ଭୁବନେଶ୍ୱର: ଅନ୍ତର୍ଜାତୀୟ ମୁଦ୍ରା ପାଣ୍ଠି (IMF) ଆଜି ତା’ର ୱାର୍ଲ୍ଡ ଇକୋନୋମିକ୍ ଆଉଟଲୁକ୍ ରିପୋର୍ଟ ଜାରି କରିଛି। ଏଥିରେ ଭାରତ ପାଇଁ ବଡ ଖବର ଅଛି। 2026-27 ପାଇଁ GDP ବୃଦ୍ଧି ଆକଳନକୁ 6.4% ରୁ ବଢାଇ 7% କରିଦେଇଛି, ଅର୍ଥାତ୍ 60 ବେସିସ୍ ପଏଣ୍ଟ ବୃଦ୍ଧି। 2027-28 ପାଇଁ ମଧ୍ୟ 6.7% ରୁ 7% କୁ ବଢାଇ ଦିଆଯାଇଛି।
IMF କହିଛି ଯେ, ‘India Stands Out With Upward Revisions’। ହେଲେ ଏହି ଚମକଦାର ନମ୍ବର ପଛରେ ସବୁଠୁ ବଡ ବିରୋଧାଭାସ ହେଉଛି, ଦେଶର 84% ପରିବାର କହୁଛନ୍ତି ଯେ, ସେମାନଙ୍କ ମାସିକ ବଜେଟ୍ ଆହୁରି ମହଙ୍ଗା ହୋଇଯାଇଛି।
ଆମେରିକା, ଚୀନ୍ ଆଗରେ ଭାରତ କେତେ ଆଗରେ?
IMF ଅନୁସାରେ 2026 ରେ ବିଶ୍ୱ ଅଭିବୃଦ୍ଧି 3.1% ଏବଂ 2027 ରେ 3.4% ରହିବ। ଅର୍ଥାତ୍ ଭାରତର ବୃଦ୍ଧି ବିଶ୍ୱ ହାରଠାରୁ ଦୁଇଗୁଣରୁ ଅଧିକ। ଚୀନ୍: 2026 ରେ 4.5%, 2027 ରେ 4% ଆମେରିକା-ୟୁରୋପ: 2027 ରେ ମାତ୍ର 1.8% । IMF କହିଛି ଯେ, ଭାରତର ଏହି ବୃଦ୍ଧିର 3 ମୁଖ୍ୟ କାରଣ – ଶକ୍ତିଶାଳୀ ଘରୋଇ ଚାହିଦା, ସର୍ଭିସ୍ ସେକ୍ଟରର ଦମ୍ ଏବଂ ଯୁବ ଜନସଂଖ୍ୟା। କେବଳ IMF ନୁହେଁ, ପ୍ରାୟ ସମସ୍ତ ବଡ ସଂସ୍ଥା ସମାନ କଥା କହୁଛନ୍ତି – ବିଶ୍ୱ ବ୍ୟାଙ୍କ 7.1%, OECD 7.1%, RBI 7.1%, ADB, S&P, Fitch ଓ Moody’s ସମସ୍ତେ 7% ପାଖାପାଖି ଆକଳନ କରିଛନ୍ତି।
ସରକାରୀ ତଥ୍ୟ ଅନୁସାରେ FY26 ରେ ବାସ୍ତବ GDP ବୃଦ୍ଧି 7.8% ଥିଲା। 7% ବୃଦ୍ଧି, ହେଲେ ପକେଟରେ ପଇସା କାହିଁ? ଏଠାରେ ହିଁ ପ୍ରଶ୍ନ ଉଠୁଛି। GDP ବଢିବା ଏବଂ ସାଧାରଣ ଲୋକଙ୍କ ପକେଟ୍ ଭରିବା ଦୁଇଟା ଅଲଗା କଥା। ପୂର୍ବତନ ଅର୍ଥ ସଚିବ ସୁଭାଷ ଚନ୍ଦ୍ର ଗର୍ଗ କହିଛନ୍ତି ଯେ, “7.8% ବୃଦ୍ଧିର ପ୍ରଭାବ 75-80% ଲୋକଙ୍କ ଆୟରେ ଦେଖାଯାଉନାହିଁ, ଯେଉଁମାନଙ୍କ ପ୍ରକୃତ ଆୟ 6-7 ବର୍ଷ ହେଲା ବଢିନାହିଁ।” ସେ ଆହୁରି କହିଛନ୍ତି ଯେ, ଭାରତର ସଞ୍ଚୟ 45 ବର୍ଷର ସର୍ବନିମ୍ନ ସ୍ତରରେ ଅଛି ଏବଂ ଘରୋଇ ଋଣ ସର୍ବୋଚ୍ଚ ସ୍ତରରେ।
RBI ରିପୋର୍ଟ ଅନୁସାରେ, ମେ 2026 ରେ ସହରାଞ୍ଚଳ ପରିବାରରେ ଆୟ ବଢିବା କଥା କହୁଥିବା ଲୋକ ମାତ୍ର 0.9% ଥିଲେ। ହୋମ୍ ସେଫ୍ ଅନିତା ଫର୍ଣ୍ଣାଣ୍ଡିସ କହିଛନ୍ତି ଯେ, “ପୂର୍ବରୁ 1 ଲିଟର କ୍ଷୀର 92 ଟଙ୍କା ଥିଲା, ଏବେ 111 ଟଙ୍କା। ବଜେଟ୍ ବଢିଲା ହେଲେ ଦରମା ସେଇଠି ଅଛି।” କର୍ପୋରେଟ୍ ସେକ୍ଟରରେ 2026 ରେ ହାରାହାରି 9.1% ଦରମା ବୃଦ୍ଧି ଆଶା କରାଯାଉଛି, ହେଲେ ମହଙ୍ଗା ହିସାବ କଲେ ପ୍ରକୃତ ବୃଦ୍ଧି ମାତ୍ର 5.1%। ବିଶ୍ଳେଷକ ନିତିନ କୌଶିକଙ୍କ ଅନୁସାରେ ଗତ ଦଶନ୍ଧିରେ ପ୍ରକୃତ ଦରମା ବୃଦ୍ଧି ବାର୍ଷିକ ମାତ୍ର 0.4% ରହିଛି।