ଚେନ୍ନାଇ: ତାମିଲନାଡୁର କରୁରରେ ଅଭିନେତାରୁ ରାଜନେତା ହୋଇଥିବା ବିଜୟଙ୍କ ରାଲିରେ ଦଳାଚକଟା ହୋଇଛି। କରୁର ସରକାରୀ ହସ୍ପିଟାଲର ସୂତ୍ର ଅନୁଯାୟୀ ୩୧ ଜଣଙ୍କର ମୃତ୍ୟୁ ହୋଇଛି। ଆହୁରି ଅନେକ ଆହତ ହୋଇଛନ୍ତି। ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ସ୍ୱାସ୍ଥ୍ୟମନ୍ତ୍ରୀ ଏବଂ ଶିକ୍ଷାମନ୍ତ୍ରୀଙ୍କୁ ଘଟଣାସ୍ଥଳକୁ ପହଞ୍ଚିବାକୁ ନିର୍ଦ୍ଦେଶ ଦେଇଛନ୍ତି।
ଘଟଣା ଯୋଗୁଁ ଭିଡ଼ରେ ଥିବା ଅନେକ ଲୋକ ଅଚେତ ହୋଇଯିବାରୁ ବିଜୟଙ୍କୁ ତାଙ୍କର ଭାଷଣ ସାମୟିକ ଭାବରେ ରୋକିବାକୁ ପଡିଥିଲା। ପ୍ରବଳ ଭିଡ଼ ଯୋଗୁଁ ଅନେକ ଦଳୀୟ କର୍ମୀ ଏବଂ ପିଲାମାନେ ତଳେ ପଡ଼ିଯାଇଥିଲେ ଏବଂ ବେହୋସ ହୋଇଯାଇଥିଲେ। ଏହି ସମୟରେ ବିଜୟ ମଞ୍ଚ ଉପରୁ ଶାନ୍ତି ବଜାୟ ରଖିବାକୁ ଏବଂ ଆମ୍ବୁଲାନ୍ସ ପାଇଁ ରାସ୍ତା ଖାଲି କରିବାକୁ ନିବେଦନ କରିଥିଲେ।
ବିଜୟଙ୍କ ଅଭିଭାଷଣରେ ଦାବି କରିଥିଲେ ଯେ, ଆଗାମୀ ଛଅ ମାସ ମଧ୍ୟରେ ତାମିଲନାଡୁର ରାଜନୈତିକ ଦୃଶ୍ୟପଟ ପରିବର୍ତ୍ତନ ହେବ ଏବଂ କ୍ଷମତା ପରିବର୍ତ୍ତନ ଦେଖାଯିବ। ଏହି ରାଲି ୨୦୨୬ ବିଧାନସଭା ନିର୍ବାଚନ ପୂର୍ବରୁ ବିଜୟଙ୍କ ରାଜ୍ୟବ୍ୟାପୀ ଅଭିଯାନର ଏକ ଅଂଶ ଥିଲା। ଘଟଣା ପରେ ଅଧିକାରୀ ଏବଂ ଆୟୋଜକମାନେ ପରିସ୍ଥିତିକୁ ନିୟନ୍ତ୍ରଣ କରିଥିଲେ।
