅର୍ଥନୀତି, ଅନ୍ୟପଟେ ପାକିସ୍ତାନ ଆତଙ୍କବାଦରେ ବୁଡ଼ି ରହିଛି, ଯାହା ନିରନ୍ତର ଅନ୍ତର୍ଜାତୀୟ ମୁଦ୍ରା ପାଣ୍ଠି (IMF) ରୁ ଋଣ ନେଉଛି।
ପି. ହରିଶ ଏହା ମଧ୍ୟ କହିଛନ୍ତି ଯେ, ଅନ୍ତର୍ଜାତୀୟ ଶାନ୍ତି ଏବଂ ସୁରକ୍ଷାକୁ ପ୍ରୋତ୍ସାହିତ କରିବା ଉପରେ ବିତର୍କ କରିବା ସମୟରେ ଏହା ବୁଝିବା ଗୁରୁତ୍ୱପୂର୍ଣ୍ଣ ଯେ କିଛି ମୌଳିକ ନୀତି ଅଛି, ଯାହାକୁ ସାର୍ବଜନୀନ ଭାବରେ ସମ୍ମାନ କରାଯିବା ଉଚିତ, ସେଥିମଧ୍ୟରୁ ଗୋଟିଏ ହେଉଛି ଆତଙ୍କବାଦ ପ୍ରତି ଶୂନ୍ୟ ସହନଶୀଳତା। ପରିଷଦର କୌଣସି ସଦସ୍ୟ ଏପରି ଆଚରଣରେ ଲିପ୍ତ ହୋଇ ପ୍ରଚାର କରିବା ଉପଯୁକ୍ତ ନୁହେଁ, ଯାହାକୁ ଅନ୍ତର୍ଜାତୀୟ ସମ୍ପ୍ରଦାୟ ସମ୍ପୂର୍ଣ୍ଣ ଭାବରେ ସହ୍ୟ କରିବ ନାହିଁ।
ଯୁଦ୍ଧବିରତି ପ୍ରସଙ୍ଗରେ ଭାରତ UNSCରେ କ’ଣ କହିଛି?:
ଯୁଦ୍ଧବିରତି ସମ୍ପର୍କରେ ପି. ହରିଶ କହିଛନ୍ତି ଯେ, ଅପରେସନ ସିନ୍ଦୁରର ପ୍ରାଥମିକ ଉଦ୍ଦେଶ୍ୟ ହାସଲ ପରେ ପାକିସ୍ତାନର ଅନୁରୋଧରେ ସିଧାସଳଖ ସାମରିକ କାର୍ଯ୍ୟକଳାପ ବନ୍ଦ କରାଯାଇଥିଲା। ପାକିସ୍ତାନର ବୈଦେଶିକ ମନ୍ତ୍ରୀ ଇସାକ ଡାର ଜାତିସଂଘ ସୁରକ୍ଷା ପରିଷଦରେ ଅନ୍ତର୍ଜାତୀୟ ଶାନ୍ତି ଏବଂ ସୁରକ୍ଷା ବଜାୟ ରଖିବା ଉପରେ ଏକ ଖୋଲା ବିତର୍କ ସମୟରେ କାଶ୍ମୀର ପ୍ରସଙ୍ଗ ଉଠାଇଥିଲେ।
କାଶ୍ମୀର ଏବଂ ସିନ୍ଧୁ ଜଳ ଚୁକ୍ତିନାମା ଉପରେ ପାକିସ୍ତାନକୁ ଭର୍ତ୍ସନା:
ଇସାକ ଡାରଙ୍କ ପ୍ରଶ୍ନରେ ରାଷ୍ଟ୍ରଦୂତ ପି. ହରିଶ ପୁଣି ଥରେ ସ୍ପଷ୍ଟ କରିଥିଲେ ଯେ, ଜମ୍ମୁ ଏବଂ କାଶ୍ମୀର ଭାରତର ଏକ ଅବିଚ୍ଛେଦ୍ୟ ଅଙ୍ଗ। ପାକିସ୍ତାନକୁ କଡ଼ା ଜବାବ ଦେଇ ସେ କହିଛନ୍ତି ଯେ, ଭାରତ ଦେଶର ସାର୍ବଭୌମତ୍ୱ ଉପରେ ପ୍ରଶ୍ନ ଉଠାଇବାର କୌଣସି ପ୍ରୟାସକୁ କେବେ ଗ୍ରହଣ କରିବ ନାହିଁ। ପାକିସ୍ତାନ ଦ୍ୱାରା କାଶ୍ମୀର ପ୍ରସଙ୍ଗର ଆନ୍ତର୍ଜାତୀୟକରଣ ଏବଂ ଜାତିସଂଘ ସୁରକ୍ଷା ପରିଷଦରେ ସିନ୍ଧୁ ଜଳ ଚୁକ୍ତିନାମା ଉଲ୍ଲେଖ କରାଯିବାର କଡ଼ା ବିରୋଧ ପ୍ରକାଶ କରି ପି. ହରିଶ କହିଛନ୍ତି ଯେ, ଆତଙ୍କବାଦ ଏବଂ ଅନ୍ତର୍ଜାତୀୟ ଶାନ୍ତି ପ୍ରସଙ୍ଗରେ ପାକିସ୍ତାନର ଦୋମୁହାଁ ଚରିତ୍ର ନିନ୍ଦନୀୟ।