ନୂଆଦିଲ୍ଲୀ: ପରବର୍ତ୍ତୀ ପିଢ଼ିର ବୁଡ଼ାଜାହାଜ ପାଇଁ ଏକ ଚୁକ୍ତି ଭାରତ ଏବଂ ଜର୍ମାନୀ ମଧ୍ୟରେ ଖୁବ୍ ଶୀଘ୍ର ସ୍ୱାକ୍ଷରିତ ହେବ ବୋଲି ଆଶା କରାଯାଉଛି। ଏନେଇ ଭାରତରେ ଜର୍ମାନ ରାଷ୍ଟ୍ରଦୂତ ଫିଲିପ୍ ଆକରମ୍ୟାନ୍ କହିଛନ୍ତି। ସୂଚନା ଅନୁଯାୟୀ, ଭାରତ ଏବଂ ଜର୍ମାନୀ ପ୍ରୋଜେକ୍ଟ- 75I ବୁଡ଼ାଜାହାଜ ଚୁକ୍ତିନାମାକୁ ଚୂଡ଼ାନ୍ତ କରୁଛନ୍ତି।
ପିଟିଆଇର ଏକ ରିପୋର୍ଟ ଅନୁଯାୟୀ, ଏହି ଚୁକ୍ତିନାମା ପ୍ରାୟ 90,000 କୋଟି ଟଙ୍କାରୁ ଅଧିକ ମୂଲ୍ୟର, ଯାହା ଅଧୀନରେ ଭାରତୀୟ ନୌସେନା ପାଇଁ ଭାରତରେ ଛଅଟି ପରବର୍ତ୍ତୀ ପିଢ଼ିର ପାରମ୍ପରିକ ବୁଡ଼ାଜାହାଜ ନିର୍ମାଣ କରାଯିବ। ଜର୍ମାନୀର ଥାଇସେନକ୍ରୁପ୍ ମାରିନ୍ ସିଷ୍ଟମ୍ସ (TKMS) ଏବଂ ଭାରତର ରାଷ୍ଟ୍ରାୟତ୍ତ ମଝଗାଓଁ ଡକ୍ ସିପ୍ ବିଲ୍ଡର୍ସ ଏହି ଚୁକ୍ତିନାମାରେ ସ୍ୱାକ୍ଷର କରିବେ ବୋଲି ଆଶା କରାଯାଉଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, TKMS ଭାରତୀୟ ଅଂଶୀଦାରମାନଙ୍କର ଏକ ନେଟୱାର୍କ ନିର୍ମାଣ କରୁଛି। ଜର୍ମାନ କମ୍ପାନୀ ହାଇଦ୍ରାବାଦ-ଭିଇଏମ୍ ଟେକ୍ନୋଲୋଜି ସହିତ ଏକ ଚୁକ୍ତିନାମା ସ୍ୱାକ୍ଷର କରିଛି। ଏହି ଚୁକ୍ତିନାମା ହେଭିୱେଟ୍ ଟର୍ପେଡୋ ନିର୍ମାଣ ଏବଂ ଆଧୁନିକୀକରଣ କରିବା ଲକ୍ଷ୍ୟ ରଖିଛି। ଗୁରୁତ୍ୱପୂର୍ଣ୍ଣ କଥା ହେଉଛି, TKMSର ସହାୟକ କମ୍ପାନୀ, ଆଟଲାସ୍ ଇଲେକ୍ଟ୍ରୋନିକ୍ସ ମଧ୍ୟ ଏହି ଚୁକ୍ତିନାମାରେ ସାମିଲ ଅଛି। VEM ଭାରତ ପକ୍ଷରୁ ସମନ୍ୱୟ ଏବଂ ପରୀକ୍ଷଣ ପରିଚାଳନା କରୁଛି।