ଇଂଲଣ୍ଡ : ଇଂଲଣ୍ଡ କ୍ରିକେଟ୍ ବୋର୍ଡ (ଇସିବି) ପ୍ରଶଂସକଙ୍କୁ ବଡ଼ ସରପ୍ରାଇଜ୍ ଦେଇ ପୂର୍ବତନ ମହାନ ବ୍ୟାଟର୍ କେଭିନ୍ ପିଟରସନ୍ଙ୍କୁ ଟିମ୍ରେ ସାମିଲ କରିଛି। ଦକ୍ଷିଣ ଆଫ୍ରିକାରେ ହେବାକୁ ଥିବା ୨୦୨୭ ବିଶ୍ୱକପ୍କୁ ଧ୍ୟାନରେ ରଖି ପିଟରସନ୍ଙ୍କୁ ଇଂଲଣ୍ଡ ହ୍ୱାଇଟ୍-ବଲ୍ ଟିମ୍ର ସ୍ପେଶାଲ୍ ମେଣ୍ଟର ନିଯୁକ୍ତ କରାଯାଇଛି। ସେ ମୁଖ୍ୟତଃ ବ୍ରେଣ୍ଡନ୍ ମ୍ୟାକୁଲମ୍ଙ୍କ ସପୋର୍ଟ ଷ୍ଟାଫ୍ରେ ଯୋଗଦେବେ ଏବଂ ଶ୍ରୀଲଙ୍କା ବିପକ୍ଷ ଆଗାମୀ ସୀମିତ ଓଭର ସିରିଜ୍ରୁ ନିଜ ଦାୟିତ୍ୱ ସମ୍ଭାଳିବେ। ଶ୍ରୀଲଙ୍କା ବିପକ୍ଷ ୩ଟି ଟି-୨୦ ଓ ୩ଟି ଦିନିକିଆ ମ୍ୟାଚ୍ ସିରିଜ୍ରୁ ପିଟରସନ୍ ଟିମ୍ ସହିତ ନିଜର ନୂଆ ଇନିଂସ ଆରମ୍ଭ କରିବେ।
ଦକ୍ଷିଣ ଆଫ୍ରିକାର ପରିସ୍ଥିତି ଏବଂ ପିଚ୍ ଉପରେ ଗଭୀର ଜ୍ଞାନ ରଖିଥିବା ପିଟରସନ୍ଙ୍କ ଏହି ଅନୁଭବ ଇଂଲଣ୍ଡର ବହୁ କାମରେ ଆସିବ। ସେ ମୁଖ୍ୟ କୋଚ୍ ବ୍ରେଣ୍ଡନ୍ ମ୍ୟାକୁଲମ୍ଙ୍କ ସହ ମାର୍କସ୍ ଟ୍ରେସ୍କୋଥିକ୍, ଟିମ୍ ସାଉଦୀ ଓ ଜିତନ ପଟେଲ୍ଙ୍କ ଭଳି ମହାନ୍ ପୂର୍ବତନ ଖେଳାଳିଙ୍କ ସହିତ ମିଶି ଟିମ୍ର ରଣନୀତି ଉପରେ କାମ କରିବେ। ପିଟରସନ୍ଙ୍କ ନିକଟରେ କୋଚିଂର ଉନ୍ନତ ଅନୁଭବ ରହିଛି। ସେ ଆଇପିଏଲ୍ରେ ଦିଲ୍ଲୀ କ୍ୟାପିଟାଲ୍ସର ମେଣ୍ଟର ଭୂମିକା ତୁଲାଇସାରିଛନ୍ତି। ୨୦୨୩ରେ ମଧ୍ୟ ସେ କିଛି ସମୟ ପାଇଁ ଇଂଲଣ୍ଡ ବ୍ୟାଟର୍ମାନଙ୍କୁ ମାର୍ଗଦର୍ଶନ ଦେଇଥିଲେ।
୨୦୧୪ରେ ପିଟରସନ୍ଙ୍କ ଅନ୍ତର୍ଜାତୀୟ କ୍ୟାରିୟର ଶେଷ ହୋଇଥିଲା। ସେତେବେଳେ ତାଙ୍କ ଓ ଇଂଲଣ୍ଡ ବୋର୍ଡ ମଧ୍ୟରେ ବହୁ ବିବାଦ ଦେଖାଦେଇଥିଲା। ପିଟରସନ୍ ଟିମ୍ରେ ‘ବୁଲିଙ୍ଗ୍ କଲଚର’ର ଗୁରୁତର ଅଭିଯୋଗ ଆଣିଥିଲେ। କିନ୍ତୁ ଏବେ ୧୨ ବର୍ଷ ପରେ ଏହି ତିକ୍ତତାର ସମ୍ପୂର୍ଣ୍ଣ ଅନ୍ତ ଘଟିଛି।
ମୁଖ୍ୟ କୋଚ୍ ବ୍ରେଣ୍ଡନ୍ ମ୍ୟାକୁଲମ୍ଙ୍କ ଅନୁସାରେ, ପିଟରସନ୍ଙ୍କ ପାଖରେ କ୍ରିକେଟ୍ର ବହୁ ଅନୁଭବ ରହିଛି ଏବଂ ତାଙ୍କ ଆସିବା ଫଳରେ ଯୁବ ବ୍ୟାଟର୍ମାନଙ୍କୁ ବହୁତ କିଛି ଶିଖିବାକୁ ମିଳିବ। ଅନ୍ୟପକ୍ଷରେ, ୨୦୧୪ ପରେ ପୁଣି ଥରେ ଇଂଲଣ୍ଡ ଜର୍ସି ସହିତ ଯୋଡ଼ିହେବା ତାଙ୍କ ପାଇଁ ବହୁ ଗର୍ବର ବିଷୟ ଏବଂ ସେ ଟିମ୍କୁ ବିଶ୍ୱକପ୍ ଜିତାଯିବା ପାଇଁ ସମ୍ପୂର୍ଣ୍ଣ ପ୍ରୟାସ କରିବେ ବୋଲି ପିଟରସନ୍ ପ୍ରକାଶ କରିଛନ୍ତି।