ଥିରୁଅନନ୍ତପୁରମ୍: କେରଳ ହାଇକୋର୍ଟ ଏକ ବହୁଚର୍ଚ୍ଚିତ ୭ ବର୍ଷ ପୁରୁଣା ଦୁର୍ନୀତି ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ପିନାରାଇ ବିଜୟନ ଏବଂ ତାଙ୍କ ଝିଅ ଟି. ବୀଣାଙ୍କ ବିରୋଧରେ ଏଫ୍ଆଇଆର୍ ରୁଜୁ କରିବାକୁ ରାଜ୍ୟ ପୁଲିସ୍ ପ୍ରଶାସନକୁ କଡ଼ା ନିର୍ଦ୍ଦେଶ ଦେଇଛନ୍ତି। କୋଚିନ୍ ମିନେରାଲ୍ସ ଆଣ୍ଡ୍ ରୁଟାଇଲ୍ ଲିମିଟେଡ୍ (CMRL) ଏବଂ ବୀଣାଙ୍କ କମ୍ପାନୀ ‘ଏକ୍ସାଲୋଜିକ୍ ସଲ୍ୟୁସନ୍ସ ପ୍ରାଇଭେଟ୍ ଲିମିଟେଡ୍’ ମଧ୍ୟରେ ହୋଇଥିବା ସନ୍ଦିଗ୍ଧ ଆର୍ଥିକ କାରବାରକୁ ନେଇ ଏହି ମାମଲା ଜଟିଳ ରୂପ ନେଇଛି।
ଅଭିଯୋଗ ମୁତାବକ, ୨୦୧୮-୧୯ ଅର୍ଥବର୍ଷରେ ବୀଣାଙ୍କ କମ୍ପାନୀକୁ ସିଏମଆରଏଲ୍ ପକ୍ଷରୁ ମାସିକ ପେମେଣ୍ଟ ଆକାରରେ ମୋଟ ୧.୭୨ କୋଟି ଟଙ୍କା ଦିଆଯାଇଥିଲା, କିନ୍ତୁ ଏହା ବଦଳରେ କମ୍ପାନୀ ପକ୍ଷରୁ କୌଣସି ସେବା ବା ପ୍ରତିଦାନ ପ୍ରଦାନ କରାଯାଇ ନଥିଲା। ପୂର୍ବରୁ ଆୟକର ବିଭାଗ ଏହି ବେଆଇନ ପେମେଣ୍ଟ ଉପରେ ପ୍ରଶ୍ନ ଉଠାଇବା ପରେ ଏନଫୋର୍ସମେଣ୍ଟ୍ ଡାଇରେକ୍ଟୋରେଟ୍ (ED) ମନି ଲଣ୍ଡରିଂ ତଦନ୍ତ ଆରମ୍ଭ କରିଥିଲା। ଏହାବ୍ୟତୀତ ସିରିୟସ୍ ଫ୍ରଡ୍ ଇନଭେଷ୍ଟିଗେସନ୍ ଅଫିସ୍ (SFIO) ମଧ୍ୟ ଏହି ମାମଲାର ଯାଞ୍ଚ କରୁଛି।
ପୁଲିସ୍ ପ୍ରାରମ୍ଭରେ ଏଫ୍ଆଇଆର୍ ବଦଳରେ ଏସ୍ଆଇଟି ଗଠନ କରିଥିଲେ ହେଁ, ବର୍ତ୍ତମାନ ହାଇକୋର୍ଟଙ୍କ ଏହି କଡ଼ା ନିର୍ଦ୍ଦେଶ ପରେ ପିନାରାଇ ବିଜୟନ ଏବଂ ତାଙ୍କ ପରିବାର ପାଇଁ ରାଜନୈତିକ ଓ ଆଇନଗତ ଅଡ଼ୁଆ ବଢିଯାଇଛି।