ନୂଆଦିଲ୍ଲୀ: ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ ବାରାଣସୀରେ ଏକ ସାମ୍ବାଦିକ ସମ୍ମିଳନୀ କରିଥିଲେ ଏବଂ ପ୍ରୟାଗରାଜ ମାଘ ମେଳାରେ ପ୍ରଶାସନ ସହିତ ବିବାଦ ସମ୍ପର୍କରେ ସରକାର ଏବଂ ପ୍ରଶାସନକୁ କଡ଼ା ସମାଲୋଚନା କରିଥିଲେ। ସାମ୍ବାଦିକ ସମ୍ମିଳନୀ ସମୟରେ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ କହିଥିଲେ ଯେ, “ଆମକୁ ଆମର ଶଙ୍କରାଚାର୍ଯ୍ୟ ପଦବୀର ପ୍ରମାଣ ମାଗଯାଇଥିଲା ଏବଂ ୨୪ ଘଣ୍ଟା ମଧ୍ୟରେ ତାହା ପ୍ରଦାନ କରିବାକୁ କୁହାଯାଇଥିଲା। ତା’ପରେ ଆମକୁ ପଚରାଯାଇଥିଲା ଯେ, କାହିଁକି ଆମକୁ ମେଳାରେ ପ୍ରବେଶ ମନା କରାଯିବ ନାହିଁ? ଆମେ ପୂର୍ବରୁ ଉତ୍ତର ଦେଇସାରିଛୁ। ସେମାନେ ୨୪ ଘଣ୍ଟା ମଧ୍ୟରେ ଉତ୍ତର ମାଗିଥିଲେ, ଏବଂ ସେମାନେ ଏପର୍ଯ୍ୟନ୍ତ ଆମର ଉତ୍ତରକୁ ପ୍ରତ୍ୟାଖ୍ୟାନ କରିନାହାଁନ୍ତି, ଯାହାର ଅର୍ଥ ସେମାନେ ଆମର ଯୁକ୍ତିକୁ ବୈଧ ବୋଲି ପାଇଛନ୍ତି।”
ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ ଆହୁରି ମଧ୍ୟ କହିଛନ୍ତି ଯେ, “ଏବେ ଆମକୁ ପ୍ରମାଣ ମଗାଯାଇଥିବାରୁ ଆମକୁ ଆମର ହିନ୍ଦୁ ପରିଚୟର ପ୍ରମାଣ ଦେବାକୁ ପଡିବ। ଆମକୁ ଆମର ହିନ୍ଦୁ ପରିଚୟ ପ୍ରମାଣ କରିବାକୁ ପଡିବ।” ସେ ଆହୁରି ମଧ୍ୟ କହିଛନ୍ତି ଯେ, “ହିନ୍ଦୁତ୍ୱ କେବଳ ଭାଷଣ କିମ୍ବା ଗେରୁଆରେ ପ୍ରତିଫଳିତ ହୁଏ ନାହିଁ। ଆପଣ ଗୋ ସେବା ପାଇଁ କ’ଣ କରିଛନ୍ତି, ଯାହା ହିନ୍ଦୁତ୍ୱ ଆଡ଼କୁ ପ୍ରଥମ ପଦକ୍ଷେପ।” ହିନ୍ଦୁ ହେବାର ପ୍ରଥମ ସର୍ତ୍ତ ହେଉଛି ଗୋରକ୍ଷକ ହେବା ଏବଂ ପରେ ଯାହା କିଛି। ସେଥିପାଇଁ ଆମେ ଆପଣଙ୍କୁ ଆପଣଙ୍କର ହିନ୍ଦୁ ପରିଚୟର ପ୍ରମାଣ ମାଗୁଛୁ। ଆମେ ଆପଣଙ୍କୁ ହିନ୍ଦୁ ଏବଂ ଗୋ-ପୂଜକ ହିନ୍ଦୁ ହେବାର ପ୍ରମାଣ ଦେବାକୁ ୪୦ ଦିନ ସମୟ ଦେଉଛୁ। ଯଦି ଆପଣ ଏହା କରିପାରିବେ ନାହିଁ, ତେବେ ଆମେ ବୁଝିବୁ ଯେ, ଆପଣ ଜଣେ ନକଲି ହିନ୍ଦୁ, ଜଣେ ଛଦ୍ମ-ହିନ୍ଦୁ, ଜଣେ କପଟୀ।
ଶଙ୍କରାଚାର୍ଯ୍ୟ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସରକାରଙ୍କୁ ଏକ ଚରମବାଣୀ ଜାରି କରିଥିଲେ, ଯେଉଁଥିରେ ଦାବି କରାଯାଇଥିଲା ଯେ, ୪୦ଦିନ ମଧ୍ୟରେ ଗାଈ ମାତାକୁ ରାଷ୍ଟ୍ର ମାତା ଭାବରେ ଘୋଷଣା କରାଯାଉ। ଶଙ୍କରାଚାର୍ଯ୍ୟ ଉତ୍ତର ପ୍ରଦେଶ ସରକାରଙ୍କୁ ମହାରାଷ୍ଟ୍ର, ନେପାଳ ଠାରୁ ଶିଖିବାକୁ କହିଥିଲେ। ଭାରତରୁ ରପ୍ତାନି ହେଉଥିବା ଗୋମାଂସର ୪୦ ପ୍ରତିଶତରୁ ଅଧିକ ପ୍ରାୟ ଅଧା ଉତ୍ତର ପ୍ରଦେଶରୁ ହୋଇଥାଏ। ଆପଣ ହିନ୍ଦୁ କି ନାହିଁ କୁହନ୍ତୁ, ନଚେତ୍ ଆପଣଙ୍କର ଗେରୁଆ ପୋଷାକ କାଢିଦିଅନ୍ତୁ।
ଶଙ୍କରାଚାର୍ଯ୍ୟ କହିଥିଲେ ଯେ, “ଗାଈ ମାଂସ ବିକ୍ରୟ କରି ଆପଣ ଡଲାର ଦ୍ଵାରା ରାମ ରାଜ୍ୟ ସ୍ଥାପନ କରିବେ। ଆପଣ ଗୋମାଂସକୁ ମଇଁଷି ମାଂସ କହି ସୁରକ୍ଷା ଦେବେ। ଯଦି ଆପଣ ୪୦ ଦିନ ମଧ୍ୟରେ ଗାଈକୁ ରାଷ୍ଟ୍ର ମାତା ଭାବରେ ଘୋଷଣା କରିବାରେ ବିଫଳ ହୁଅନ୍ତି, ତେବେ ଆପଣଙ୍କୁନକଲି ହିନ୍ଦୁ ଘୋଷଣା କରାଯିବ।” ପ୍ରୟାଗରାଜରେ ପୁଣି ସ୍ନାନ କରିବାର ପ୍ରଶ୍ନରେ, ଶଙ୍କରାଚାର୍ଯ୍ୟ କହିଥିଲେ ଯେ, ଏବେ ସେହି ମାମଲା ଆମ ପଛରେ ଅଛି; ଏବେ ପ୍ରସଙ୍ଗ ପ୍ରକୃତ ହିନ୍ଦୁ ଏବଂ ନକଲି ହିନ୍ଦୁଙ୍କ ବିଷୟରେ ରହିବ।