ନୂଆଦିଲ୍ଲୀ: ଦିଲ୍ଲୀର ଜନ୍ତରମନ୍ତରରେ ସୋନମ ୱାଙ୍ଗଚୁକଙ୍କ ଅନଶନ ୨୦ ତମ ଦିନ ପାଇଁ ଜାରି ରହିଛି। ଅନେକ ରାଜନୈତିକ ଦଳର ନେତା ୱାଙ୍ଗଚୁକଙ୍କୁ ଭେଟି ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଚିନ୍ତା ପ୍ରକାଶ କରି ଅନଶନ ସମାପ୍ତ କରିବାକୁ ଅନୁରୋଧ କରିଛନ୍ତି। କିନ୍ତୁ ୱାଙ୍ଗଚୁକ ଅଟଳ ରହିଛନ୍ତି। ସେ ହାଲୁକା ସ୍ୱରରେ କହିଛନ୍ତି ଯେ, “ମୁଁ ଯେକୌଣସି ମୂଲ୍ୟରେ ଜୁଲାଇ ୨୦ ପର୍ଯ୍ୟନ୍ତ ବଞ୍ଚି ରହିବି। ଯଦି ଆପଣ ଆସିବେ ନାହିଁ ଏବଂ ଜୁଲାଇ ୨୦ ତାରିଖର ପ୍ରତିବାଦ ସଫଳ ନ ହୁଏ, ତେବେ ମୁଁ ଭୂତ ହୋଇ ଫେରିବି।” ପ୍ରକୃତରେ କକ୍ରୋଚ୍ ଜନତା ପାର୍ଟି ଜୁଲାଇ ୨୦ ତାରିଖରେ ସଂସଦ ଅଭିମୁଖେ ଏକ ପଦଯାତ୍ରା ଘୋଷଣା କରିଛି।
ସୋନମ ୱାଙ୍ଗଚୁକ କେବଳ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଚାହାଁନ୍ତି ନାହିଁ, ବରଂ ତାଙ୍କର ଆହୁରି ଅନେକ ଦାବି ମଧ୍ୟ ଅଛି।
ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା
NTA ର ବିଲୟ
ଏକ ବୈଧାନିକ ଜାତୀୟ ପରୀକ୍ଷା କମିଶନ ଗଠନ
ପରୀକ୍ଷା ଏଜେନ୍ସିଗୁଡ଼ିକର CAG ଅଡିଟ୍
ପରୀକ୍ଷା ପାଇଁ ସ୍ଥିର କ୍ୟାଲେଣ୍ଡର
ପ୍ରଭାବିତ ଛାତ୍ରଛାତ୍ରୀମାନଙ୍କ ପାଇଁ ଅଧିକାର ଚାର୍ଟର ଏବଂ କଲ୍ୟାଣ ପାଣ୍ଠି
ପେପର ଲିକ୍ ଉପରେ ସଂସଦରେ ଶ୍ୱେତପତ୍ର
କେ. ରାଧାକୃଷ୍ଣନ କମିଟି ସୁପାରିଶକୁ କାର୍ଯ୍ୟକାରୀ କରିବା
ସୋନମ ୱାଙ୍ଗଚୁକଙ୍କ ଅନଶନ ମଧ୍ୟରେ ଡାକ୍ତରମାନେ ଚେତାବନୀ ଦେଇଛନ୍ତି ଯେ, ତାଙ୍କର ଦୀର୍ଘ ଉପବାସ ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ପହଞ୍ଚିଛି। ପ୍ରତିବାଦ ସ୍ଥଳରେ ସମର୍ଥକମାନଙ୍କୁ ସମ୍ବୋଧିତ କରି ୱାଙ୍ଗଚୁକ୍ ତାଙ୍କର ଅବନତିଶୀଳ ଶାରୀରିକ ଅବସ୍ଥାକୁ ସ୍ୱୀକାର କରିଛନ୍ତି କିନ୍ତୁ ତାଙ୍କର ସଂକଳ୍ପ ଅଟଳ ରହିଛି। ସେ କହିଛନ୍ତି ଯେ, “ମୁଁ ବାହାରେ ଦୁର୍ବଳ, କିନ୍ତୁ ଭିତରେ ବହୁତ ଶକ୍ତିଶାଳୀ। ମୁଁ ନିଶ୍ଚିତ ଯେ, ଆପଣ ସମସ୍ତେ ଭିତରେ ଏବଂ ବାହାରେ ଉଭୟ ଶକ୍ତିଶାଳୀ। ଜୁଲାଇ ୨୦ ତାରିଖ ପାଇଁ ଆମକୁ ଏହି ଶକ୍ତିର ଆବଶ୍ୟକତା ଅଛି, ଯେତେବେଳେ ଆମେ ସଂସଦକୁ ଏକ ଶାନ୍ତିପୂର୍ଣ୍ଣ ପଦଯାତ୍ରା କରିବୁ। ଏକାଠି, ଆମେ ଗଣତନ୍ତ୍ରର ମନ୍ଦିରରେ ଆମର ମତାମତ ଉପସ୍ଥାପନ କରିବୁ।”
ଗତ ୨୪ ଘଣ୍ଟା ମଧ୍ୟରେ ୱାଙ୍ଗଚୁକ୍ଙ୍କ ଓଜନ ଆଉ ୩୫୦ ଗ୍ରାମ ହ୍ରାସ ପାଇଛି, ଯାହା ଫଳରେ ତାଙ୍କର ମୋଟ ଓଜନ ପ୍ରାୟ ୯.୫ କିଲୋଗ୍ରାମ କମ ହୋଇଛି। ତାଙ୍କ ଚିକିତ୍ସା କରୁଥିବା ଡାକ୍ତରଙ୍କ ଦଳ ଦ୍ୱାରା ଜାରି କରାଯାଇଥିବା ସ୍ୱାସ୍ଥ୍ୟ ବୁଲେଟିନ୍ ଅନୁଯାୟୀ, ୱାଙ୍ଗଚୁକ୍ଙ୍କ ଓଜନ ଏବେ ୫୬.୫୫ କିଲୋଗ୍ରାମ। ତାଙ୍କ ରକ୍ତଚାପ ୧୦୮/୬୮ mmHg, ରକ୍ତରେ ଶର୍କରା ୮୦ ମିଗ୍ରା/ଡିଏଲ, ପଲ୍ସ ରେଟ ପ୍ରତି ମିନିଟ୍ରେ ୭୨ ବିଟ୍ସ ଏବଂ ଅମ୍ଳଜାନ ସାଚୁରେସନ୍ ୯୬ ପ୍ରତିଶତ ରେକର୍ଡ କରାଯାଇଛି।