ନୂଆଦିଲ୍ଲୀ: ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଫେଲ ଲଢ଼ୁଆ ବିମାନରେ ଉଡ଼ିବେ, ଯାହା ଅପରେସନ ସିନ୍ଦୁର ସମୟରେ ପାକିସ୍ତାନରେ ଆତଙ୍କବାଦୀ ଶିବିର ଉପରେ ବାୟୁସେନା ଆକ୍ରମଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ସଶସ୍ତ୍ର ବାହିନୀର ସର୍ବୋଚ୍ଚ କମାଣ୍ଡର ଅମ୍ବାଲା ଏୟାରବେସରେ ବ୍ୟକ୍ତିଗତ ଭାବରେ ଉପସ୍ଥିତ ରହିବେ। ରାଷ୍ଟ୍ରପତି ଭବନ ଏକ ସରକାରୀ ବିବୃତ୍ତି ଜାରି କରି ମହାମହିମଙ୍କ ଅମ୍ବାଲା ଗସ୍ତ ଏବଂ ରାଫେଲ ଲଢ଼ୁଆ ବିମାନ ଉଡ଼ାଣ ବିଷୟରେ ସୂଚନା ଦେଇଛି।
ରାଫେଲ ଲଢ଼ୁଆ ବିମାନର ଗୋଲ୍ଡେନ ଏରୋ (୧୭ତମ) ସ୍କ୍ୱାଡ୍ରନ୍ ଅମ୍ବାଲାରେ ନିୟୋଜିତ। ଏହି ସ୍କ୍ୱାଡ୍ରନ୍ ର ଲଢ଼ୁଆ ବିମାନଗୁଡ଼ିକ ମେ ୬-୭ ରାତିରେ ମୁରିଦକେ ଏବଂ ବହାବଲପୁରରେ ଆତଙ୍କବାଦୀ ସଂଗଠନ ଲସ୍କର-ଏ-ତୈୟବା ଏବଂ ଜୈଶ-ଏ-ମହମ୍ମଦର ମୁଖ୍ୟାଳୟ ଉପରେ ବୋମା ମାଡ଼ କରି ଧ୍ୱଂସ କରିଦେଇଥିଲେ, ଉଭୟ ଘାଟିରେ ବହୁ ସଂଖ୍ୟକ ଆତଙ୍କବାଦୀଙ୍କୁ ନିହତ କରିଥିଲେ। ନିହତ ଆତଙ୍କବାଦୀଙ୍କ ମଧ୍ୟରେ ଜୈଶ-ଏ-ମହମ୍ମଦ ମୁଖ୍ୟ ମାସୁଦ ଆଝାରଙ୍କ ପରିବାର ସଦସ୍ୟ ଥିଲେ।
ଏହି ମାସ ବାୟୁସେନା ଦିବସ (୮ ଅକ୍ଟୋବର) ରେ ବାୟୁସେନା ମୁଖ୍ୟ ମାର୍ଶାଲ ଗୋଲଡେନ ଆରୋ ସ୍କ୍ବାଡ୍ରନକୁ ଅପରେସନ ସିନ୍ଦୂରରେ ଗୁରୁତ୍ୱପୂର୍ଣ୍ଣ ଭୂମିକା ପାଇଁ ଏକ ପ୍ରଶଂସା ପ୍ରମାଣପତ୍ର ପ୍ରଦାନ କରିଥିଲେ। ସ୍ୱାଧୀନତା ଦିବସରେ ସରକାର ଗୋଲଡେନ ଆରୋଜର କମାଣ୍ଡିଂ ଅଫିସର (ସିଓ) ଗ୍ରୁପ କ୍ୟାପଟେନ ରଞ୍ଜିତ ସିଂହ ସିଦ୍ଧୁଙ୍କୁ ବୀରଚକ୍ର ପ୍ରଦାନ କରିବାକୁ ଘୋଷଣା କରିଥିଲେ। ରାଫେଲ ଉଡ଼ାଇଥିବା ମହିଳା ଫାଇଟର ପାଇଲଟ୍ ୱିଙ୍ଗ କମାଣ୍ଡର ଶିବାନୀଙ୍କୁ ବାୟୁସେନା ତାଲିମ ଏକାଡେମୀରେ ପ୍ରଶିକ୍ଷକ ଭାବରେ ନିଯୁକ୍ତି ଦିଆଯାଇଛି। ଅପରେସନ ସିନ୍ଦୂର ସମୟରେ ପାକିସ୍ତାନ ୱିଙ୍ଗ କମାଣ୍ଡର ଶିବାନୀଙ୍କ ବିଷୟରେ ମିଥ୍ୟା ପ୍ରଚାର କରିବାରେ ବିଫଳ ହୋଇଥିଲା। ପାକିସ୍ତାନ ମିଥ୍ୟା ଦାବି କରିଥିଲା ଯେ, ତାଙ୍କୁ ବନ୍ଧକ ରଖାଯାଇଛି।
ଏହି କାରଣରୁ ମହାମହିମ ରାଫେଲରେ ଉଡ଼ିବେ:
ଏହି କାରଣରୁ ରାଷ୍ଟ୍ରପତି ଅମ୍ବାଲା ଏୟାରବେସରେ ରାଫେଲରେ ଉଡ଼ିବାକୁ ନିଷ୍ପତ୍ତି ନେଇଛନ୍ତି। ରାଷ୍ଟ୍ରପତି ରାଫେଲର ଦୁଇ-ପାଇଲଟ ତାଲିମଦାତା ବିମାନରେ ଉଡ଼ିବେ। ଏହା ଦ୍ୱିତୀୟ ଥର ପାଇଁ ରାଷ୍ଟ୍ରପତି ଏକ ଲଢ଼ୁଆ ବିମାନ ଉଡ଼ାଉଛନ୍ତି। ୨୦୨୩ ମସିହାରେ, ରାଷ୍ଟ୍ରପତି ମୁର୍ମୁ ଆସାମର ତେଜପୁର ଏୟାରବେସରେ ଏକ ସୁଖୋଇ ଲଢ଼ୁଆ ବିମାନ ମଧ୍ୟ ଉଡ଼ାଇଥିଲେ।
