ନୂଆଦିଲ୍ଲୀ: ଭାରତୀୟ ରେଳବାଇ ଯାତ୍ରୀ ଭଡ଼ା ଢାଞ୍ଚାକୁ ଯୁକ୍ତିସଂଗତ କରିଛି। ଏହି ନୂଆ ଢାଞ୍ଚା 26 ଡିସେମ୍ବର 2025 ଠାରୁ ଲାଗୁ ହେବ। ଯାତ୍ରୀଭଡ଼ାକୁ ସୁଲଭ କରିବା ଏବଂ ପରିଚାଳନାଗତ ସ୍ଥାୟିତ୍ୱ ମଧ୍ୟରେ ସନ୍ତୁଳନ ରଖିବା ଉଦ୍ଦେଶ୍ୟରେ ଏହି ପଦକ୍ଷେପ ଗ୍ରହଣ କରାଯାଇଛି।
ସଂଶୋଧିତ ଯାତ୍ରୀ ଭଡ଼ା ଢାଞ୍ଚାରେ ଉପସହରାଞ୍ଚଳ ରେଳ ସେବା ପାଇଁ ଦର ବୃଦ୍ଧି କରାଯାଇନାହିଁ। ସେହିପରି ଉଭୟ ଉପସହରାଞ୍ଚଳ ଏବଂ ଅଣ-ଉପସହରାଞ୍ଚଳ ମାର୍ଗରେ ଋତୁକାଳୀନ ଟିକେଟ୍ ଦର ମଧ୍ୟ ଅପରିବର୍ତ୍ତିତ ରହିଛି।
ସାଧାରଣ ଅଣ ଏସି (ଅଣ-ଉପସହରାଞ୍ଚଳ) ସେବା ପାଇଁ ଯାତ୍ରୀ ଭଡ଼ାକୁ ଦ୍ୱିତୀୟ ଶ୍ରେଣୀ ସାଧାରଣ, ସ୍ଲିପର କ୍ଲାସ୍ ସାଧାରଣ ଏବଂ ପ୍ରଥମ ଶ୍ରେଣୀ ସାଧାରଣ ଆଧାରରେ କ୍ରମବଦ୍ଧ ଭାବେ ଯୁକ୍ତିସଂଗତ କରାଯାଇଛି।
ଦ୍ୱିତୀୟ ଶ୍ରେଣୀ ସାଧାରଣ ବର୍ଗରେ, 215 କିଲୋମିଟର ପର୍ଯ୍ୟନ୍ତ ଯାତ୍ରା ପାଇଁ ଭଡ଼ାରେ କୌଣସି ବୃଦ୍ଧି କରାଯାଇ ନାହିଁ। ଏହାଦ୍ୱାରା କମ୍ ଦୂରତା ଏବଂ ଦୈନନ୍ଦିନ ଯାତ୍ରୀମାନେ ପ୍ରଭାବିତ ହେବେ ନାହିଁ। 216 କିଲୋମିଟରରୁ 750 କିଲୋମିଟର ଦୂରତା ପାଇଁ, ଭଡ଼ା ମାତ୍ର 5 ଟଙ୍କା ବୃଦ୍ଧି ହୋଇଛି। ଲମ୍ବା ଯାତ୍ରା ପାଇଁ ଏହି ବୃଦ୍ଧି ପର୍ଯ୍ୟାୟକ୍ରମେ ପ୍ରୟୋଗ କରାଯାଇଛି, ଯଥା – 751 କିଲୋମିଟରରୁ 1250 କିଲୋମିଟର ଦୂରତା ପାଇଁ 10 ଟଙ୍କା, 1251 କିଲୋମିଟରରୁ 1750 କିଲୋମିଟର ଦୂରତା ପାଇଁ 15 ଟଙ୍କା ଏବଂ 1751 କିଲୋମିଟରରୁ 2250 କିଲୋମିଟର ଦୂରତା ପାଇଁ 20 ଟଙ୍କା ବୃଦ୍ଧି କରାଯାଇଛି ।
ସ୍ଲିପର କ୍ଲାସ ସାଧାରଣ ଏବଂ ପ୍ରଥମ ଶ୍ରେଣୀ ସାଧାରଣ ବର୍ଗରେ, ଅଣ-ଉପସହରାଞ୍ଚଳ ଯାତ୍ରା ପାଇଁ ଭଡା ପ୍ରତି କିଲୋମିଟର 1 ପଇସା ହାରରେ ସମାନ ଭାବରେ ସଂଶୋଧିତ କରାଯାଇଛି। ଏଥିରେ ଯାତ୍ରୀ ଭଡାକୁ ଧୀରେ ଧୀରେ ଏବଂ ସୀମିତ ହାରରେ ବୃଦ୍ଧି ସୁନିଶ୍ଚିତ କରାଯାଇଛି।
ମେଲ୍/ଏକ୍ସପ୍ରେସ୍ ଟ୍ରେନଗୁଡ଼ିକରେ, ନନ୍-ଏସି ଏବଂ ଏସି ଶ୍ରେଣୀ ପାଇଁ ପ୍ରତି କିଲୋମିଟର ପିଛା 2 ପଇସା ଭଡ଼ା ବୃଦ୍ଧିକୁ ଯୁକ୍ତିସଂଗତ କରାଯାଇଛି। ଏଥିରେ ସ୍ଲିପର୍ କ୍ଲାସ, ପ୍ରଥମ ଶ୍ରେଣୀ, ଏସି ଚେୟାର କାର୍, ଏସି 3-ଟାୟାର, ଏସି 2-ଟାୟାର ଏବଂ ଏସି ପ୍ରଥମ ଶ୍ରେଣୀ ଅନ୍ତର୍ଭୁକ୍ତ। ଉଦାହରଣ ସ୍ୱରୂପ, ନନ୍-ଏସି ମେଲ୍/ଏକ୍ସପ୍ରେସ୍ କୋଚ୍ରେ 500 କିଲୋମିଟର ଯାତ୍ରା ପାଇଁ, ଯାତ୍ରୀମାନଙ୍କୁ କେବଳ ପ୍ରାୟ 10 ଟଙ୍କା ଅତିରିକ୍ତ ଭଡ଼ା ଦେବାକୁ ପଡିବ।
ତେଜସ ରାଜଧାନୀ, ରାଜଧାନୀ, ଶତାବ୍ଦୀ, ଦୂରନ୍ତୋ, ବନ୍ଦେ ଭାରତ, ହମସଫର, ଅମୃତ ଭାରତ, ତେଜସ, ମହାମନା, ଗତିମାନ, ଅନ୍ତ୍ୟୋଦୟ, ଗରିବ ରଥ, ଜନ ଶତାବ୍ଦୀ, ଯୁବ ଏକ୍ସପ୍ରେସ, ନମୋ ଭାରତ ରାପିଡ୍ ରେଳ ଏବଂ ସାଧାରଣ ଅଣ-ଉପସହରାଞ୍ଚଳ ସେବା (ଯେଉଁଠି ଆବଶ୍ୟକ, ଏସି ମେମୁ/ମେମୁକୁ ବାଦ ଦେଇ) ସମେତ ପ୍ରମୁଖ ଟ୍ରେନ୍ ସେବାଗୁଡ଼ିକର ବର୍ତ୍ତମାନର ମୂଳ ଭଡ଼ାରେ ସଂଶୋଧନ କରାଯାଇଛି। ଏହାକୁ ଅନୁମୋଦିତ ଶ୍ରେଣୀ-ୱାରି ମୂଳ ଭଡ଼ା ବୃଦ୍ଧି ନିୟମ ଅନୁସାରେ ଯୁକ୍ତିସଂଗତ କରାଯାଇଛି। ପ୍ରଯୁଜ୍ୟ ଶ୍ରେଣୀଗୁଡ଼ିକରେ ସମାନ ଭାବରେ ଏବଂ ଏକ କ୍ରମାନୁସାରେ ଏହି ସଂଶୋଧନ କରାଯାଇଛି।
ଉଲ୍ଲେଖ ଯୋଗ୍ୟ, ସଂରକ୍ଷିତ ଶୁଳ୍କ, ସୁପରଫାଷ୍ଟ ସରଚାର୍ଜ କିମ୍ବା ଅନ୍ୟାନ୍ୟ ଆନୁସଙ୍ଗିକ ଶୁଳ୍କରେ କୌଣସି ପରିବର୍ତ୍ତନ କରାଯାଇ ନାହିଁ। ଏଗୁଡ଼ିକ ପ୍ରଚଳିତ ନିୟମ ଅନୁଯାୟୀ ଆଦାୟ କରାଯିବ। ଜିଏସଟିର ପ୍ରୟୋଗ ମଧ୍ୟ ଅପରିବର୍ତ୍ତିତ ରହିଛି ଏବଂ ପ୍ରଚଳିତ ମାନଦଣ୍ଡ ଅନୁଯାୟୀ ମୋଟ୍ ଭଡ଼ା ନିର୍ଦ୍ଧାରଣ କରାଯିବ।
ସଂଶୋଧିତ ଭଡ଼ା କେବଳ 26 ଡିସେମ୍ବର 2025 କିମ୍ବା ତା’ପରେ ବୁକ୍ ହୋଇଥିବା ଟିକେଟ୍ ଉପରେ ଲାଗୁ ହେବ। ନୂଆ ଦର ଲାଗୁ ହେବା ତାରିଖ ପରେ ଯାତ୍ରା କଲେ ମଧ୍ୟ ପୂର୍ବରୁ ବୁକ୍ ହୋଇଥିବା ଟିକେଟ୍ ପାଇଁ କୌଣସି ଅତିରିକ୍ତ ଶୁଳ୍କ ଲାଗୁ ହେବ ନାହିଁ ।
ଷ୍ଟେସନଗୁଡ଼ିକରେ ପ୍ରଦର୍ଶିତ ଭଡ଼ା ତାଲିକାକୁ ସଂଶୋଧିତ କରାଯାଇ 26 ଡିସେମ୍ବର 2025ଠାରୁ ଲାଗୁ ନୂଆ ଦର ପ୍ରଦର୍ଶନ କରାଯିବ।