ନୂଆଦିଲ୍ଲୀ: ନିଟ୍ ପ୍ରଶ୍ନପତ୍ର ଲିକ୍ ବିବାଦକୁ ନେଇ ଦେଶବ୍ୟାପୀ ଆନ୍ଦୋଳନ କରିଥିବା ଛାତ୍ରଛାତ୍ରୀଙ୍କୁ ସୁପ୍ରିମକୋର୍ଟଙ୍କ ପକ୍ଷରୁ ଏକ ବଡ଼ ଆଇନଗତ ଆଶ୍ୱସ୍ତି ମିଳିଛି। ସମ୍ବିଧାନର ଧାରା ୧୪୨ ଅଧୀନରେ ଥିବା ନିଜର ସ୍ୱତନ୍ତ୍ର ତଥା ଅସାଧାରଣ କ୍ଷମତା ପ୍ରୟୋଗ କରି ସର୍ବୋଚ୍ଚ ଅଦାଲତ ଆନ୍ଦୋଳନକାରୀ ଛାତ୍ରଛାତ୍ରୀଙ୍କ ବିରୋଧରେ ଦେଶର ବିଭିନ୍ନ ରାଜ୍ୟରେ ରୁଜୁ ହୋଇଥିବା ସମସ୍ତ ପ୍ରଥମ ସୂଚନା ଦାବି କିମ୍ବା ମାମଲାକୁ ସମ୍ପୂର୍ଣ୍ଣ ରୂପେ ରଦ୍ଦ କରିଛନ୍ତି। ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚୀ ଏବଂ ଜଷ୍ଟିସ ଭି. ମୋହନାଙ୍କୁ ନେଇ ଗଠିତ ତିନିଜଣିଆ ଖଣ୍ଡପୀଠ ଏହି ଐତିହାସିକ ନିର୍ଦ୍ଦେଶ ଦେଇଛନ୍ତି। ଛାତ୍ରଛାତ୍ରୀଙ୍କ ଭବିଷ୍ୟତ ଓ କ୍ୟାରିୟରକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଥିବା ବେଳେ ଏହାକୁ କୌଣସି ପୂର୍ବ ଉଦାହରଣ ଭାବେ ଗ୍ରହଣ କରାଯିବ ନାହିଁ ବୋଲି କୋର୍ଟ ସ୍ପଷ୍ଟ କରିଛନ୍ତି।
ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶ ଫଳରେ ଗତ ଜୁଲାଇ ୨୦ରୁ ୨୫ ତାରିଖ ମଧ୍ୟରେ ଦିଲ୍ଲୀର ଯନ୍ତରମନ୍ତର ସମେତ ପଶ୍ଚିମବଙ୍ଗ, ଆସାମ, ବିହାର ତଥା ଦେଶର ବିଭିନ୍ନ ଭାଗରେ ରୁଜୁ ହୋଇଥିବା ସମସ୍ତ ମାମଲା ଖାରଜ ହୋଇଛି। ଏଥିସହିତ ଏହି ଘଟଣାରେ ଛାତ୍ରଛାତ୍ରୀଙ୍କ ବିରୋଧରେ କୌଣସି ନୂତନ ମାମଲା ରୁଜୁ ନ କରିବାକୁ ମଧ୍ୟ କେନ୍ଦ୍ର ଓ ଦିଲ୍ଲୀ ପୋଲିସକୁ କୋର୍ଟ ନିର୍ଦ୍ଦେଶ ଦେଇଛନ୍ତି। କେନ୍ଦ୍ର ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟଙ୍କୁ ଜଣାଇଥିଲେ ଯେ, ଆନ୍ଦୋଳନକାରୀ ସଂଗଠନ ସହ ହୋଇଥିବା ଆଲୋଚନା ଅନୁଯାୟୀ ସରକାର ତିନୋଟିଯାକ ପ୍ରତିଶ୍ରୁତି ପୂରଣ କରିବାକୁ ବଦ୍ଧପରିକର। ନିଟ୍ ପରୀକ୍ଷା ବାତିଲ ପରେ ଆତ୍ମହତ୍ୟା କରିଥିବା ଛାତ୍ରଛାତ୍ରୀଙ୍କ ପରିବାରକୁ କ୍ଷତିପୂରଣ ପ୍ରଦାନ ପାଇଁ ତିନି ମାସ ମଧ୍ୟରେ ସମସ୍ତ ନିୟମାବଳୀ ଚୂଡ଼ାନ୍ତ କରାଯିବ।
ତେବେ ଅଦାଲତ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଆନ୍ଦୋଳନ ସମୟରେ ଉପସ୍ଥିତ ଥିବା ଦୁଇ ହଜାର ଆଠ ଶହ ସତେଶରୀ ଜଣ ପୁରୁଣା ଓ ଗୁରୁତର ଅପରାଧିକ ପୃଷ୍ଠଭୂମି ଥିବା ବ୍ୟକ୍ତିଙ୍କ ବିରୋଧରେ ଦିଲ୍ଲୀ ପୋଲିସ୍ ଆଇନଗତ କାର୍ଯ୍ୟାନୁଷ୍ଠାନ ଓ ତଦନ୍ତ ଜାରି ରଖିପାରିବ। ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶ ଏବଂ ସରକାରଙ୍କ ସକାରାତ୍ମକ ପ୍ରତିଶ୍ରୁତି ପରେ କକ୍ରୋଚ ଜନତା ପାର୍ଟି ପକ୍ଷରୁ ଆସନ୍ତା ସେପ୍ଟେମ୍ବର ୫ ତାରିଖରେ ହେବାକୁ ଥିବା ପ୍ରତିବାଦ ଶୋଭାଯାତ୍ରାକୁ ପ୍ରତ୍ୟାହୃତ କରିନିଆଯାଇଛି। ସଂଗଠନର ସହ-ଆବାହକ ସୌରଭ ଦାସ କୋର୍ଟଙ୍କ ନିଷ୍ପତ୍ତିକୁ ସ୍ୱାଗତ କରିବା ସହ ଏତେ ସଂଖ୍ୟକ ଅପରାଧୀ ପ୍ରତିବାଦ ସ୍ଥଳରେ କିପରି ଉପସ୍ଥିତ ଥିଲେ ଏବଂ ସେମାନେ ପୂର୍ବରୁ କାହିଁକି ଖୋଲାରେ ବୁଲୁଥିଲେ ବୋଲି ପ୍ରଶ୍ନ ଉଠାଇଛନ୍ତି।