ଭୁବନେଶ୍ବର: ପ୍ରଖ୍ୟାତ ଚଳଚିତ୍ର ନିର୍ଦ୍ଦେଶକ ଶ୍ରୀ ହିମାଂଶୁ ଖଟୁଆ ହେଲେ କଟକସ୍ଥିତ ବିଜୁ ପଟ୍ଟନାୟକ ଚଳଚିତ୍ର ଏବଂ ଟେଲିଭିଜନ ସଂସ୍ଥା ଓଡିଶା ବା BPFTIO ର ଅଧ୍ୟକ୍ଷ। ସେ ପୂର୍ବରୁ ଏହି ସଂସ୍ଥାର ଅଧ୍ୟାପକ ଭାବେ କାର୍ଯ୍ୟ କରୁଥିଲେ। ଗତକାଲି ସେ ଅଧ୍ୟକ୍ଷ ଭାବେ ଦାୟିତ୍ବ ଗ୍ରହଣ କରିଛନ୍ତି। ସଂସ୍ଥାର ଅଧ୍ୟାପକ ତଥା କର୍ମଚାରୀଗଣ ତାଙ୍କୁ ସ୍ବାଗତ କରିଥିଲେ।
ଚଳିଚତ୍ର ନିର୍ଦ୍ଦେଶନା ତଥା ଅଧ୍ୟାପନା କ୍ଷେତ୍ରରେ ଶ୍ରୀ ଖଟୁଆଙ୍କ ବେଶ ଭଲ ଅଭିଜ୍ଞତା ରହିଛି। ସେ ଏହା ପୂର୍ବରୁ କିଟ ବିଶ୍ବବିଦ୍ୟାଳୟ ଦ୍ବାରା ପରିଚାଳିତ କିଟ ସ୍କୁଲ ଅଫ ଫିଲ୍ମ ଏବଂ ମିଡିଆ ସାଇନ୍ସ, ସ୍କୁଲ ଅଫ୍ ଫ୍ୟାସନ ଟେକନୋଲୋଜି୍, ସ୍କୁଲ ଅଫ ମାସ୍ କମ୍ୟୁନିକେସନର ସଂସ୍ଥାର ମୁଖ୍ୟ ଭାବେ କାର୍ଯ୍ୟ କରୁଥିଲେ। ସେ କଳିଙ୍ଗ ଟିଭିର ପରିଚାଳନା ନିର୍ଦ୍ଦେଶକ ଭାବେ ମଧ୍ୟ କାର୍ଯ୍ୟ କରିଛନ୍ତି। ପୂର୍ବରୁ ସେ କୋଲକତାସ୍ଥିତ କେନ୍ଦ୍ର ସରକାରଙ୍କ ସତ୍ୟଜିତ ରାୟ ଫିଲ୍ମ ଆଣ୍ଡ୍ ଟେଲିଭିଜନ ଇନଷ୍ଟିଚ୍ୟୁଟ୍ ର ନିର୍ଦ୍ଦେଶକ ଭାବେ ମଧ୍ୟ କାର୍ଯ୍ୟ କରିଛନ୍ତି।
ଓଡିଆ ଚଳଚିତ୍ର ଜଗତରେ ଯେଉଁ କେତେ ଜଣ ଜାତୀୟ ସ୍ତରରେ ସୁନାମ ଆଣିପାରିଛନ୍ତି ସେମାନଙ୍କ ମଧ୍ୟରେ ଜଣେ ହେଉଛନ୍ତି ହିମାଂଶୁ ଖଟୁଆ। ୧୯୯୬ ମସିହାରେ ତାଙ୍କ ନିର୍ଦ୍ଦେଶିତ ଚଳଚିତ୍ର ‘ଶୂନ୍ୟ ସ୍ବରୂପ’ ଜାତୀୟ ପୁରସ୍କାର ପାଇ ବେଶ ଚର୍ଚ୍ଚାକୁ ଆସିଥିଲା। ଏହାପରେ ୨୦୦୫ ମସିହାରେ ତାଙ୍କ ନିର୍ଦ୍ଦେଶିତ ଅନ୍ୟତମ ଚଳଚିତ୍ର ‘କଥାନ୍ତର’ ମଧ୍ୟ ଜାତୀୟ ଚଳଚ୍ଚିତ୍ର ପୁରସ୍କାର ହାସଲ କରିପାରିଛି। ସେହିପରି ତାଙ୍କ ନିର୍ଦ୍ଦେଶିତ ‘କ୍ରାନ୍ତିଧାରା’ ସିନେମା ମଧ୍ୟ ବିଭିନ୍ନ ପୁରସ୍କାର ହାସଲ କରିଛି।
ନିକଟରେ ତାଙ୍କ ନିର୍ଦ୍ଦେଶିତ ‘ଦ ସି ଆଣ୍ଡ ସେଭେନ ଭିଲେଜେସ୍’ ନାମିତ ଡକ୍ୟୁ ଫିଲ୍ମ ଜାତୀୟ ଚଳଚିତ୍ର ପୁରସ୍କାର ହାସଲ କରିଛି। ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କଠାରୁ ପୁରସ୍କାର ଗ୍ରହଣ କରିଛନ୍ତି। ସେହିପରି ଗୋଆରେ ଆୟୋଜିତ ହେବାକୁ ଥିବା ୫୬ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ତାଙ୍କ ନିର୍ଦ୍ଦେଶିତ ଅନ୍ୟତମ ଚଳଚିତ୍ର ‘ଅଲେଖ ମହିମା’ ପ୍ରଦର୍ଶିତ ହେବା ପାଇଁ ମନୋନିତ ହୋଇଛି। ସେ BPFTIO ର ଅଧ୍ୟକ୍ଷ ହେବା ପରେ ଏହି ସଂସ୍ଥା ତାଙ୍କଠାରୁ ବେଶ କିଛି ଆଶା ରଖିଛି।
IFFI 2025 Showcases Seven Debut Masterpieces from India and World (Click Here to Read)
