ନୂଆଦିଲ୍ଲୀ: ନୂଆଦିଲ୍ଲୀର ପୁସା କ୍ୟାମ୍ପସରେ ଅନୁଷ୍ଠିତ ‘ଗ୍ରାମୋଦୟ ସେ ରାଷ୍ଟ୍ରୋଦୟ’ ଶୀର୍ଷକ ଦୁଇ ଦିନିଆ ରାଷ୍ଟ୍ରୀୟ ଗ୍ରାମୀଣ ବିକାଶ ସମ୍ମିଳନୀର ଦ୍ୱିତୀୟ ଦିନରେ, ଗ୍ରାମୀଣ ବିକାଶ ଏବଂ କୃଷି ଏବଂ କୃଷକ କଲ୍ୟାଣ ମନ୍ତ୍ରୀ, ଶିବରାଜ ସିଂହ ଚୌହାନ ୨୯ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ଗ୍ରାମୀଣ ବିକାଶ ମନ୍ତ୍ରୀଙ୍କ ସହିତ ବ୍ୟାପକ ଆଲୋଚନା କରିଥିଲେ। ଏହି ସମ୍ମିଳନୀରେ ପ୍ରମୁଖ ଗ୍ରାମୀଣ ବିକାଶ ଯୋଜନାର କାର୍ଯ୍ୟାନ୍ୱୟନ ଏବଂ ପ୍ରଗତି ସମ୍ପର୍କରେ ସମୀକ୍ଷା କରାଯାଇଥିଲା। ଏହା ସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ ମାର୍ଗଦର୍ଶନରେ ‘ବିକଶିତ ଗ୍ରାମ – ବିକଶିତ ଭାରତ’ ର ଦୃଷ୍ଟିକୋଣକୁ ବାସ୍ତବରେ ପରିଣତ କରିବା ପାଇଁ ଠୋସ୍ ରଣନୀତି ମଧ୍ୟ ପ୍ରସ୍ତୁତ କରାଯାଇଥିଲା।
ସମାବେଶକୁ ସମ୍ବୋଧିତ କରି ଶ୍ରୀ ଚୌହାନ ମନ୍ତବ୍ୟ ଦେଇଥିଲେ ଯେ ଗ୍ରାମଗୁଡ଼ିକ କେବଳ ମାଟି, କ୍ଷେତ ଏବଂ ଗ୍ରାମୀଣ ସଭାସ୍ଥଳର ଏକ ସମୂହ ନୁହେଁ ; ଏହା ଭାରତର ଶକ୍ତି, ଭାରତର ଚେତନା ଏବଂ ଜାତିର ଭାବନାକୁ ପ୍ରତିନିଧିତ୍ୱ କରେ। ଗ୍ରାମଗୁଡ଼ିକ ସମୃଦ୍ଧ, ଆତ୍ମନିର୍ଭରଶୀଳ ଏବଂ ବିକଶିତ ନ ହେଲେ ସମୃଦ୍ଧ ଏବଂ ବିକଶିତ ଭାରତର ସ୍ୱପ୍ନ ସାକାର ହୋଇପାରିବ ନାହିଁ। ଗ୍ରାମୀଣ ଭାରତର ଉନ୍ନତି ବିନା ଦେଶର ଉନ୍ନତି ଅସମ୍ଭବ।
୨୯ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ମନ୍ତ୍ରୀମାନଙ୍କର ଏକ ଐତିହାସିକ ସମ୍ମିଳନୀ
ପ୍ରଥମ ଥର ପାଇଁ, ୨୯ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ଗ୍ରାମୀଣ ବିକାଶ ମନ୍ତ୍ରୀ, ବରିଷ୍ଠ ସରକାରୀ ଅଧିକାରୀ ଏବଂ ନୀତି ନିର୍ଦ୍ଧାରକମାନେ ଗ୍ରାମୀଣ ବିକାଶର ଭବିଷ୍ୟତ ବିଷୟରେ ବିଶେଷ ଭାବରେ ଆଲୋଚନା କରିବା ପାଇଁ ଗୋଟିଏ ମଞ୍ଚରେ ଏକାଠି ହୋଇଥିଲେ। ଏହି ସମ୍ମିଳନୀରେ ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏବଂ ଛତିଶଗଡ଼ର ଉପମୁଖ୍ୟମନ୍ତ୍ରୀ ବିଜୟ ଶର୍ମା ତଥା ବିଭିନ୍ନ ରାଜ୍ୟର ଗ୍ରାମୀଣ ବିକାଶ ମନ୍ତ୍ରୀ ଏବଂ ଅନ୍ୟାନ୍ୟ ବରିଷ୍ଠ ପ୍ରତିନିଧିମାନେ ଯୋଗ ଦେଇଥିଲେ। ଏହି ସମ୍ମିଳନୀ ସହଯୋଗ ସଂଘୀୟତାର ପ୍ରକୃତ ଭାବନାକୁ ପ୍ରତିପାଦନ କରିଥିଲା। ଏଥିରେ ରାଜନୈତିକ ମତଭେଦକୁ ଦୂରେଇ ରଖି, ଦେଶବ୍ୟାପୀ ଗ୍ରାମୀଣ ସମ୍ପ୍ରଦାୟର ଲାଭ ପାଇଁ ବିକାଶର ଗତିକୁ ତ୍ୱରାନ୍ୱିତ କରିବା, ଶାସନରେ ଉନ୍ନତି ଆଣିବା ଏବଂ କେନ୍ଦ୍ର ଏବଂ ରାଜ୍ୟ ମଧ୍ୟରେ ସହଯୋଗକୁ ସୁଦୃଢ଼ କରିବା ଉପରେ ଧ୍ୟାନ ଦିଆଯାଇଥିଲା।
ଏକ ବିକଶିତ ଭାରତ ପାଇଁ ବିକଶିତ ଗ୍ରାମଗୁଡ଼ିକର ଦୃଷ୍ଟିକୋଣ
ଭାରତର ବିକାଶ ଯାତ୍ରାରେ ଗ୍ରାମଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଉଲ୍ଲେଖ କରି ଶ୍ରୀ ଚୌହାନ କହିଥିଲେ ଯେ ‘ବିକଶିତ ଭାରତ’ ର ସ୍ୱପ୍ନ କେବଳ ସେତେବେଳେ ସାକାର ହୋଇପାରିବ ଯଦି ଗ୍ରାମଗୁଡ଼ିକ ଆର୍ଥିକ ଭାବରେ ସ୍ୱାବଲମ୍ବୀ ଏବଂ ନିଯୁକ୍ତି-ଭିତ୍ତିକ ହେବେ। ଏହା ସହିତ ଉଚ୍ଚମାନର ଭିତ୍ତିଭୂମି ଏବଂ ଅତ୍ୟାବଶ୍ୟକୀୟ ସାର୍ବଜନୀନ ସୁବିଧା ପାଇବେ। ଗ୍ରାମଗୁଡ଼ିକୁ ଜାତିର ଆତ୍ମା, ଶକ୍ତି ଏବଂ ଚେତନା ଭାବରେ ବର୍ଣ୍ଣନା କରି ସେ ମନ୍ତବ୍ୟ ଦେଇଥିଲେ ଯେ ଗ୍ରାମୀଣ ବିକାଶ ଦେଶର ସାମଗ୍ରିକ ପ୍ରଗତି ଉପରେ ନିର୍ଭର କରେ। ଗ୍ରାମାଞ୍ଚଳରେ କରାଯାଇଥିବା ପ୍ରତ୍ୟେକ ନିବେଶ ଶେଷରେ ଭାରତର ଦୀର୍ଘକାଳୀନ ଆର୍ଥିକ ଅଭିବୃଦ୍ଧି, ସାମାଜିକ ପ୍ରଗତି ଏବଂ ଜାତୀୟ ସମୃଦ୍ଧିରେ ଯୋଗଦାନ ଦିଏ।
ନୂତନ ନିଯୁକ୍ତି ଯୋଜନା ଜୁଲାଇ ପହିଲାରୁ କାର୍ଯ୍ୟକାରୀ ହେବ
କେନ୍ଦ୍ର ମନ୍ତ୍ରୀ ଘୋଷଣା କରିଥିଲେ ଯେ ‘ବିକଶିତ ଭାରତ – ଭିବି-ଜି ରାମ-ଜି’ ଯୋଜନା ଜୁଲାଇ ପହିଲାରୁ ଦେଶବ୍ୟାପୀ କାର୍ଯ୍ୟକାରୀ ହେବ, ଯାହା ପ୍ରଚଳିତ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଯୋଜନା (ଏମଜିଏନଆରଇଜିଏସ୍) ପରିବର୍ତ୍ତେ ଲାଗୁ ହେବ। ଏହି ନୂତନ କାର୍ଯ୍ୟକ୍ରମ କାର୍ଯ୍ୟକାରୀ କରିବା ପାଇଁ ୯୫,୬୮୨ କୋଟି ଟଙ୍କାର ମଧ୍ୟବର୍ତ୍ତୀକାଳୀନ ଅନୁମୋଦନ ପୂର୍ବରୁ ପ୍ରଦାନ କରାଯାଇଛି। ରାଜ୍ୟ ସରକାରଙ୍କୁ ବିଳମ୍ବ ନକରି ସମସ୍ତ ଆବଶ୍ୟକୀୟ ପ୍ରକ୍ରିୟାଗତ ଔପଚାରିକତା ସମାପ୍ତ କରିବାକୁ ଅନୁରୋଧ କରି ଶ୍ରୀ ଚୌହାନ ଉଲ୍ଲେଖ କରିଥଲେ ଯେ, ଏହା ସମୟୋଚିତ ଅନୁପାଳନ, ସୁଗମ କାର୍ଯ୍ୟାନ୍ୱୟନକୁ ସହଜ କରିବ। ଦେଶବ୍ୟାପୀ ଗ୍ରାମୀଣ ପରିବାରଗୁଡ଼ିକୁ ବିନା ବାଧାରେ ଯୋଜନାର ଲାଭ ପାଇବା ନିଶ୍ଚିତ କରିବ।
‘ଲକ୍ଷପତି ଦିଦି‘ ମିଶନ ପାଇଁ ନୂତନ ଗତି
ସମ୍ମଳନୀ ସମୟରେ, ‘ଲକ୍ଷପତି ଦିଦି ଡ୍ୟାସବୋର୍ଡ’ ଆରମ୍ଭ କରାଯାଇଥିଲା, ଏବଂ ସ୍ୱୟଂ ସହାୟକ ଗୋଷ୍ଠୀ ସହିତ ଜଡିତ ମହିଳାମାନଙ୍କ ପାଇଁ ଏକ ଡିଜିଟାଲ୍ ପ୍ଲାଟଫର୍ମ ‘ସି ଲିପ୍ସ’ (ସ୍ୱୟଂ ସହାୟକ ଉଦ୍ୟୋଗୀ – ସମୃଦ୍ଧି ଏବଂ ସ୍ଥାୟୀତ୍ୱ ପାଇଁ ଜୀବିକା ଏବଂ ଉଦ୍ୟୋଗର ଆବେଦନ) ଉଦଘାଟନ କରାଯାଇଥିଲା। ଶ୍ରୀ ଚୌହାନ ଉଲ୍ଲେଖ କରିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ‘ଲକ୍ଷପତି ଦିଦି’ ସୃଷ୍ଟି କରିବାର ଲକ୍ଷ୍ୟ ତିନି କୋଟିରୁ ଛଅ କୋଟିକୁ ବୃଦ୍ଧି କରିଛନ୍ତି। ଏହି ମହତ୍ୱାକାଂକ୍ଷୀ ଲକ୍ଷ୍ୟ ହାସଲ କରିବା ପାଇଁ, ଆଗାମୀ ପାଞ୍ଚ ବର୍ଷ ମଧ୍ୟରେ ୧୦ ଲକ୍ଷ କୋଟି ଟଙ୍କାର ବ୍ୟାଙ୍କ ସଂଯୋଗ ସହିତ ଏକ ରୋଡମ୍ୟାପ୍ ପ୍ରସ୍ତୁତ କରାଯାଇଛି। ଏହି ପଦକ୍ଷେପ ମହିଳାମାନଙ୍କର ଆର୍ଥିକ ଅନ୍ତର୍ଭୁକ୍ତିକୁ ସୁଦୃଢ଼ କରିବ, ଉଦ୍ୟୋଗୀତାକୁ ପ୍ରୋତ୍ସାହିତ କରିବ ଏବଂ ସ୍ଥାୟୀ ଜୀବିକା ସୁଯୋଗ ସୃଷ୍ଟି କରିବ। ଏହା ଦ୍ୱାରା ଲକ୍ଷ ଲକ୍ଷ ଗ୍ରାମୀଣ ମହିଳା ଆର୍ଥିକ ଭାବରେ ସ୍ୱାଧୀନ ହେବେ ଏବଂ ଗ୍ରାମୀଣ ସମୃଦ୍ଧିରେ ସକ୍ରିୟ ଭାବରେ ଯୋଗଦାନ ଦେବେ।
କାର୍ଯ୍ୟାନ୍ୱୟନରେ ଉନ୍ନତି ଆଣିବା ଉପରେ ଗୁରୁତ୍ୱାରୋପ
ଶ୍ରୀ ଚୌହାନ ଗ୍ରାମୀଣ ବିକାଶ କାର୍ଯ୍ୟକ୍ରମର କାର୍ଯ୍ୟାନ୍ୱୟନରେ ଉନ୍ନତି ଆଣିବା ପାଇଁ ଅନେକ ପ୍ରାଥମିକତା ସମ୍ପର୍କରେ ଉଲ୍ଲେଖ କରିଥିଲେ। ସେ କହିଥିଲେ ଯେ ରାଜ୍ୟଗୁଡ଼ିକ ସେମାନଙ୍କର ଆର୍ଥିକ ଅଂଶ ଠିକ୍ ସମୟରେ ପ୍ରଦାନ କରିବାକୁ ନିଶ୍ଚିତ କରିବା ଉଚିତ, ଯାହା ଦ୍ଵାରା ପ୍ରକଳ୍ପ ଏବଂ ଦେୟରେ କୌଣସି ବିଳମ୍ବ ହେବ ନାହିଁ। ସେ ଖାଲି ରହିଥିବା ଗ୍ରାମୀଣ ବିକାଶ ସମ୍ଵନ୍ଧିତ ପଦବୀଗୁଡ଼ିକୁ ତୁରନ୍ତ ପୂରଣ କରିବା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। ଉଲ୍ଲେଖ କରିଥିଲେ ଯେ ଦୀର୍ଘ ସମୟ ଧରି ପଦବୀ ଖାଲି ରହିଲେ ତାହା କାର୍ଯ୍ୟାନ୍ୱୟନ କ୍ଷମତାକୁ ଦୁର୍ବଳ କରିଥାଏ। ଅଧିକାରୀଙ୍କ ବାରମ୍ବାର ସ୍ଥାନାନ୍ତର କାର୍ଯ୍ୟାନ୍ୱୟନ ନିରନ୍ତରତା ଏବଂ ଦାୟିତ୍ୱକୁ ପ୍ରତିକୂଳ ଭାବରେ ପ୍ରଭାବିତ କରେ। ତେଣୁ, ପ୍ରମୁଖ ଦାୟିତ୍ୱରେ ଥିବା ଅଧିକାରୀମାନେ ସାଧାରଣତଃ ଅତି କମରେ ଦୁଇରୁ ତିନି ବର୍ଷ ପାଇଁ ସମାନ ପଦବୀରେ ରହିବା ଉଚିତ। ଯୋଗ୍ୟ ହିତାଧିକାରୀମାନଙ୍କୁ ସରକାରୀ ଯୋଜନା ବିଷୟରେ ସମ୍ପୂର୍ଣ୍ଣ ଅବଗତ କରାଇବା ପାଇଁ ସେ ବଡ଼ ଧରଣର ଜନସଚେତନତା ଅଭିଯାନର ଗୁରୁତ୍ୱ ଉପରେ ମଧ୍ୟ ଆଲୋକପାତ କରିଥିଲେ। ଦାୟିତ୍ୱର ଗୁରୁତ୍ୱକୁ ବୁଝାଇ ଶ୍ରୀ ଚୌହାନ ସମସ୍ତ କାର୍ଯ୍ୟକ୍ରମରେ ସ୍ୱଚ୍ଛତା, ଦକ୍ଷତା ଏବଂ ସେବା ପ୍ରଦାନକୁ ବୃଦ୍ଧି କରିବା ପାଇଁ ଦୃଢ଼ ସାମାଜିକ ଅଡିଟ୍ ଏବଂ କୃତ୍ରିମ ବୁଦ୍ଧିମତ୍ତା – ଆଧାରିତ ଯାଞ୍ଚ ବ୍ୟବସ୍ଥାର ବ୍ୟବହାର ବୃଦ୍ଧି କରିବାକୁ ଆହ୍ୱାନ କରିଥିଲେ।
ଗୃହ ନିର୍ମାଣ, ରାସ୍ତା ଏବଂ ଦକ୍ଷତା ବିକାଶ ଯୋଜନାର ସମୀକ୍ଷା
ପ୍ରଧାନମନ୍ତ୍ରୀ ଆବାସ ଯୋଜନା – ଗ୍ରାମୀଣ, ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା, ଏବଂ ଦୀନ ଦୟାଲ ଉପାଧ୍ୟାୟ ଗ୍ରାମୀଣ କୌଶଳ ଯୋଜନାର ପ୍ରଗତି ସମୀକ୍ଷା କରିବା ସମୟରେ, କେନ୍ଦ୍ର ମନ୍ତ୍ରୀ ଉଲ୍ଲେଖ କରିଥିଲେ ଯେ ଅନେକ ରାଜ୍ୟ ପ୍ରଶଂସନୀୟ କାର୍ଯ୍ୟ କରିଛନ୍ତି। ଆଉ କିଛି ରାଜ୍ୟଙ୍କୁ କାର୍ଯ୍ୟାନ୍ୱୟନର ଗତିକୁ ତ୍ୱରାନ୍ୱିତ କରିବା ଏବଂ ରହିଥିବା ତ୍ରୁଟିଗୁଡ଼ିକୁ ଦୂର କରିବା ଆବଶ୍ୟକ। ସେ ଗ୍ରାମୀଣ ଆବାସ ଯୋଜନା ଅଧୀନରେ ଯୋଗ୍ୟ ଭୂମିହୀନ ହିତାଧିକାରୀଙ୍କୁ ଜମି ପ୍ରଦାନ କରିବା ଉପରେ ବିଶେଷ ଗୁରୁତ୍ୱାରୋପ କରିଥିଲେ ଏବଂ ସମସ୍ତ ପଡ଼ି ରହିଥିବା ଗୃହ-ସମ୍ବନ୍ଧୀୟ ସମସ୍ୟାର ଶୀଘ୍ର ସମାଧାନ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରତ୍ୟେକ ଯୋଗ୍ୟ ଗ୍ରାମୀଣ ପରିବାରକୁ ମୌଳିକ ସୁବିଧା ସହିତ ଏକ ସ୍ଥାୟୀ ଘର ମିଳିବା ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ସେ ଦୋହରାଇଥିଲେ ଏବଂ କହିଥିଲେ ଯେ କୌଣସି ଯୋଗ୍ୟ ହିତାଧିକାରୀଙ୍କୁ ଏହି ଅଧିକାରରୁ ବଞ୍ଚିତ କରାଯିବା ଉଚିତ୍ ନୁହେଁ।
ସର୍ବୋତ୍ତମ ଅଭ୍ୟାସଗୁଡ଼ିକୁ ବାଣ୍ଟିବା ଏବଂ ସଂସ୍କାର ଗ୍ରହଣ କରିବାକୁ ନିବେଦନ
ଝାଡ଼ଖଣ୍ଡ, ବିହାର, ମହାରାଷ୍ଟ୍ର ଏବଂ ଆନ୍ଧ୍ରପ୍ରଦେଶ ଭଳି ରାଜ୍ୟଗୁଡ଼ିକ ଦ୍ୱାରା ଗ୍ରହଣ କରାଯାଇଥିବା ସଫଳ ପଦକ୍ଷେପଗୁଡ଼ିକ, ଯେପରିକି ମଲ୍ଟି-ଚ୍ୟାନେଲ୍ ମାର୍କେଟିଂ ମଡେଲ୍, ସମୁଦାୟ – ଆଧାରିତ ଉଦ୍ୟୋଗ ଏବଂ ଘରୋଇ ଜୀବିକା ଋଣ ଯୋଜନା, ବିଷୟରେ ଶ୍ରୀ ଚୌହାନ ଉଲ୍ଲେଖ କରିଥିଲେ। ଏହି ସର୍ବୋତ୍ତମ ଅଭ୍ୟାସଗୁଡ଼ିକୁ ନଥୀକରଣ କରାଯିବ ଏବଂ ସମସ୍ତ ରାଜ୍ୟକୁ ଏହା ପଠାଯିବ, ଯାହା ଦ୍ଵାରା ସଫଳ ନବସୃଜନକୁ ସାରା ଦେଶରେ ପ୍ରତିପାଦିତ କରାଯାଇପାରିବ ବୋଲି ସେ କହିଥିଲେ। ସେ ସ୍ପଷ୍ଟ ଭାବରେ ସ୍ଵୀକାର କରିଛନ୍ତି ଯେ ବିଭିନ୍ନ ଯୋଜନା ଏବଂ ପ୍ରଶାସନିକ ପ୍ରକ୍ରିୟାରେ ଉନ୍ନତି ପାଇଁ ଯଥେଷ୍ଟ ସୁଯୋଗ ରହିଛି। ରାଜ୍ୟଗୁଡ଼ିକୁ କେନ୍ଦ୍ରର ସମର୍ଥନର ଆଶ୍ୱାସନା ଦେଇ ସେ କହିଛନ୍ତି ଯେ ଯଦି ପ୍ରଚଳିତ ନିୟମ କିମ୍ବା ପ୍ରକ୍ରିୟା ବ୍ୟବହାରିକ ଅସୁବିଧା ସୃଷ୍ଟି କରୁଛି, ତେବେ ଗ୍ରାମୀଣ ବିକାଶ ମନ୍ତ୍ରଣାଳୟ, କେନ୍ଦ୍ର କ୍ୟାବିନେଟ ଏବଂ ଅର୍ଥ ମନ୍ତ୍ରଣାଳୟ ସହିତ ପରାମର୍ଶ କରି ଆବଶ୍ୟକ ସଂଶୋଧନ କରିବ।
ଜଳ ଅଭାବ ଏବଂ ମୌସୁମୀ ସମ୍ପର୍କରେ ସତର୍କତା
ସ୍ୱାଭାବିକ ଠାରୁ କମ୍ ବର୍ଷା ହେବାର ସମ୍ଭାବନା ଉପରେ ଚିନ୍ତା ପ୍ରକାଶ କରି, ଗ୍ରାମୀଣ ବିକାଶ ଏବଂ କୃଷି ଏବଂ କୃଷକ କଲ୍ୟାଣ ମନ୍ତ୍ରୀ ୧୪ଟି ରାଜ୍ୟକୁ ସତର୍କ ରହିବା ଏବଂ ଯେକୌଣସି ଆହ୍ଵାନମୂଳକ ପରିସ୍ଥିତି ପାଇଁ ଆଗୁଆ ପ୍ରସ୍ତୁତ ହେବାକୁ ଅନୁରୋଧ କରିଛନ୍ତି। ସେ ରାଜ୍ୟ ସରକାରଙ୍କୁ ଜଳ ସଂରକ୍ଷଣ ଭିତ୍ତିଭୂମିକୁ ମଜବୁତ କରିବାକୁ ଏବଂ ଆବଶ୍ୟକ ହେଲେ ଗ୍ରାମାଞ୍ଚଳରେ ଅତିରିକ୍ତ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ପର୍ଯ୍ୟାପ୍ତ ପ୍ରସ୍ତୁତି କରିବାକୁ ନିର୍ଦ୍ଦେଶ ଦେଇଛନ୍ତି। ସକ୍ରିୟ ଯୋଜନା ସରକାରଙ୍କ ପାଇଁ ଲୋକଙ୍କ ଜୀବିକା ଏବଂ କୃଷି କାର୍ଯ୍ୟକଳାପକୁ ସୁରକ୍ଷା ଦେବା ସହିତ ଅଭାବୀ ବର୍ଷାରୁ ଉପୁଜିଥିବା ସମସ୍ୟାଗୁଡିକୁ ପ୍ରଭାବଶାଳୀ ଭାବରେ ମୁକାବିଲା କରିବା ସମ୍ଭବ କରିବ।
ସହଭାଗୀତା ମାଧ୍ୟମରେ ପରିବର୍ତ୍ତନର ବାର୍ତ୍ତା
ଏହା ପ୍ରତିଯୋଗିତାର ସମୟ ନୁହେଁ, ବରଂ ସହଭାଗୀତା ଏବଂ ସାମୂହିକ କାର୍ଯ୍ୟର ସମୟ ବୋଲି ଶ୍ରୀ ଚୌହାନ କହିଛନ୍ତି । କେନ୍ଦ୍ର ନୀତି ଗଠନ ଉପରେ ଧ୍ୟାନ ଦେବା ଉଚିତ, ରାଜ୍ୟଗୁଡ଼ିକ ପ୍ରଭାବଶାଳୀ କାର୍ଯ୍ୟାନ୍ୱୟନ ସୁନିଶ୍ଚିତ କରିବା ଉଚିତ, ପଞ୍ଚାୟତଗୁଡ଼ିକ ତୃଣମୂଳ ସ୍ତରରେ ନେତୃତ୍ୱ ପ୍ରଦାନ କରିବା ଉଚିତ ଏବଂ ନାଗରିକମାନେ ବିକାଶ ପ୍ରକ୍ରିୟାରେ ସକ୍ରିୟ ଅଂଶଗ୍ରହଣକାରୀ ହେବା ଉଚିତ ବୋଲି ସେ ଗୁରୁତ୍ୱାରୋପ କରିଥିଲେ। ତାଙ୍କ ମତରେ, କେବଳ ଏପରି ଏକ ସହଯୋଗୀ ମଡେଲ ହିଁ ଗ୍ରାମୀଣ ଭାରତର ଭବିଷ୍ୟତକୁ ପରିବର୍ତ୍ତନ କରିପାରିବ ଏବଂ ସାରା ଦେଶରେ ଗ୍ରାମୀଣ ସମୁଦାୟର ଜୀବନର ଗୁଣବତ୍ତା ଏବଂ ଆର୍ଥିକ ସମ୍ଭାବନାରେ ମୌଳିକ ଉନ୍ନତି ଆଣିପାରିବ।
ଯୁବ ଏବଂ ନବସୃଜନକୁ ପ୍ରୋତ୍ସାହିତ କରିବା
ଭିବି – ଜି ରାମ-ଜି ପଦକ୍ଷେପ ଅଧୀନରେ ଅନୁଷ୍ଠିତ ଲୋଗୋ ଡିଜାଇନ୍, କୁଇଜ୍ ଏବଂ ଡିଜିଟାଲ୍ ବିଷୟବସ୍ତୁ ପ୍ରତିଯୋଗିତାର ବିଜେତାମାନଙ୍କୁ ସମ୍ମାନିତ କରିବା ସହିତ ସମ୍ମିଳନୀ ଶେଷ ହୋଇଥିଲା। ଶିବରାଜ ସିଂହ ଚୌହାନ ପୁରସ୍କାର ପ୍ରଦାନ କରିଥିଲେ। ଗ୍ରାମୀଣ ବିକାଶରେ ନୂତନ ଚିନ୍ତାଧାରା, ନବସୃଜନ ମଡେଲ ଏବଂ ଉଦୀୟମାନ ପଦ୍ଧତି ଉପରେ କେନ୍ଦ୍ରିତ ଅନେକ ପ୍ରକାଶନ ମଧ୍ୟ ଏହି କାର୍ଯ୍ୟକ୍ରମ ସମୟରେ ଉନ୍ମୋଚିତ ହୋଇଥିଲା। ଏହା ଗ୍ରାମୀଣ ବିକାଶ କ୍ଷେତ୍ରରେ ନବସୃଜନକୁ ପ୍ରୋତ୍ସାହିତ କରିବା, ଯୁବ ପ୍ରତିଭାକୁ ଚିହ୍ନଟ କରିବା ଏବଂ ନୂତନ ଚିନ୍ତାଧାରାକୁ ଉତ୍ସାହିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ସ୍ପଷ୍ଟ କରିଥିଲା।