ନୂଆଦିଲ୍ଲୀ: ତୃଣମୂଳ ସ୍ତରରେ ଡିଜିଟାଲ୍ ଭିତ୍ତିଭୂମିକୁ ମଜବୁତ୍ କରିବା ପାଇଁ ‘ଦାନବୀର’ ସାଜି ଜନ ଭାଗୀଦାରୀରେ ସାମିଲ ହେବାକୁ ପଞ୍ଚାୟତ ରାଜ ମନ୍ତ୍ରାଳୟ ନିବେଦନ କରିଛି। ଏହି କମ୍ପ୍ୟୁଟର କ୍ରାଉଡ୍ସୋର୍ସିଂ ଅଭିଯାନ ମାଧ୍ୟମରେ ସାଧାରଣ ନାଗରିକ ଏବଂ ଅନୁଷ୍ଠାନଗୁଡ଼ିକ ଏକ ସରଳ, ସ୍ୱଚ୍ଛ ଓ ପ୍ରଯୁକ୍ତିବିଦ୍ୟା-ଭିତ୍ତିକ ବ୍ୟବସ୍ଥା ଦ୍ୱାରା ନିଜର ଡେସ୍କଟପ୍ କମ୍ପ୍ୟୁଟର ସିଧାସଳଖ ଯୋଗ୍ୟ ଗ୍ରାମ ପଞ୍ଚାୟତଗୁଡ଼ିକୁ ଦାନ କରିପାରିବେ। ରାଷ୍ଟ୍ରୀୟ ଗ୍ରାମ ସ୍ୱରାଜ ଅଭିଯାନ ଭଳି ସରକାରୀ ଯୋଜନା ଜରିଆରେ ଯୋଗାଇ ଦିଆଯାଉଥିବା ଭିତ୍ତିଭୂମି ସହାୟତାକୁ ଆହୁରି ସୁଦୃଢ଼ କରିବା ସହ ତୃଣମୂଳ ସ୍ତରରେ ଡିଜିଟାଲ୍ ଶାସନ ଓ ସେବା ଯୋଗାଣ ପ୍ରକ୍ରିୟାକୁ ଗତିଶୀଳ କରିବା ଏହି ସ୍ୱେଚ୍ଛାକୃତ ଜନ ଭାଗୀଦାରୀ ଅଭିଯାନର ମୁଖ୍ୟ ଲକ୍ଷ୍ୟ।
‘ଦାନବୀର’ ଗ୍ରାମ ପଞ୍ଚାୟତକୁ କମ୍ପ୍ୟୁଟର ଦାନ କରିବା ଅନଲାଇନ୍ କ୍ରୟ ପରି ସରଳ ଏବଂ ସୁବିଧାଜନକ କରିଥାଏ। ‘ମେରୀ ପଞ୍ଚାୟତ’ ଆପ୍ ମାଧ୍ୟମରେ ନାଗରିକମାନେ ସମ୍ପୃକ୍ତ ରାଜ୍ୟ ସରକାରଙ୍କ ଦ୍ୱାରା ଯାଞ୍ଚ ହୋଇଥିବା ଏବଂ ଡେସ୍କଟପ୍ କମ୍ପ୍ୟୁଟର ଆବଶ୍ୟକ କରୁଥିବା ଗ୍ରାମ ପଞ୍ଚାୟତଗୁଡ଼ିକୁ ଦେଖିପାରିବେ। ନିଜ ଗ୍ରାମ ପଞ୍ଚାୟତ କିମ୍ବା ଅନ୍ୟ କୌଣସି ଯୋଗ୍ୟ ଗ୍ରାମ ପଞ୍ଚାୟତକୁ ନିଜ ମୋବାଇଲ୍ ଫୋନ୍ରୁ ହିଁ ସହାୟତା କରିପାରିବେ। ‘ଡୋନେଟ୍ କମ୍ପ୍ୟୁଟର’ ଉପରେ କ୍ଲିକ୍ କରିବା ପରେ ଦାତାଙ୍କୁ କୌଣସି ପୃଥକ ପଞ୍ଜୀକରଣର ଆବଶ୍ୟକତା ବିନା ସୁରକ୍ଷିତ ଭାବେ ଓଏନ୍ଡିସି ସକ୍ଷମ ଡିଜିଟାଲ୍ ବଜାର ‘ଡିଜିହାଟ୍’କୁ ପଠାଇ ଦିଆଯାଏ। ଚୟନ କରାଯାଇଥିବା ପଞ୍ଚାୟତର ଠିକଣା ଓ ପ୍ରାପ୍ତକର୍ତ୍ତାଙ୍କ ବିବରଣୀ ସ୍ୱୟଂଚାଳିତ ଭାବେ ପୂରଣ ହୋଇଯାଏ, ଫଳରେ ହାତରେ ତଥ୍ୟ ଭରିବାର ଆବଶ୍ୟକତା ପଡେ ନାହିଁ।
ଦାତାମାନେ ନିର୍ଦ୍ଧାରିତ ବୈଷୟିକ ମାନଦଣ୍ଡ ଅନୁଯାୟୀ ପ୍ରସ୍ତୁତ ମାନକ କମ୍ପ୍ୟୁଟର ପ୍ୟାକେଜ୍ ମଧ୍ୟରୁ ଚୟନ କରି, ଡିଜିଟାଲ୍ ମାଧ୍ୟମରେ ଅର୍ଥ ପୈଠ କରିପାରିବେ ଏବଂ ଅର୍ଡର ନିଶ୍ଚିତକରଣ, ପ୍ରେରଣ ଠାରୁ ଆରମ୍ଭ କରି ଡେଲିଭରି ଓ ପ୍ରାପ୍ତି ସ୍ୱୀକୃତି ପର୍ଯ୍ୟନ୍ତ ସମଗ୍ର ପ୍ରକ୍ରିୟାକୁ ଟ୍ରାକ୍ କରିପାରିବେ। ଗ୍ରାମ ପଞ୍ଚାୟତ ସଚିବଙ୍କ ଦ୍ୱାରା ପ୍ରାପ୍ତି ସ୍ୱୀକୃତି ଦିଆଯିବା ପରେ ଦାତାଙ୍କୁ ଡିଜିଟାଲ୍ ଭାବେ ପ୍ରସ୍ତୁତ ‘ପ୍ରଶଂସାପତ୍ର’ ପ୍ରଦାନ କରାଯିବ। ଏହିପରି, ଏହି ପଦକ୍ଷେପ ଅଧୀନରେ ଅର୍ଡର ଦେବାଠାରୁ ଆରମ୍ଭ କରି କମ୍ପ୍ୟୁଟର ଡେଲିଭରି ପର୍ଯ୍ୟନ୍ତ ଦାନ ପ୍ରକ୍ରିୟାର ପ୍ରତ୍ୟେକ ପର୍ଯ୍ୟାୟକୁ ‘ରିଅଲ୍ ଟାଇମ୍ରେ ଟ୍ରାକ୍ କରାଯାଇପାରିବ’, ଯାହା ସଂମ୍ପୂର୍ଣ୍ଣ ସ୍ୱଚ୍ଛତା ସୁନିଶ୍ଚିତ କରିବ।
‘ଦାନବୀର’ ମାଧ୍ୟମରେ ଦାନ କରାଯାଇଥିବା ଏକ କମ୍ପ୍ୟୁଟର ଗ୍ରାମ ପଞ୍ଚାୟତର ଯୋଜନା ପ୍ରସ୍ତୁତି, ଆର୍ଥିକ ପରିଚାଳନା, ରେକର୍ଡ ସଂରକ୍ଷଣ ଏବଂ ନାଗରିକଙ୍କୁ ସେବା ପ୍ରଦାନ ଭଳି କାର୍ଯ୍ୟରେ ଡିଜିଟାଲ ଶାସନ ପ୍ଲାଟଫର୍ମଗୁଡ଼ିକର ପ୍ରଭାବଶାଳୀ ବ୍ୟବହାର କ୍ଷମତାକୁ ସୁଦୃଢ଼ କରିପାରିବ। ଏହି ପଦକ୍ଷେପ ଏହି ପ୍ରଭାବ ସହ ଏକ ସ୍ୱଚ୍ଛ ଦାନ ପ୍ରକ୍ରିୟାକୁ ଯୋଡ଼ିଛି। ଏହା ମାଧ୍ୟମରେ ଜନସାଧାରଣ ନିଜ ଗ୍ରାମ ପଞ୍ଚାୟତର ଦାନର ସ୍ଥିତି ଦେଖିପାରିବା ସହ ଦାତାମାନେ ନିଜ ଅବଦାନକୁ ଡିଜିଟାଲ ଭାବେ ଟ୍ରାକ୍ କରିପାରିବେ। ନିଜ ଗାଁଠାରୁ ଦୂରରେ ରହୁଥିବା ନାଗରିକ, ଭାରତୀୟ ପ୍ରବାସୀ ସମୁଦାୟ, ପରୋପକାରୀ ସଂଗଠନ ଏବଂ ସିଏସ୍ଆର ସହଯୋଗୀମାନଙ୍କ ପାଇଁ ମଧ୍ୟ ଏହା ତୃଣମୂଳ ସ୍ତରର ଡିଜିଟାଲ ଭିତ୍ତିଭୂମିରେ ଅବଦାନ ଦେବା ଏବଂ ନିଜ ଗାଁ ସହ ପୁନଃ ଯୋଡ଼ିହେବାର ଏକ ବିଶ୍ୱସନୀୟ ମାଧ୍ୟମ ପ୍ରଦାନ କରୁଛି।
ଅଧିକ ରାଜ୍ୟ ଯୋଗ୍ୟ ଗ୍ରାମ ପଞ୍ଚାୟତଗୁଡ଼ିକୁ ଏହି ପଦକ୍ଷେପରେ ସାମିଲ କରୁଥିବାରୁ, ‘ଦାନବୀର’ ଭବିଷ୍ୟତରେ ସୁଦୃଢ଼ ଓ ଡିଜିଟାଲ ଭାବେ ସଶକ୍ତ ପଞ୍ଚାୟତ ପାଇଁ ଏକ ଦେଶବ୍ୟାପୀ ଜନଆନ୍ଦୋଳନର ରୂପ ନେବାର ସମ୍ଭାବନା ରହିଛି। ୨୭ ଅଗଷ୍ଟ ୨୦୨୬ ମସିହା ସୁଦ୍ଧା ୭୫ଟି ଦାନ ହୋଇସାରିଛି, ଯାହା ଏହି ପଦକ୍ଷେପ ପ୍ରତି ଜନସାଧାରଣଙ୍କ ଉତ୍ସାହପୂର୍ଣ୍ଣ ପ୍ରତିକ୍ରିୟା ଓ ବଢ଼ୁଥିବା ଗ୍ରହଣୀୟତାକୁ ପ୍ରତିଫଳିତ କରୁଛି। ଦାନ ପ୍ରକ୍ରିୟା ସଫଳତାର ସହ ସମ୍ପନ୍ନ ହେବା ପରେ ଦାତାମାନଙ୍କୁ ପ୍ରଶଂସାପତ୍ର ପ୍ରଦାନ କରାଯାଏ। ଏହା ସ୍ଥାନୀୟ ଶାସନକୁ ସୁଦୃଢ଼ କରିବାରେ ସେମାନଙ୍କ ଅବଦାନକୁ ସ୍ୱୀକୃତି ଦିଏ। ‘ଦାନବୀର’ ଅଂଶଗ୍ରହଣମୂଳକ ଶାସନର ଏକ ଅଭିନବ ମଡେଲ୍ ଭାବେ ସରକାରଙ୍କ ତୃଣମୂଳ ସ୍ତରର ପ୍ରତିଷ୍ଠାନଗୁଡ଼ିକୁ ସୁଦୃଢ଼ କରିବାର ପ୍ରୟାସକୁ ସ୍ୱେଚ୍ଛାକୃତ ଜନଭାଗିଦାରୀ ମାଧ୍ୟମରେ ପରିପୂରକ କରୁଛି। ନାଗରିକ, ପରୋପକାରୀ ବ୍ୟକ୍ତି ଓ ସଂଗଠନ, ସିଏସ୍ଆର ସହଯୋଗୀ ଏବଂ ଭାରତୀୟ ପ୍ରବାସୀ ସମୁଦାୟର ସଦସ୍ୟମାନଙ୍କୁ ଆଗେଇ ଆସି ‘ଦାନବୀର’ ହେବାକୁ ଆହ୍ୱାନ କରାଯାଇଛି।