ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଆଜି ଲୋକସେବା ଭବନର ତୃତୀୟ ମହଲା ସମ୍ମିଳନୀ କକ୍ଷରେ ଜନଜାତି ଉପଦେଷ୍ଟା ପରିଷଦ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ତଥା ଆଇନ ମନ୍ତ୍ରୀ, ୧୫ ଜଣ ବିଧାୟକ, ଦୁଇ ଜଣ ସାଂସଦ ଓ ଅନ୍ୟାନ୍ୟ ବିଶିଷ୍ଟ ସଦସ୍ୟ ଯୋଗଦାନ କରିଥିଲେ।
ଏହି ଜନଜାତି ଉପଦେଷ୍ଟା ପରିଷଦ ବୈଠକରେ ମୁଖ୍ୟ ଶାସନ ସଚିବ, ଅତିରିକ୍ତ ମୁଖ୍ୟ ଶାସନ ସଚିବ, ବିଭିନ୍ନ ବିଭାଗର ପ୍ରମୁଖ ଶାସନ ସଚିବ ଓ କମିଶନର ତଥା ଶାସନ ସଚିବ ଏବଂ ଉଚ୍ଚପଦସ୍ଥ ଅଧିକାରୀ ଉପସ୍ଥିତ ଥିଲେ। ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣରେ ରାଜ୍ୟର ଜନଜାତି ସମୂହର ଅର୍ଥନୈତିକ ସଶକ୍ତିକରଣ, ଜୀବିକାନିର୍ବାହ ସୁଯୋଗର ଅଭିବୃଦ୍ଧି, ଶିକ୍ଷା ଓ ଦକ୍ଷତା ବିକାଶ ନିମନ୍ତେ ରାଜ୍ୟ ସରକାର ପ୍ରତିଶ୍ରୁତିବଦ୍ଧ ବୋଲି ଗୁରୁତ୍ୱ ଆରୋପ କରିଥିଲେ।
ଜନଜାତି ଉପଦେଷ୍ଟା ପରିଷଦ ବୈଠକରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ଜଙ୍ଗଲ ଅଧିକାର ଆଇନ ମାଧ୍ୟମରେ ଆମ ରାଜ୍ୟରେ ୨୦୨୩ ମସିହା ଅପ୍ରେଲ ମାସ ଶେଷ ସୁଦ୍ଧା ୬.୪୭ ଲକ୍ଷ ଅବେଦନକାରୀଙ୍କ ମଧ୍ୟରୁ ୧୦.୪୨ ଲକ୍ଷ ଏକର ଜଙ୍ଗଲ ଜମି ଉପରେ ପ୍ରାୟ ୪.୬୪ ଲକ୍ଷ ଜମିପଟ୍ଟା ବଣ୍ଟନ କରାଯାଇଛି ବୋଲି ଜନଜାତି ଉପଦେଷ୍ଟା ପରିଷଦକୁ ଅବଗତ କରାଯାଇଥିଲା। ସମଗ୍ର ଦେଶରେ ଜଙ୍ଗଲ ଜମିପଟ୍ଟା ବଣ୍ଟନରେ ଓଡ଼ିଶାର ଭୂମିକା ଉଲ୍ଲେଖନୀୟ।
ରାଜ୍ୟ ସରକାର ‘ମୋ ଜଙ୍ଗଲ ଜମି’ ନାମରେ ଏକ ରାଜ୍ୟସ୍ତରୀୟ ଯୋଜନାକୁ ଅନୁମୋଦନ କରିଛନ୍ତି। ୨୦୨୩-୨୪ ଆର୍ଥିକ ବର୍ଷରେ ଜଙ୍ଗଲ ଅଧିକାର ଆଇନ-୨୦୦୬କୁ କାର୍ଯ୍ୟକାରୀ କରିବା ନିମନ୍ତେ ଏକ ସ୍ୱତନ୍ତ୍ର ବଜେଟ୍ ଆବଣ୍ଟନ କରାଯାଇଛି। ଏତଦ୍ଦ୍ୱାରା ଦୁଇବର୍ଷ ମଧ୍ୟରେ ଜଙ୍ଗଲ ଜମି ଚିହ୍ନଟ ଓ ପ୍ରଦାନ ପ୍ର୍ରକି୍ରୟାକୁ ତ୍ୱରାନ୍ୱିତ କରିବା ନିମନ୍ତେ ଜିଲ୍ଲାସ୍ତରରେ କାର୍ଯ୍ୟରତ NGO/CSO (ଏନ୍ଜିଓ/ସିଏସ୍ଓ)ଙ୍କୁ ଗ୍ରାମସ୍ତରୀୟ ସେ୍ୱଚ୍ଛାସେବୀମାନେ ସହାୟତା ଯୋଗାଇଦେବେ।
ସମ୍ବିଧାନର ଅଷ୍ଟମ ଅନୁଚ୍ଛେଦରେ ‘ହୋ’, ‘ସଉରା’ ଓ ‘କୁଇ’ ଭାଷାକୁ ଅନ୍ତର୍ଭୁକ୍ତ କରିବା ନିମନ୍ତେ ପ୍ରସ୍ତାବ ଦେବାକୁ ଜନଜାତି ଉପଦେଷ୍ଟା ପରିଷଦ ସୁପାରିଶ କରିଥିଲେ । ଭାରତ ସରକାରଙ୍କର ଅନୁସୂଚିତ ଜନଜାତି ତାଲିକାରେ ଓଡ଼ିଶାର RANA/RONA, BONDO PVTG, MALI H KULI ସଂପ୍ରଦାୟକୁ ଅନ୍ତର୍ଭୁକ୍ତ କରିବା ପାଇଁ ପ୍ରସ୍ତାବ ଦେବା ନିମନ୍ତେ ଜନଜାତି ଉପଦେଷ୍ଟା ପରିଷଦ ସୁପାରିଶ କରିଥିଲେ।
ସଂପ୍ରତି ତିନିଗୋଟି ଅଣୁପ୍ରକଳ୍ପ ପ୍ରତିଷ୍ଠା କରାଯିବା ସଂପର୍କରେ ଜନଜାତି ଉପଦେଷ୍ଟା ପରିଷଦକୁ ବୈଠକରେ ଅବଗତ କରାଯାଇଥିଲା। ସେଗୁଡ଼ିକ ହେଉଛି, ଯାଜପୁର ଜିଲ୍ଲାର ବିର୍ହୋର୍ ଓ ଜୁଆଙ୍ଗ ଉନ୍ନୟନ ସଂସ୍ଥା, ଢେଙ୍କାନାଳ ଜିଲ୍ଲାର ଜୁଆଙ୍ଗ ଉନ୍ନୟନ ସଂସ୍ଥା, ପ୍ରାଚୀନ ଜନଜାତି ବସବାସ କରୁଥିବା କେଉଁଝର ଜିଲ୍ଲାର ପାଉଡ଼ିଭୂୟାଁ ଉନ୍ନୟନ ସଂସ୍ଥା।
ପ୍ରାଚୀନ ଜନଜାତି ବସବାସ କରୁଥିବା ୧୧୩୮ ଗୋଟି ନୂତନ ଭାବେ ଚିହ୍ନଟ ହୋଇଥିବା ବସତିକୁ ପିଭିଟିଜି ଗ୍ରାମ ଭାବେ ଘୋଷଣା କରାଯାଇଛି। ୧୧୩୮ ଗୋଟି ଗ୍ରାମ ମଧ୍ୟରୁ ୮୮୮ଟି ଗ୍ରାମ ୧୫ଟି ଅଣୁପ୍ରକଳ୍ପରେ ଅନ୍ତର୍ଭୁକ୍ତ ହୋଇଛନ୍ତି। ଅଣୁପ୍ରକଳ୍ପ ଅଞ୍ଚଳ ବାହାରେ ରହିଥିବା ୨୫୦ ଗୋଟିି ଗ୍ରାମକୁ ପିଭିଟିଜି ଗ୍ରାମ ଭାବେ ଘୋଷଣା କରାଯାଇଅଛି ଏବଂ ତିନିଗୋଯି ଅଣୁପ୍ରକଳ୍ପ ପ୍ରତିଷ୍ଠା ହୋଇଛି।
ଓଡ଼ିଶାର ଝାରସୁଗୁଡ଼ା ଜିଲ୍ଲାର ଲାଇକେରା ଓ କିରିମେରା ବ୍ଲକ୍କୁ ନେଇ ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା ((ITDA)) ଗଠନ କରାଯିବା ସଂପର୍କରେ ଆଜି ଟିଏସିକୁ ମଧ୍ୟ ଅବଗତ କରାଯାଇଥିଲା । ଅନୁସୂଚିତ ଜନଜାତି ତାଲିକାରେ ‘ମିର୍ଦ୍ଧାସ’ ସହ ‘ମିର୍ଦ୍ଧା’ଙ୍କୁ ଅନ୍ତର୍ଭୁକ୍ତ କରିବାକୁ ଜନଜାତି ଉପଦେଷ୍ଟା ପରିଷଦ ବୈଠକରେ ସୁପାରିଶ କରାଗଲା।
ଜନଜାତି ଉପଦେଷ୍ଟା ପରିଷଦ ରାଜ୍ୟରେ ବସବାସ କରୁଥିବା ଜନଜାତିଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ୧୯୫୬ରେ ରେଗୁଲେସନ୍ ୨ର ଧାରା ୩ର ଉପବିଭାଗ (୧)କୁ ନିମ୍ନମତେ ବଦଳାଇବା ନିମନ୍ତେ ପ୍ରସ୍ତାବକୁ ସୁପାରିଶ କରିଛନ୍ତି। ଅନୁସୂଚିତ ଅଞ୍ଚଳରେ କୃଷି, ଆବାସିକ ଗୃହ ନିର୍ମାଣ, ପିଲାମାନଙ୍କର ଉଚ୍ଚ ଅଧ୍ୟୟନ, ସ୍ୱନିଯୁକ୍ତି, ବ୍ୟବସାୟ କିମ୍ବା କ୍ଷୁଦ୍ର ଶିଳ୍ପ ପ୍ରତିଷ୍ଠା ପାଇଁ ସରକାରୀ ଆର୍ଥିକ ପ୍ରତିଷ୍ଠାନ ଦ୍ୱାରା ପ୍ରଦାନ କରାଯାଇଥିବା ଋଣ ନିମନ୍ତେ ବନ୍ଧକ କିମ୍ବା ଲିଜ୍ ଅଥବା ଅନୁସୂଚିତ ଜନଜାତିର ବ୍ୟକ୍ତିଙ୍କଠୁ ଅନୁସୂଚିତ ଜନଜାତିର ବ୍ୟକ୍ତିଙ୍କୁ ଅସ୍ଥାବର ସମ୍ପତ୍ତିର ହସ୍ତାନ୍ତରଣ ବ୍ୟତୀତ ଅନ୍ୟ ସମସ୍ତ ଅସ୍ଥାବର ସମ୍ପତ୍ତିର ହସ୍ତାନ୍ତର ଉପଜିଲ୍ଲାପାଳଙ୍କ ଲିଖିତ ଅନୁମତି ଦ୍ୱାରା ହିଁ ଆଇନସମ୍ମତ ହେବ।
ସର୍ତ୍ତ ଅନୁଯାୟୀ ଅନୁସୂଚିତ ଜନଜାତିର ସଦସ୍ୟ ସମ୍ପତ୍ତି ହସ୍ତାନ୍ତର କରିବେ ନାହିଁ ଯଦି ଏହିପରି ଜମି ହସ୍ତାନ୍ତର ପରେ ସେ ଭୂମିହୀନ କିମ୍ବା ଗୃହହୀନ ହୋଇଯାଆନ୍ତି। ଯଦି ଉପଜିଲ୍ଲାପାଳ ଅନୁମତି ଦେବାକୁ ମନା କରନ୍ତି, ତେବେ ଅସନ୍ତୁଷ୍ଟ ଥିବା ବ୍ୟକ୍ତି ଛଅ ମାସ ମଧ୍ୟରେ କଲେକଫରଙ୍କ ନିକଟରେ ଏକ ଆବେଦନ କରିପାରନ୍ତି ଯାହାର ନିଷ୍ପତ୍ତି ଚୂଡ଼ାନ୍ତ ହେବ।