Jio AI Roadmap: ଜିଓର ପରବର୍ତ୍ତୀ ବଡ଼ ଲମ୍ଫ ଏଆଇ କ୍ଷେତ୍ରରେ ହେବ। ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡର ୪୯ତମ ବାର୍ଷିକ ସାଧାରଣ ବୈଠକରେ ଅଭିଭାଷଣ ଦେଇ ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ମୁକେଶ ଡି. ଅମ୍ବାନୀ କହିଛନ୍ତି ଯେ ଭାରତ କେବଳ ଅନ୍ୟତ୍ର ବିକଶିତ ଏଆଇର ଏକ ଗ୍ରାହକ ହୋଇ ରହିବା ଉଚିତ୍ ନୁହେଁ; ବରଂ, ଭାରତ ଏଆଇରେ ଏକ ସୃଷ୍ଟିକର୍ତ୍ତା ଏବଂ ବିଶ୍ୱସ୍ତରରେ ଅଗ୍ରଣୀ ହେବା ଉଚିତ।
ମୁକେଶ ଅମ୍ବାନୀ ଉଲ୍ଲେଖ କରିଛନ୍ତି ଯେ ଏହି ଦୃଷ୍ଟିକୋଣ ସହିତ, ରିଲାଏନ୍ସ ଇଣ୍ଟେଲିଜେନ୍ସକୁ କମ୍ପାନୀର ନୂତନ ଅଭିବୃଦ୍ଧି ଇଞ୍ଜିନ୍ ଭାବରେ ଆଗକୁ ବଢ଼ାଯାଉଛି। ସେ କହିଛନ୍ତି ଯେ ରିଲାଏନ୍ସ ଇଣ୍ଟେଲିଜେନ୍ସର ଉଦ୍ଦେଶ୍ୟ ହେଉଛି ଗ୍ରାହକ, ଉଦ୍ୟୋଗ ଏବଂ ସରକାରଙ୍କ ପାଇଁ ଏଆଇ ଭିତ୍ତିଭୂମି, ପ୍ଲାଟଫର୍ମ ଏବଂ ସେବାଗୁଡ଼ିକର ଏକ ଲାଭଦାୟକ ବ୍ୟବସାୟ ନିର୍ମାଣ କରିବା।
ଜିଓର ଅଧ୍ୟକ୍ଷ ଆକାଶ ଏମ୍. ଅମ୍ବାନୀ ରିଲାଏନ୍ସ ଇଣ୍ଟେଲିଜେନ୍ସର ସେବା ଏବଂ ଏଆଇ ଉତ୍ପାଦ ବିଷୟରେ ବିସ୍ତୃତ ସୂଚନା ପ୍ରଦାନ କରିଥିଲେ। ସେ ସୂଚନା ଦେଇଥିଲେ ଯେ ରିଲାଏନ୍ସ ଇଣ୍ଟେଲିଜେନ୍ସ ଜାମନଗରରେ ଭାରତର ସାର୍ବଭୌମ ଏଆଇ ମେରୁଦଣ୍ଡ ନିର୍ମାଣ କରୁଛି। ଏହି ଭିତ୍ତିଭୂମି ରିଲାଏନ୍ସର ନିଜସ୍ୱ ସୌରଶକ୍ତି ଦ୍ୱାରା ପରିଚାଳିତ ହେବ। ୨୦୨୬ ଶେଷ ସୁଦ୍ଧା ୧୨୦ ମେଗାୱାଟର ପ୍ରାରମ୍ଭିକ କ୍ଷମତାକୁ କାର୍ଯ୍ୟକାରୀ କରିବାର ଯୋଜନା ରହିଛି। ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବା ପରେ, ଏହି କ୍ଷମତା ଦୁଇ ଲକ୍ଷରୁ ଅଧିକ ଏଚ୧୦୦-ସମତୁଲ୍ୟ ଜିପିୟୁ ପର୍ଯ୍ୟନ୍ତ ବଢ଼ିପାରିବ।
ଆକାଶ ଅମ୍ବାନୀ କହିଛନ୍ତି, “ଗ୍ଲୋବାଲ୍ ଏଆଇ ପ୍ଲାଟଫର୍ମଗୁଡ଼ିକ ସାଧାରଣତଃ ପ୍ରଥମେ ଇଂରାଜୀରେ ନିର୍ମିତ ହୋଇ ପରେ ଅନୁବାଦିତ ହୋଇଥାଏ। ବିପରୀତରେ, ଜିଓ ଭାରତୀୟ ଭାଷାରେ ଦେଶୀୟ ଏଆଇ ନିର୍ମାଣ କରୁଛି। ଭାରତର ଏଆଇ ଭାରତୀୟ ଭାଷାରେ କଥା ହେବ। ଏହା ଭାରତୀୟଙ୍କ ହୃଦୟକୁ ଯୋଡ଼ିବ। ଏହା ଭାରତର ଛବି ଏବଂ ଭାଗ୍ୟକୁ ପରିବର୍ତ୍ତନ କରିବ।”
ରିଲାଏନ୍ସ ଇଣ୍ଟେଲିଜେନ୍ସ ୨୨ଟି ଭାରତୀୟ ଭାଷାରେ ଭରସାଯୋଗ୍ୟ, ସୁଲଭ ଏବଂ ବହୁଭାଷୀ ଏଆଇ ସେବା ପ୍ରଦାନ କରିବାକୁ ପ୍ରସ୍ତୁତ ହେଉଛି। ଏଥିରେ ଜିଓଭାରତଆଇକ୍ୟୁ, ଏଆଇ-କମର୍ସ, ଜିଓହେଲଥ-ଆଇକ୍ୟୁ, ଜିଓଲର୍ନ-ଆଇକ୍ୟୁ ଏବଂ ଜିଓଏଗ୍ରୀ-ଆଇକ୍ୟୁ ଭଳି ସେବା ଅନ୍ତର୍ଭୁକ୍ତ ହେବ। ଏହି ସେବାଗୁଡ଼ିକର ଉଦ୍ଦେଶ୍ୟ ହେଉଛି ଚାଷୀ, ଛାତ୍ରଛାତ୍ରୀ, ଦୋକାନୀ, ପରିବାର ଏବଂ ଛୋଟ ବ୍ୟବସାୟ ମାଲିକମାନଙ୍କ ପାଖରେ ଏଆଇର ଲାଭ ପହଞ୍ଚାଇବା।
ଜିଓ ଏହାର ନେଟୱାର୍କରେ ମଧ୍ୟ ସିଧାସଳଖ ଏଆଇ ସହିତ ଯୋଡୁଛି। କମ୍ପାନୀ ‘ଜିଓ କଲ୍ ଏଜେଣ୍ଟ’ ଉପରେ କାମ କରୁଛି। ଏହା ମାଧ୍ୟମରେ, ଜଣେ ଏଆଇ ଏଜେଣ୍ଟ ଗ୍ରାହକଙ୍କ ସମ୍ମତି ସହିତ ଯେକୌଣସି ଜିଓ କଲରେ ଯୋଗ ଦେଇପାରିବେ। ଏହା କଲ୍ ଅନୁବାଦ ବା ଟ୍ରାନ୍ସସ୍କ୍ରାଇବ କରିପାରିବ, ଏହାର ସାରାଂଶ ପ୍ରସ୍ତୁତ କରିପାରିବ ଏବଂ ଆବଶ୍ୟକ ହେଲେ ଖାଦ୍ୟ ଅର୍ଡର କରିବା, କ୍ୟାବ୍ ବୁକ୍ କରିବା, ଟେବୁଲ ସଂରକ୍ଷଣ କରିବା କିମ୍ବା ଏକ ବୈଠକ ସ୍ଥିର କରିବା ଭଳି କାର୍ଯ୍ୟ ମଧ୍ୟ କରିପାରିବ।
ଆକାଶ ଅମ୍ବାନୀ ଭାରତୀୟ ପ୍ରଯୁକ୍ତିକୁ ବିଶ୍ୱରେ ପହଞ୍ଚାଇବାକୁ ଜିଓର ପଞ୍ଚମ ପ୍ରତିବଦ୍ଧତା ସହିତ ଯୋଡିଛନ୍ତି। ସେ କହିଛନ୍ତି ଯେ ୫ଜି, ଫିକ୍ସଡ଼ ୱାୟାରଲେସ୍ ଆକ୍ସେସ୍ ଏବଂ ଏଆଇ ସେବା ପାଇଁ ଜିଓ ଦ୍ୱାରା ବିକଶିତ ନିଜର ଡିପ୍-ଟେକ୍ ଷ୍ଟାକ୍ ଏବେ ଆନ୍ତର୍ଜାତୀୟ ସହଯୋଗୀମାନଙ୍କ ସହିତ କିଛି ନିର୍ଦ୍ଦିଷ୍ଟ ଦେଶଗୁଡ଼ିକରେ ନିୟୋଜିତ ହେବା ପାଇଁ ପ୍ରସ୍ତୁତ ରହିଛି।
ରିଲାଏନ୍ସ ଗୁଗୁଲ, ମେଟା ଏବଂ ଏନଭିଡ଼ିଆ ସହିତ ଏହାର ସହଭାଗୀତା ସମ୍ପର୍କରେ ମଧ୍ୟ ସୂଚନା ଦେଇଛି। କମ୍ପାନୀ କହିଛି ଯେ ଏହି ସହଭାଗୀତା ଜରିଆରେ ବିଶ୍ୱ ପ୍ରଯୁକ୍ତିବିଦ୍ୟାକୁ ଭାରତୀୟ କାର୍ୟ୍ୟନ୍ୱୟନ, ଭାରତୀୟ ଭିତ୍ତିଭୂମି ଏବଂ ଭାରତ-ପ୍ରଥମ ଗଭର୍ଣ୍ଣାନ୍ସ ସହିତ ଯୋଡ଼ାଯିବ।
ଜିଓ ଯେଭଳି ପ୍ରତ୍ୟେକ ଭାରତୀୟଙ୍କ ପାଇଁ ଡାଟାକୁ ସୁଲଭ କରିଥିଲା, ସେହିଭଳି ରିଲାଏନ୍ସ ଏବେ ଏଆଇକୁ ସହଜ, ଭରସାଯୋଗ୍ୟ ଏବଂ ସୁଲଭ କରିବାକୁ ପ୍ରସ୍ତୁତ ହେଉଛି। କମ୍ପାନୀ ପକ୍ଷରୁ ପ୍ରକାଶ କରାଯାଇଛି ଯେ ଏଆଇ ସୁଲଭ ହେଲେ ଭାରତ କେବଳ ଏଆଇ ଯୁଗରେ ଅଂଶଗ୍ରହଣକାରୀ ହେବ ନାହିଁ ବରଂ ଏହାର ନେତୃତ୍ୱ ନେବ