ନୂଆଦିଲ୍ଲୀ: ଦେଶବାସୀଙ୍କ ପାଇଁ ବଡ଼ ଖବର। ଆସନ୍ତା ୧ ଏପ୍ରିଲ୍ ୨୦୨୭ ରୁ ବଜାରକୁ ଆସିବ ୧୦ ଏବଂ ୨୦ ଟଙ୍କିଆ ନୂଆ ପ୍ଲାଷ୍ଟିକ୍ ନୋଟ୍। ଭାରତୀୟ ରିଜର୍ଭ ବ୍ୟାଙ୍କ ଏହାକୁ ପାଇଲଟ୍ ପ୍ରୋଜେକ୍ଟ ଭାବେ ଆରମ୍ଭ କରିବାକୁ ଯାଉଛି।
ସବୁଠୁ ବଡ଼ କଥା ହେଲା, ଏହି ନୂଆ ନୋଟ୍ ର ଆକାରରେ କୌଣସି ପରିବର୍ତ୍ତନ ହେବନାହିଁ। ଫଳରେ ବ୍ୟାଙ୍କ ଗୁଡ଼ିକୁ ATM କୁ ନୂଆ କରି ସଜାଡ଼ିବାକୁ ପଡ଼ିବ ନାହିଁ, ଏବଂ କୋଟି କୋଟି ଟଙ୍କା ବଞ୍ଚିଯିବ।
ମନିକଣ୍ଟ୍ରୋଲ ରିପୋର୍ଟ ଅନୁସାରେ, ଜଣେ ବରିଷ୍ଠ ବ୍ୟାଙ୍କ ଅଧିକାରୀ କହିଛନ୍ତି ଯେ, ଛୋଟ ନୋଟ୍ ରୁ ପରୀକ୍ଷା ଆରମ୍ଭ କରିବା ଦ୍ୱାରା ବହୁତ ଲାଭ ହେବ। ଏହା କେବଳ ଫିଲ୍ଡ ଟ୍ରାଏଲ। ଅର୍ଥାତ୍ ନୂଆ ପ୍ଲାଷ୍ଟିକ୍ ନୋଟ୍ ସହିତ ପୁରୁଣା କାଗଜ ନୋଟ୍ ମଧ୍ୟ ଚାଲିବ। ପୁରୁଣା ନୋଟ୍ ସମ୍ପୂର୍ଣ୍ଣ ବୈଧ ରହିବ। ଏହି ପରୀକ୍ଷା ପାଇଁ RBI ୧୦ ଟଙ୍କିଆ ୧୦୦ କୋଟି ଏବଂ ୨୦ ଟଙ୍କିଆ ୧୦୦ କୋଟି ପଲିମର ନୋଟ୍ ବଜାରକୁ ଛାଡିବ।
ପ୍ଲାଷ୍ଟିକ୍ ନୋଟ୍ କାହିଁକି?
ଆପଣ ଜାଣିଛନ୍ତି, ୧୦ ଓ ୨୦ ଟଙ୍କିଆ ନୋଟ୍ ସବୁଠୁ ଅଧିକ ବ୍ୟବହାର ହୁଏ। ପରିବା ବଜାର ଠୁ ନେଇ ବସ୍-ଅଟୋ ଭଡ଼ା, ଛୋଟ ଦୋକାନ ସବୁଠି ବ୍ୟବହୃତ ହୁଏ। ଅଧିକ ବ୍ୟବହାର ହେବା ଯୋଗୁଁ କାଗଜ ନୋଟ୍ ଶୀଘ୍ର ଫାଟିଯାଏ, ମଇଳା ହୋଇଯାଏ। ପ୍ରତି ବର୍ଷ RBI କୁ କୋଟି କୋଟି ପୁରୁଣା ନୋଟ୍ ନଷ୍ଟ କରି ନୂଆ ନୋଟ୍ ଛାପିବାକୁ ପଡେ।
ଅଗଷ୍ଟରେ RBI ଗଭର୍ଣ୍ଣର ସଞ୍ଜୟ ମଲହୋତ୍ରା କହିଥିଲେ ଯେ, ପଲିମର ନୋଟ୍ ୩୦ ବର୍ଷରୁ ଅଧିକ ଚାଲିଥାଏ। ଏହା ୱାଟରପ୍ରୁଫ୍ ଏବଂ ସହଜରେ ଫାଟେନାହିଁ। ଏକ କାଗଜ ନୋଟ୍ ର ଆୟୁ ୧-୨ ବର୍ଷ ହୋଇଥିବା ବେଳେ, ପଲିମର ନୋଟ୍ ୩-୪ ଗୁଣା ଅଧିକ ଚାଲିବ। ଫଳରେ RBI ର ଅରବ କୋଟି କୋଟି ଟଙ୍କା ଛପା ଖର୍ଚ୍ଚ ବଞ୍ଚିବ।
୧୦୦୦ ଟଙ୍କିଆ ନୋଟ୍ ଗୁଜବ:
ସୋସିଆଲ ମିଡିଆରେ ୧୦୦୦ ଟଙ୍କିଆ ନୂଆ ପଲିମର ନୋଟ୍ ଆସିଲା ବୋଲି ଯେଉଁ ଫଟୋ ଭାଇରାଲ ହେଉଛି, ତାହା ସମ୍ପୂର୍ଣ୍ଣ ମିଛ। PIB ଫ୍ୟାକ୍ଟ ଚେକ୍ ଏହାକୁ ଫେକ୍ ବୋଲି କହିଛି।
RBI ସ୍ପଷ୍ଟ କରିଛି ଯେ, ବଡ଼ ନୋଟ୍ କୁ ପଲିମର କରିବାର କୌଣସି ଯୋଜନା ନାହିଁ। RBI କେବେବି ନୂଆ ନୋଟ୍ ବିଷୟରେ ସୋସିଆଲ ମିଡିଆରେ ସୂଚନା ଦିଏନାହିଁ। ସବୁ ସୂଚନା କେବଳ rbi.org.in ୱେବସାଇଟ୍ ଏବଂ ଅଫିସିଆଲ ପ୍ରେସ୍ ରିଲିଜ୍ ରେ ଆସେ। ତେଣୁ ଭାଇରାଲ ମେସେଜ୍ କୁ ବିଶ୍ୱାସ କରନ୍ତୁ ନାହିଁ, ଶେୟାର କରନ୍ତୁ ନାହିଁ।