Sisira Sarasa in Bhubaneswar: ଶିଶିର ସରସ ମେଳାରେ ଗ୍ରାମୀଣ କଳା, ମହିଳା ସଶକ୍ତିକରଣ ଓ ସ୍ୱଦେଶୀ ଉତ୍ପାଦର ଝଲକ ଦେଖିବାକୁ ମିଳୁଛି। ଆତ୍ମନିର୍ଭର ଭାରତର ସ୍ୱପ୍ନ ସାକାର କରିବାର ଏହା ଏକ ଅନନ୍ୟ ପ୍ରଚେଷ୍ଟା ।
ଓଡ଼ିଶା ଗ୍ରାମୀଣ ବିକାଶ ଓ ବିପଣନ ସମିତି – ଓରମାସ ପକ୍ଷରୁ ଆୟୋଜିତ ମେଳାରେ ଦେଶର ବିଭିନ୍ନ ସ୍ଥାନରୁ ବ୍ୟବସାୟୀ ନିଜର ସାମଗ୍ରୀ ବିକ୍ରୟ କରିଛନ୍ତି । ଭଳିକି ଭଳି ଡିଜାଇନର ହସ୍ତତନ୍ତ, ହସ୍ତଶିଳ୍ପ, ଅଳଙ୍କାର, ସବାଇ ଘାସରେ ପ୍ରସ୍ତୁତ ସାମଗ୍ରୀ ସହ ବିଭିନ୍ନ ସାମଗ୍ରୀ ଗ୍ରାହକଙ୍କୁ ଆକୃଷ୍ଟ କରୁଛି । ଗ୍ରାମାଞ୍ଚଳର କାରିଗର, ମହିଳା ସ୍ୱୟଂସହାୟକ ଗୋଷ୍ଠୀ ଏହି ମେଳାରେ ନିଜର ଉତ୍ପାଦ ଜିନିଷ ସହଜରେ ବିକ୍ରି କରି ଆର୍ଥିକ ଭାବେ ସଶକ୍ତ ହେଉଛନ୍ତି ।
ଶିଶିର ସରସ ମେଳାରେ ଓଡ଼ିଶାର ସବୁ ଜିଲ୍ଲା ସହିତ ଦେଶର ଅନ୍ୟ ୨୦ଟି ରାଜ୍ୟର କାରିଗର ଓ ଉତ୍ପାଦକମାନେ ଅଂଶଗ୍ରହଣ କରିଛନ୍ତି । ସରକାରଙ୍କ ପ୍ରୋତ୍ସାହନରେ କାରିଗରମାନେ ସ୍ୱଦେଶୀ ସାମଗ୍ରୀର ବିକ୍ରିବଟା କରୁଛନ୍ତି । ସବୁ ଜିନିଷ ଗୋଟିଏ ଜାଗାରେ ମିଳୁଥିବାରୁ ଜନସାଧାରଣ ଖୁସି ବ୍ୟକ୍ତ କରିଛନ୍ତି ।
ଶୀତୁଆ ପରିବେଶରେ ସାଙ୍ଗ ସାଥି, ପରିବାର ସହ ବୁଲିବାର ମଜା ନେଉଛନ୍ତି ଜନସାଧାରଣ । ଏହା ସହ ସେଲ୍ଫି ପଏଣ୍ଟ ଓ ଛୋଟ ପିଲାଙ୍କ ପାଇଁ ପ୍ଲେ ଜୋନ୍ ମେଳାର ମୁଖ୍ୟ ଆକର୍ଷଣ ସାଜିଛି । ତା ସହ ସନ୍ଧ୍ୟା ହେଲେ ରଙ୍ଗ ବେରଙ୍ଗର ଆଲୋକମାଳାରେ ସଜ୍ଜିତ ମେଳା ଦେଖଣାହାରିଙ୍କ ମନ ମୋହୁଛି । ବିଭିନ୍ନ ରକମର ଖାଦ୍ୟ ସାଙ୍ଗକୁ ସନ୍ଧ୍ୟାର ସାଂସ୍କୃତିକ କାର୍ଯ୍ୟକ୍ରମକୁ ସମସ୍ତେ ବେଶ୍ ଉପଭୋଗ କରୁଛନ୍ତି ।