ମହାରାଷ୍ଟ୍ର : ମହାରାଷ୍ଟ୍ର ସରକାର ବାଲ୍ୟବିବାହ ରୋକିବା ପାଇଁ ଏକ ନୂଆ ଏବଂ କଠୋର ପଦକ୍ଷେପ ଉପରେ ବିଚାର କରୁଛନ୍ତି। ପ୍ରସ୍ତାବ ଅନୁଯାୟୀ, ବିବାହ କାର୍ଡରେ ବର ଓ କନ୍ୟାଙ୍କ ଜନ୍ମ ତାରିଖ ମୁଦ୍ରଣ କରିବାକୁ ବାଧ୍ୟତାମୂଳକ କରାଯିବ। ଏହା ମାଧ୍ୟମରେ ବିବାହ ସମୟରେ ବୟସ ଯାଞ୍ଚକୁ ସହଜ କରିବା ସହ ନାବାଳକ ବିବାହ ରୋକିବାକୁ ସରକାର ଲକ୍ଷ୍ୟ ରଖିଛନ୍ତି।
ବିଧାନସଭାରେ ବିଜେପି ବିଧାୟକ ଅତୁଲ ଭାଟଖାଲକରଙ୍କ ପ୍ରଶ୍ନର ଉତ୍ତରରେ ମହିଳା ଓ ଶିଶୁ ବିକାଶ ମନ୍ତ୍ରୀ ଅଦିତି ତଟକାରେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ରାଜସ୍ଥାନରେ ଏହିପରି ବ୍ୟବସ୍ଥା ଲାଗୁ ହେବା ପରେ ସକାରାତ୍ମକ ପରିଣାମ ମିଳିଛି, ଯାହାକୁ ଆଧାର କରି ମହାରାଷ୍ଟ୍ର ମଧ୍ୟ ସମାନ ପଦକ୍ଷେପ ନେବାକୁ ବିଚାର କରୁଛି।
ଏହି ପ୍ରସ୍ତାବ ଉପରେ ମହାରାଷ୍ଟ୍ର ରାଜ୍ୟ ଶିଶୁ ଅଧିକାର ସୁରକ୍ଷା କମିଶନ ମଧ୍ୟ ସରକାରଙ୍କୁ ସୁପାରିଶ ପ୍ରଦାନ କରିଛି। ସୁପାରିଶରେ କୁହାଯାଇଛି ଯେ ବିବାହ କାର୍ଡରେ ଜନ୍ମ ତାରିଖ ଅନିବାର୍ୟ କରାଗଲେ ନାବାଳକ ବିବାହ ଚିହ୍ନଟ ଏବଂ ରୋକଥାମ ସହଜ ହେବ।
ପ୍ରସ୍ତାବିତ ବ୍ୟବସ୍ଥାରେ କେବଳ ପରିବାର ନୁହେଁ, ବିବାହ କାର୍ଡ ପ୍ରିଣ୍ଟିଂ ପ୍ରେସ୍, ବିବାହ ଆୟୋଜକ ଏବଂ ସମ୍ପୃକ୍ତ ସଂସ୍ଥାମାନଙ୍କ ଉପରେ ମଧ୍ୟ ଦାୟିତ୍ୱ ନିର୍ଦ୍ଧାରଣ ହେବ ବୋଲି ଇଙ୍ଗିତ ମିଳିଛି। ନିୟମ ଉଲ୍ଲଂଘନ ହେଲେ ଆଇନଗତ କାର୍ଯ୍ୟାନୁଷ୍ଠାନ ନେବା ବ୍ୟବସ୍ଥା ମଧ୍ୟ ରହିପାରେ।
ସରକାରଙ୍କ ମତାନୁଯାୟୀ, ଏହି ପଦକ୍ଷେପ ପ୍ରଶାସନକୁ ନାବାଳକ ବିବାହ ସମ୍ପର୍କିତ ସୂଚନା ଶୀଘ୍ର ମିଳିବାରେ ସହାୟକ ହେବ ଏବଂ ଆଗୁଆ ଚେତାବନୀ ବ୍ୟବସ୍ଥାକୁ ଶକ୍ତ କରିବ। ଖୁବ୍ଶୀଘ୍ର ଏହି ପ୍ରସ୍ତାବ ଉପରେ ଚୂଡ଼ାନ୍ତ ନିଷ୍ପତ୍ତି ହେବାର ସମ୍ଭାବନା ରହିଛି।